Ноябрьданул 14-нний щаллагу дунияллий кIицI лагай сахарный диабетращалсса талатаврил кьини. Ва ххуллух му кьини жула республикалул медициналул цаппарасса идарарттайгу хьунни личIи-личIисса акциярду, батIавуртту ва ми шиная шинайн чIяру хъанай дур. Мукунсса ца мероприятие, «День диабетика» цIанилусса акция хьунни МахIачкъалалив Къорхъмасовлул (Советская) цIанийсса кIичIираву бивхьумур «Целитель» аптекалийгу.
Бадрижамал Аьлиева
Му кьинилул лагрулий ччима инсаннаща, ци оьрмулул, ци пишалул унугу, бюхълай бия, шиккун увкIун, укра оьттул анализ дулун, мунивусса сахарданул лагру ххал дуван, мукуна эндокринологначIан украсса консультациялул хъирив уххан. Ва аптекалул заведующая-провизор, «Целитель» аптека тIивтIуния шихунмай шиву зузисса, Шахьуйннал шяравасса Башикар МахIаммадова буслай бур:
— Ва кьини жучIан бувкIунни 150-нния ливчусса инсантал, личIи-личIисса оьрмурдал. ХIатта мюрщисса оьрчIругума бия. Ва кьини акциялувух гьуртту хьусса инсантуравасса бачIиннал оьттувусса сахар бия бикIан аьркинссаннуяр лахъсса. Миннан эндокринологнал бувссар хасъсса маслихIатру, рекомендацияртту…
Ва кьини диабетиктураща бюхълай бия цанна чара бакъа аьркинсса продукциягу къулайсса багьрах ласун. Мукунма вайми кьинирдайгу, ва аптекалуву диабетиктуран аьркинмунинсса багьри лагь бувну бур, цанчирча ва аптекалул хъунмур даву дархIуну дуну тIий му азарданущал. БувкIминнан дуллай бия хасну сахарный диабет думиннан куну дуккан дурсса нацIушивурттахунсса чяй. Бухлай бия глюкометрду ва тест-полоскарду, мукунна диабетиктурансса нацIушивурттугу.
Сахарный диабетращалсса талатаврил кьини цалчинна цалчин кIицI ларгун дур 1991 шинал, Щаллагу дунияллул диабетическая федерациялул ва ЦIуллу-сагъшиву дуруччаврил щаллагу дунияллул организациялул сипталийну. Му Кьинину ноябрьданул 14-мур кьини язи дугьавугу хар-хавар бакъасса иш бакъар, му кьини увну ур инсулиндалул гормон буккан бувсса аьлимчу Фредерик Бантинг.
«Целитель» аптека ва давривух цалчинма цалчин гьашину гьуртту хьунни ва ва идаралул хъуниминнан умуд бур ва даву ялу-ялун хъиннура усттарну, гьарта-гьарзану дуллансса.
