Р.ХIамзатовлул цIанийсса Миллатирттал библиотекалул конференц-залдануву ноябрьданул 10-нний «Региональные общественно-политические Гусаевские дни» тIисса цIанилусса батIаву хьунни. Ванил сакиншинна дурну дия ДР-лул Миллатирттал иширттаха зузисса министерствалул.

З.АьбдурахIманова
Конференция тIитIлай миллатирттал иширттал министр Татьяна Гамалейл кIицI бувунни, «Гусаевские чтения» тIисса проектрал бушиву хъунмасса тарих ва мунил дайдихьугу хьушиву цаппара шиннардил хьхьичI Ставрополлай Дагъусттаннал хIукуматрал сипталий. МахIачкъалалив ва конференция утти кIилчинсса хъанай бур. Т.Гамалейл мукунма кIицI бувунни, цал мурад бушиву конференциялул даража лахъ бансса ва муния бунияласса элмийсса мероприятие дуван. Цивухгу жула билаятраясса ва чил хIукуматирттаясса политологиялул , этножурналистикалул,конфликтологиялул, медиациялул цIанихсса пишакартурайн гьуртту хьун оьвкуну. Мукунма министр­нал шикку дакIнийн бувтунни, 20 шин ларгшиву цалчинма Да­гъусттаннал миллатирттал ишир­ттал министр МахIаммадсалихI Гусаев жущала акъа.
-Гукунсса инсан жуятува лагаву му гьарцагу дагъусттанчура тIисса инсаннансса хъунна­сса кьурчIишивур. Га жула чIяву миллатру яхъанахъисса Дагъус­ттаннан хIакьину акъа чара бакъа­сса инсанъя. ЧIяву миллатру яхъа­нахъисса Дагъусттаннал политикалуву МахIаммадсалихI Гусаевлул бувмунил кьимат лахъссар,-увкунни Т.Гамалейл.
Политикалул элмурдал кан­­дидат Эдуард Эмировлул М.Гу­саевлул махъру дакIнийн бутлай кIицI бувунни, ганан чIалай бивкIшиву тава-тагу миллатирттал суккушиннарду ва миннул бакIчитал халкьуннал вихшалдарава буккантIишиву. Миннал гьарнал цалами интересру хьхьичIххуттай бивкIшиву. Халкьуннал буруккинну миннал цала цивппа гьаз бан, бусрав бан ишла буллалишиву. Халкьуннал мурадру буручлайру тIисса мяъналул оьвчавурттугу миннал цала хьхьичIун дургьусса лозунгру диркIшиву. Мунинсса тасттикьшиннагу ялу-ялун халкьуннаву ми суккушиннардил бусрав-сий багьаву душиву.
Э.Эмировлул мукунма бувсунни, М.Гусаев ивкIшиву миллатир­ттал республикардан Аьрасатнал Федерациялул унифицированныйсса субъектирдал даража булун аьркинссар тIиминнайн къаршимагу. Ванан миллатирттал республикардал ялунбучIантIимур чIалай бивкIссар Аьрасатнал федерал властьращал, ца бакIчисса президентнащал.
Аьрасатнал миллатирттал Ассамблеялувусса Дагъусттаннал отделениялул председатель Зикрулла Илиясовлулгу кIицI бувунни, Да­гъусттаннал миллатирттал политика сакин шавриву хъунмасса бутIа бивхьушиву М.Гусаевлул ва ванал элмийсса давурттал.
Дагъусттан ванан чIалай бивкI­шиву чара бакъа танийва мархри итабакьлакьисса сепаратизмалия мурахас, мюхчан бан багьлай.
Хъирив шикку махъ лавхъсса Аьрасатнал миллатирттал Ассамблеялул Советрал хъунаманал хъиривчу Ирина Галановал бувсунни, цув хъинну ххаришиву ва конференциялий гьур­тту хьун ва маслихIат бувунни М.Гусаевлул элмийсса давур­тту, монографияртту цачIун дан­сса пишакартурал группа сакин бан. Цанчирча ми хъинну дучIи ля­къин тIий дуну тIий хIакьину экстремизмалул ва терроризмалул нигьачIишиву дусса Аьра­сатнал вайми регионнайгу, аьмну щалла дунияллийгу хъана­хъисса иширттан къаршину ишла дуллан.
Конференциялул гьурттучитурал мукунма шикку МахIам­мадсалихI Гусаев дакIнийн утлатисса, ялагу личIи-личIисса журалул ихтилатру бувунни. Масалдаран, Lenta.ru телеканалданул спец.корр Юрий Васильевлул бувсунни, цува га даражалул пишакар шавриву М.Гусаевлул дурсса гьурттушиннарая, цал хIакьинугу ганал цIа хIурматрай дакъа зумух къаласайшиву.
ЧIявуя га кьини М.Гусаев дакI­нийн утан махъ бусан ччими. Вайннавух ия «ХIакьикьат» яру­ссаннал кказитрал хъунама редактор Аьли Камалов, журналист ва жяматийсса ишккакку Алик АьбдулхIамидов, ДР-лул лайкь хьусса хIакин Аьбдулла ХIажиев, Халкьуннал шаэр Аминат Аьбдулманапова, ДР-лул магьирлугърал лайкь хьусса деятель Хан Баширов ва цаймигу.
Гихуннай конференциялул даву дарчIуна вайва миллатир­ттал политикалуцIун бавхIусса мяъна –мурадрал масъалартту, ихтилатру ххал бигьинтIисса шанма секциялийх.