Ноябрьданул 5-нний Ростов-на-Дону шагьрулий хьунни хъуннасса байран «Дни культуры Дагестана на Дону» цIанилусса. Му хас дурну дия «Донское землячество народов Дагестана» Ростовуллал региондалул жяматийсса организация сакин дурну 20 шин шаврин. Шадлугъ хьунни ДГТУ-рал (Донской государственный технический университет) Конгресс-холлдануву.
Бадрижамал Аьлиева
Байрандалувух гьуртту хьун Дагъусттанная лавгунни ДР-лул миллатрал политикалул министр Татьяна Гамалей бакIчисса делегация. Ростов-на-Дону шагьрулий Татьяна Гамалей хьунабавкьуну бур Ростовуллал областьрал шагьрурдай ва районнай ялапар хъанахъисса дагъусттанлувтуращал, хьуну бур ихтилатру дагъусттанлувтал давурттал щаллу баврицIун, аьрали къуллугърацIун бавхIусса, мукунма кIирагу региондалул дянивсса экономикалул дахIавуртту цIакь даврийн багьайсса. Татьяна Владимировнал цIа дурну дур шикку ялапар хъанахъисса дагъусттанлувтуран кумаг баву мурадрай жула вакилханалул дуллалисса даврия. КутIану бувсун бур Дагъусттаннаймур тагьардания, республикалий ва аьмну СКФО-рай дакьаву дуруччаву мурадрай цалва министерствалул дуллалисса давурттая.
Шадлугърайсса батIаврий Дагъусттан Республикалул ХIукуматрал чулухасса барча баву ккалай, Татьяна Гамалейл увкуну бур:
— Цурда сакин дурния махъ «Донское землячество народов Дагестана» Ростовуллал региондалул жяматийсса организация хъанай дур Дагъусттан Республикалул ва Ростовуллал областьрай ялапар хъанахъисса дагъусттанлувтурал дянивсса цIакьсса бурхIлуну. Организациялул дуллалисса даврийну хъунмасса бутIа бихьлахьиссар жулла регионнал дянивсса гьарцагу ара цIакь давриву, дусшиву ва миллатирттал дянивсса дакьаву цIакь давриву. Хъамал ххирасса Ростовуллал аьрщарай ялапар хъанай бур 80 азарунния ливчусса дагъусттанлувтал, цангу Ростовуллал область кIилчинмур ватанну хьусса. ДакIнийхтунусса барчаллагь тIий буру областьрал каялувшиндарахь «Донское землячество народов Дагестана» организациялун мудангу буллалисса кумаграхлу ва чIаравбацIаврихлу, — увкуну бур барча бавриву.
«Донское землячество народов Дагестана» организациялул председатель Аьли-АсхIаб Гьимбатовлун дуллуну дур ДР-лул ХIукуматрал чулухасса ХIурматрал грамота. Мукунма ва организациялул активистътуран дуллуну дур ДР-лул Миллатрал политикалул министерствалул чулухасса ХIурматрал грамотартту ва Барчаллагьрал чагъарду.
Юбилейращал Дагъусттаннал халкьуннал Донской землячество барча дуллалисса махъру мукунма лавхъун бур Ростовуллал областьрал личIи-личIисса миллатирттал центрдал, сакиншиннардал ва диаспорардал вакилтурал, мукунма Ростовуллал мэриялул каялувшиндарал.
ДГТУ-рал Конгресс-холлдануву хьуну дур ва организациялул тарихрая бусласисса выставка. Экспозициялий дирхьуну дур ва аьрщарай ххуйну кIулсса, Дагъусттанная бувксса аьлимтурал, ишбажаранчитурал, спортсментурал ва чIявусса цаймигу хьхьичIунсса пишакартурал суратру. Мукунна ккаккан дурну дур мультимедийный ляличIийсса издание «Мы – российский народ. Дагестан многонациональный», мукунна ДР-лул Миллатрал политикалул проектрал материаллайн бувну сакин дурсса выставка «От родового сознания – к общедагестанскому единству».
Му бакъассагу, байрандалий ккаккиялун дирхьуну дур миллатирттал яннардавусса ссихьри, Дагъусттаннал халкьуннал музыкалул инструментру. Ва выставкалийнсса материал хIадур дурну дур Дусшиврул къатлул. Ва му Къатлун «Донское землячество народов Дагестана» РРОО-лул чулухасса барчаллагь баян бувну бур, ва байран хIадур давриву бувсса кумаграхлу.
Дагъусттаннаясса делегация Ростоврайн бувкIун бур хъинну ххуйсса концертрал программалущал, тамашачитал яла-яла хIайран бувну бур паччахIлугърал «Дагъусттан» къавтIаврил ва балайлул ансамбльданул гьурттучитурал, цалва яргсса номердайну ва итталун дагьансса миллатирттал янна-калийну.
Концертравух гьуртту хьуну бур Ростоврай ялапар хъанахъисса цаппарасса жулва жагьилталгу. Миннавасса ца бур Лакрал райондалийсса Шахьуйннал шяравасса АьбдурахIманова Самира. Ванил цикссагу шиннур къавтIавурттахун багьну. Махъсса шиннардий Самира къавтIий бур «Донское землячество народов Дагестана» РРОО-лучIасса «Кавказ» къавтIаврил ансамбльдануву. Самира дуклай бур ДГТУ-рачIасса государственный технический университет) колледжрал 4-мур курсирай, специальность «информационные системы».
Шадлугърая махъ ДГТУ-рал жанахIраву хьуну бур ссувхIат, дискотека. Ва шадлугърайн бувкIми цинявппагу, Дагъусттаннаясса делегациягу, Ростоврай ялапар хъанахъисса дагъусттанлувталгу, хъамалгу, рязийну ливчIун бур.
