Ларгсса нюжмардул ахирданий, ноябрьданул 13-нний МахIачкъалалив Дагъусттаннал паччахIлугърал медициналул университетраву хьунни Тренингирттал кьини – жулла республикалул студентътал ва дуклаки оьрчIру гьуртту хьунни щалагу Аьрасатнал «День тренингов» проектравух. МахIачкъала шагьру ва проектравух гьуртту хъанай байбивхьуссар 2014 шиная шинмай.

Бадрижамал Аьлиева
«День тренингов» проектрал кумаг буллай бур жагьилтуран цала пишарал ялун цIусса кIулшивуртту ласун, давривугу, укунмасса оьрмулувугу аьркинсса, мюнпатсса. Тренингру дия личIи-личIисса: «Ниндзя общения», «Отложи на завтра», «Стань героем, оказав первую помощь», «Коротко о главном; что должен знать медийщик», «Целеполагание. Постановка целей и их достижение», «Ты – Лидер» ва цаймигу. Тренингирттал цIардалва буслай бур ихтилатру ссаясса бивкIссарив: инсантурал хьхьичI дакI дарцIуну, вичIи дирхьуминнан хIаз бизан­сса куццуй ихтилат баву, хьхьичIсса бюхттулшивурттачIан, щаллу буван аьркинсса масъаларттачIан дакI дарцIуну, кьянкьасса шаттирдай ачаву, цIана, хIакьину дуван бю­хъаймур яланин, гьунттийнин кьаритлатисса хасиятрацIа шаву, командалуву, коллективраву зун, къуццу тIун лахьхьаву ва м.ц.. ОьрчIан ми цимурца лахьхьин буллай бия жагьилтуращалсса даврил опыт бусса тренертал ва хасну ва проектравух гьуртту хьун республикалийн оьвкусса хъамал.
Ва проектравух гьуртту хьун бюхълай бур оьрмулул 16 шинава, 30 шинавун бияннинсса жагьилтураща. Ва мероприятие дуллали­ссар Аьрасатнал 50-нния ливчусса регионнай.
Дуклаки оьрчIан, колледжир­ттал ва вузирдал студентътуран ва проектраву кIулшивуртту укра дуллалиссар.
Тренингирттал кьини тIитIлай, ихтилат бувна ДГМУ-рал жяматийсса дахIавуртталсса ва социал-тарбиялул даврилсса бувайсса проректор Шяъбанов Русланнул.
Гихуннай ва проектрал даву дарчунни гьарцагу жагьилнал цала язи дургьусса тренинграл темардайн бувну. ОьрчIан яла-яла хIаз дирзунни «Снежный Барс» медициналул кьюкьлул бувсса тренинг «Стань героем, оказав первую помощь» цIанилусса. ОьрчIан кIул хьунни цикссагу цIусса затру, муниннин бавну бивкIхьурчагума ца­ппарасса затру, иширайну кIул хьунни цукун къуццу тIун аьркинссарив инсаннал оьрму ххассал баншиврул, хIакинтал, хасъсса пишакартал ялун бияннин.
Бигьалагай кьини дунугу, цала дувайсса цайми давурттугу, бигьалагавугу кьадиртун, шиккун бучIаврия жагьилтал хъис пашман къавхьунни, ялунмагу гихунмайгу уку-укунсса иширттавух гьур­тту хъанансса гъира-шавкьирал бувцIуну, рязийну лавгунни шаппа-шаппай. Проектравух гьуртту хьу­сса гьарцагу жагьилнан дуллунни ДГМУ-рал ректор С. Н. Маммаевлул къулбасралусса Сертификатру.