Сурхайл душ Сурхаева Мисиду
Вай гьантрай дунияллия лавгунни Ккурккуллал шяравасса Сурхайл душ Мисиду Сурхаева. Сагъиратлул Мисиду учайссия ккурккуллал ванийн.
Мисиду ххишала бакъа хъунмасса захIмат бивхьусса, чIявусса ккавксса, чIявусса бувхIусса хъамитайпар. ЗахIматрал ветераннал цIа мяйжаннугу хъунмасса захIматрайну лайкь дурссар ванил. Ванин къаккаркссар буттал лажин. Мисидул ппу ивкIуну ур ва дунияллийн букканнин, оьрмулул 23 шинаву. ЧIивисса Мисидугу, цахъи ванияр хъунмасса ссугу цила ниттичIа кьабивтун щар хьуну дур вайннал нину. ОьрчIний нитти-буттал цIаницIайлул ва аякьалул хъихъи къабивтсса Мисидул жагьилшивугу чIярусса захIматшивурттацIун дархIусса хьуну дур. Ванил оьрмулул 16 шин хьусса чIумал байбивхьуну бур Хъунмасса Буттал кIанттул цIанийсса дяъви. Му чIумал ва дахьва медучилищалувун бувххун бивкIун бур. Тай дяъвилул шиннардий Ватан душмантурая дуручлай, къинттуллух хъунмасса захIмат бивхьуминнавасса цар Мисидугу. Мукьийла лавгун бур ва захIматрал фронтрайн. ЗахIматсса шартIирдай къанаврду дуклай къаккавксса къаливчIун бур. Немецная тархъан бувсса Киев ва цаймигу Украиннал шагьрурду ччаннай бацIан буллалисса давуртту дуллангу гьан бувну бивкIссар Мисиду. Дяъвилул шиннардий оьрмулул 22 шинаву ца бакъа бакъасса ссугу бивкIуну, хъиннува ялгъузну ливчIун бур Мисиду.
Дяъви къуртал хьуну махъ Мисиду щар хьуну бур дяъвилул участник Сунгъуров Сунгъурдун. Сунгъур цувагу дяъвилул цIараву ккаккан дурсса къучагъшивурттахлу чIярусса наградартту лайкь дурсса адиминар. КIира Славалул ва кIира Буттал КIанттул цIанийсса дяъвилул орденнал кавалерди. Ми дакъассагу, ванал диркIун дур «За отвагу», «За боевые заслуги» ва чIярусса цаймигу медаллу. КIива мюрщисса оьрчIащал ласная личIи хьун кьисмат хьуну бур Мисидун. Цама адиминал цила оьрчIай цIими къабанссар тIий кIилчин щаргу къавхьуну, цила оьрму оьрчIан хас бувну бур ванил. Ми ччаннай бацIан бан, ссахчIав мюхтажну къабитан кIира-шанна даврий зий, мицI бацIансса мажал бакъа бикIайсса бивкIун бур.
Учин бучIир, ванил захIмат дузрайн бувккунни куну. Ванил арсная МахIаммадлуя, душния Саниятлуя жяматран бусравсса инсантал хьунни. Цуппа ласнащал бакъанугу, Мисидул тарбия дурну дур оьрчIаву буттахсса ччаву ва хIурмат. Дурурччуну дур ласнал цамур кулпатрацIасса оьрчIащал нахIу-хIалимсса арарду.
Цила бусса оьрмулий Мисидул къакьариртун дур дин. Арс совет хIукуматрал жаваблувсса къуллугъирттай усса чIумалгума дин-чак байсса бивкIун бур. «Аллагь кьаитан къабучIиссар», — тIун бикIайсса бивкIун бур ва мудан цила арснал, душнил оьрчIахьгу. ОьрчIшиву, жагьилшиву захIматну гьарчагу, Мисидул оьрмулул ахир хайрданийн дуркссар учин бучIихьунссар. ОьрчIру хъуни хьуну махъ ва бия бусса оьрмулий арснал ва душнилгу, миннал оьрчIалгу хъихъи бивтун, хъатлия хъатлийн бутлай тIиссакссагу ябувну.
Оьрмулул 90-хъай шинну хьуннин битавугу миннал аякьалул барашинна духьунссар.
Мисиду аьпалул шаврил кьурчIишиву кIидачIлай, жижара буллай буру арснахь, душнихь, миннал оьрчIахь, махъсса гъан-маччанахь. Имандалий лавгун лякъиннав, рухI хъинний дишиннав.
Ккурккуллал жямат
Залмулавхъал ОьмархIажинал душ Магьдиева Бирлиянт
Вай гьантрай мукьцIал лавхъунни Ккурккуллал шяравасса ххаллилсса агьлу-авладрал душ Бирлиянт Магьдиева аьпалул хьуну. Буттал къатлувугу, ласнал хъаралугу хъихъи бивтун, цинма ччикун оьрму бувтун бунугу, ччяни лавгунни дунияллия Бирлиянт.
Бирлиянт бия дуккаврил гьунар бусса, бакIрал ххуйсса, дан-дитан кIулсса хъамитайпа. 1954 шинал Ккурккуллал дянивмур даражалул школагу ххуйсса кьиматирттай къуртал бувну, ва бувххун бур Дагъусттаннал университетрал чил билаятирттал мазурдил факультетрайн. Студентсса шиннардийгу ва сий дуну бивкIун бур архIал дуклакиминнал дянив. ЧIярусса шиннарий Бирлиянт зий бивкIун бур ПаччахIлугърал мюхчаншиврул комитетрай (КГБ) таржумачину. Таний сий дусса таржумачинал пишагу ваницIун хъинну бавкьуну бия. Шиккугу каялувчитурангу, архIал зузиминнангу бусравну бивкIун бур. Ва даврий зий кьунияхъайсса шинну хьуну дур ванил. Ми шиннардий Бирлиянт цимилагу лайкь хьуну бур ХIурматрал грамотарттан, Барчаллагьрал чагъардан, личIи-личIисса медаллан. Ва бия захIматрал ветеран. Оьрмулул шинну ларгун махъгу итталун багьлагьисса, цIу-цIанпир бусса хъамитайпа. Бирлиянтлул лас Бусттамингу уздансса Магьихъал тухумраясса ия. Ва хьхьичIсса никирал инсантуран чIявучин кIулссар, Дагъусттаннал Геологтурал разведкалул хъунаману икIайссия. Тай шиннардий чIявусса жула инсантал давурттай бацIан, квартирарду ласун кумаг бувссия.
Бусттамингу, Бирлиянтгу куннал ку лавсъсса ласгу, щаргу бия. Вайннал кулпат шяраваллил жяматрачIа хIурматрайсса кулпатъя.
Бирлиянт аьпалул шаврил кьурчIишиву кIидачIлай, жижара буллай буру ванил оьрчIахь, Залмулавхъал ва Магьихъал агьлу-авладрахь.
РухI хъинний дишиннав, алжаннул ххари баннав. ОьрчIахьхьун, махъсса гъан-маччанахьхьун цIуллушиву дулуннав.
Ккурккуллал жямат
МахIаммадлул душ Штанчаева Нина
Октябрьданул 31-нний оьрмулул 87 шинаву, цаппара хIаллай къашавайгу хьуну, ахиратравун лавгунни ГьунчIукьатIатусса Штанчаева Нина.
Нина бувну бур октябрьданул 16-нний 1929 шинал Краснодар шагьрулий усттар МахIаммадлул ва Марижатлул кулпатраву. Къуртал бувну бур Гъумучиял педучилище. Цаппара хIаллай Гъумучиял школалий зийгу бивкIун, бувххун бур МахIачкъалалий пединститутравун. Институт къуртал бувну махъ 40 шинай оьрус мазрал дарсирал учительну зий бивкIун бур МахIачкъалаллал 15-мур школалий.
Нина бия цила пиша лавайну кIулсса педагог, цищала зузиминначIа хIурмат бусса, дакI аьчухсса лакку хъамитайпа. Цилла даву ххуйну биттур дуллалаврихлу ва лайкь хьуну бия мадарасса хIурматрал грамотарттан, бахшиширттан. Ва бия дяъвилул ва захIматрал ветеран.
Нинал, хъунигу бувну, чивун буккан бувунни арс ва душ, цуппа кунма захIмат ххирасса, хъуниминнал хIурмат буван кIулсса.
Нинал бивкIулул кьурчIишиву кIидачIлай, жижара буллай буру ванил арснахь Заурдух, душнихь Зульфияхь, ссихь, махъсса цинявппагу гъан-маччаминнахь. Ванин бакъамур ванил оьрчIан, уссурссуннан булуннав. Цил бунагьирттал аьпа баннав, рухI хъинний дишиннав.
ГьунчIукьатIрал жямат
ЧIибил душ Сайпуллаева (Штанчаева) Калимат
Тамансса хIаллай къашавайгу бивкIун, жуятува личIи хьунни ГьунчIукьатIрал шяраватусса ЧIибил ва Мухлисатлул кулпатраву хъунма хьусса Сайпуллаева Калимат.
Калимат бувну бур 1940 шинал. Дуклай бивкIун бур цалва шяравусса школданий. Гьуртту шайсса бивкIун бур жагь районнай, жагьгу республикалул вив хъанахъисса бяст-ччаллил тIуркIурдавух. Бугьайссия пахру багьансса лавайсса кIанттурду, дуссия диялсса хIурматрал грамотартту, пишкаш дайссия бахшишру. Школа къуртал бувну махъ бивзссар яхъанан Каспийск шагьрулийн. Зий бивкIссар «Дагдизель» заводраву 17 шинай. 1977 шиная 1994 шинайн бияннин зий бивкIссар завод «Точной механикилий» контролерну. Цилла даву канилух дурксса зузала бия Калимат. АрхIал зузиминначIа хъунмая ванил хIурмат. Дулайва давриву дурсса ккаккиярттахлу бахшишру, хIурматрал грамотарду. Дуллуна «Коммунист захIматрал зузала» тIисса цIа.
Даврийгу, ичIувагу хъинну хIурмат лавайсса, захIмат ххирасса инсан, оьрчIан, оьрчIал оьрчIан ххирасса нину, хъуннадада бия Калимат. Зунттал аьдатирттай хъунма хьусса хъамитайпалун кIула ухнал ххуллугу, ххувнал ламусгу бан.
Хъуннасса кьурчIишиву кIидачIлай, жижара буллай буру ласнахь Сайпуллагьлухь, арсурваврахь Мурадлухь ва Русланнухь, душнихь Саидахь, ссурваврахь, уссихь, ласнал ссурваврахь, уссурваврахь, оьрчIал оьрчIахь ва щалвагу агьлу-авладрахь. Махънал оьрмурдай барачат бишиннав, Калиматлун къабуллумур оьрмулул бутIа оьрчIан ва оьрчIал оьрчIан ххи бувну лякъиннав. Ванил рухI чаннаний, чурх кIукIлуний хьуннав, алжаннул ххари баннав. Амин!
ГьунчIукьатIрал
ва ЦIуссалакрал жямат
Дибирдул арс Дибиров Тажуттин
Оьрмулул аргъираву дунияллия лавгунни, ца лакран акъассагу, Дагъусттаннан акъассагу, Къалмукьнан, Къабардин-Балкьарнан, Ставрополлан, Кисловодск шагьрулул чIявуминнан кIулну ивкIсса, цува зузисса кIанттурдай цIу-цIанпир буллалисса, итххявхсса даврил минахур, лавайсса къуллугъирттай зий ивкIсса полковник, Вираттиял шяраватусса Дибирдул арс Дибиров Тажуттин.
Тажуттин увну ур 1963 шинал Вираттав. Шяравату Каспийск шагьрулийн бивзун бур ванал нину-ппу, Тажуттингу дуклан ивкIун ур Каспийскалий. 1980 шинал школагу къуртал бувну, увххун ур дуклан Политехнический институтравун. 1983 шинал увххун ур зун органнавун. Тажуттин зий ивкIун ур Дагъусттаннал Республикалий, Къалмукьнал Республикалий, Къабардин-Балкьарнаву, Ставрополлал крайрай, Кисловодск шагьрулий чIумуйну тIайла увксса частирдаву. Ми шачIанттайх лахълай, ивну ур полковникнал чиндалийн. Увккун ур отставкалийн Ухссавнил Ккавкказуллал Федерал службалул мюхчаншивурттал Управлениялий начальникнал хъиривманал къуллугърая 2015 шинал.
Тажуттин Дибирович ия дяъвилул иширттал ветеран. Гьарца цува зузисса кIанттурдай ванал ккаккан бувуна цува цукун давриву итххявхсса, кIулшиву лахъсса, тIалавшин дусса зузала уссарив. Ххаллилсса профессионал ушивруцIун ванал дия, дусшиву дангу, дуруччингу кIулсса, аьркиннал чIарав ацIайсса, хасият, муницIун ванал цикссагу хъирив нанисса жагьилтуран цалва оьрмулул ва даврил опыт лахьхьин бувссар, дус-ихтивар хьуссар. Тажуттиннун дуркссар диялсса хIурматрал лишанну, бахшишру, медальлу.
Лавгунни сахIибулхайр дусса чув, ас-ламусрал виувцIусса инсан, жагьилнува, цува ххирамигу, цанма ххирамигу къумалаган бувну, дустал-гьалмахталгу банд лаган бувну.
Тажуттиннул бивкIулул къумашивугу кIидачIлай, жижара буллай буру ниттихь, кулпатрахь, оьрчIахь, душнихь, уссурссуннахь ва щалвагу агьлу-авладрахь. Махънал оьрмурдай барачат бишиннав. Тажуттиннун къабуллусса оьрмулул бутIа мунан ххирану ивкIнан булуннав. Пирдавс-алжаннул ххари аннав, гьав нурданул дуцIиннав. Амин!
Вираттиял жямат
Тамансса шиннардий жуна кIулну ивкIсса, хIурмат лавайсса полковник, Вираттиял шяраватусса ххаллилсса чув-адамина
Дибиров Тажуттин Дибирдул арс
чIун дакъасса оьрмулий аьпалувух ишаврил кьурчIишивугу кIидачIлай, жижара буллай буру ниттихь, кулпатрахь, оьрчIахь, душнихь, уссурссуннахь ва щалвагу агьлу-авладрахь. Тажуттиннул гьав нурданул дуцIиннав, алжаннул ххари аннав. Мунан къабуллумур оьрмулул бутIа муная бивзминнан ххи бувну лякъиннав. Амин!
Кисловодскалий яхъанахъисса лак
Ккурккуллал шяравасса
Сурхайл душ Мисиду Сурхаева
аьпалул шаврил кьурчIишиву кIидачIлай, жижара буллай буру ванил арснахь МахIаммад Сунгъуровлухь, жула кказитрай зий бивкIсса, цIана дазул кьатIув ялапар хъанахъисса арснал душ Сагъират Сунгъурова- АхIмадхановахь.
РухI хъинний дишиннав, алжаннул ххари баннав.
«Илчи» кказитрал редакция
