Ноябрьданул 21-нний Расул ХIамзатовлул цIанийсса Миллат­рал библиотекалуву хьунни «Традиционная культура Респуб­лики Дагестан как важная составляющая межнационального согласия на примере работы центров традиционной культуры народов России» цIанилусса Республикалул семинар.

Бадрижамал Аьлиева
Семинар хьунни Дагъусттан Республикалул БакIчи Рамазан АьбдуллатIиповлул бигарданийн бувну, VI Парламентский «Историко-культурное наследие России» цIанилусса форумрал ва Аьрасатнал халкьуннал аслийсса культуралул центрдал даврилсса баврил ДР-лул Культуралул министерствалучIасса Советрал Рекомендацияртту иширайну щаллу баврил лагрулий. Семинар хIадур бувну бия ДР-лул Культуралул министерствалул ва Республикалул Халкьуннал творчествалул къатлул.
Семинарданул давривух гьур­тту хьунни ДР-лул культуралул министр Зарема Буттаева, ДР-лул миллатрал политикалул министр Татьяна Гамалей, ДР-лул жагьилтурал иширттал министр Арсен ХIажиев, ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадова, ДР-лул кIулшиву дулаврил ва элмулул министрнал хъиривчу ХIажимурад Аьлиев, ДР-лул туризмалул ва халкьуннал художествалул промыслирдал министр­нал хъиривчу Виталий Демченко, «Дагъусттан» ГТРК-лул директорнал хъиривчу Ссалам Хавчаев, республикалул шагьрурдал ва районнал культуралул управлениярттал начальниктал (миннувух лакрал шаннагу райондалулмигу), центрдал директортал.
Семинар тIитIлай, ихтилат бувна Зарема Буттаевал. Дайдихьулий мунил культуралул муниципал идарарттал зузалтран буллуна Барчаллагьрал чагъарду, Дагъусттаннал халкьуннал аслийсса культура дуруччавриву бихьлахьисса бутIухлу, миннавух ЦIуссалакрал Культуралул управлениялул начальник ХIабибат Буттаевангу. Гихунмай министрнал бувсунни жула республикалул халкьуннал культуралул ирс буруччавриву дурсса, дуллалисса ва дуван дакIнийсса давурттая, бувсунни салкьи хьуну бушиву биялсса опыт му ирс лахьхьавриву, хьхьичIунмай бавриву. КIицI ларгунни дуллай бушиву билаятрал ва дунияллул халкьуннал даражалий­сса фестиваллу ва конкурсру, гьарца райондалий цийва-цийва бацIлай, кIантту-кIанттурдай дуллалими шадлугъирттая. ХIакьину агьалинал оьрмулуву интернетрал бугьлагьисса агьамсса кIанугу хIисавравун лавсун, сайки гьарцагу инсаннал цалла кьини соцсетирдавун уххаврия дайдишаву ва мунийну республикалий хьусса иширттая кIул хъана­хъавугу кIицI лавгун, министр­нал кIицI ларгунни соцсетирдаву цалла «страницарду» дакъами районну (сайки 20 район) ва тавакъю бунни ччясса мутталий ва кIанттулсса буван, мукунна цIа дунни цала дуллалисса давурттая соцстраницардай бусласисса районная.
Гихунмай махъ лавхъсса Татьяна Гамалейл бувсунни Культуралул министерствалущал уртакьну цалвамур министерствалул дуллалисса давурттая, чIурчIав дунни центрду хъанай бушиврий агьалинащалсса даврил ца яла агьамми майданнуну, хаснува шяраваллаву, зунттал районнай.
Арсен ХIажиевлул бувсунни жагьилтураву Аьрасатнал тарихрал ва культуралул ирс машгьур баву мурадрай цалла щаллу дуллалисса проектирдая.
Ихтилатру мукунма бунни Сса­лам Хавчаевлул, Марита Му­хIадовал, ДР-лул Композитортурал союзрал председатель Рамазан Фаталиевлул ва цайминнал.