Ларгсса бигьалагай кьинирдай, гьаман гъараллу кьакъадагьавай лачIлачIисса чIумал къабувккуна маршруткардугу, бакIрайва МахIачкъалалив, яла тайннацIун бавкьуну, къабув­ккун бия Хасавюртуллалми ва Къизилюртуллалмигу.

ХIасан Аьдилов
Тай гьантрай нехру, аьтар­тту бия най шагьрулул кучардавух, ххуллул ца чулия тамунийн лахъан бюхълай бакъая ччанну чят къавхьуну. ХIакьину, ва макьала чичлачисса чIумалгума шагьрулул циняв маршруткарду зий бакъая, заназимигу газрай бакъасса, бензиндалий зузими бия.
Маршруткардал шофертуращал ихтилат бувну кIул хьунни, циван къазузиссарив чIявуми маршруткарду. Миннал бусаврийн бувну, газрай зузисса маршруткарду ГИБДД-лул зузалтрал бацIан буллай, 500 къуруш аькIлул ласлай бивкIун бур, гайнначIа дакъа тIий ГБУ-рансса (газабаллонная установка) ихтияр, яни мугьру бивщусса документ. Мукунсса тIалавшин дусса дур Москавлия. Гай мугьру бищуннугу тIалав дуллай бу­сса бур 12800 къуруш. Жулва шофертурал рязи бакъашиву укунсса дур: циванни чIаххувсса Чачаннал республикалий газрай занансса документ банну 2500 къуруш ласайсса, жучIара тIурча – 12800?
ЧIалачIиссаксса, жуламиннал тамихIру хъунисса бур. Маршруткалул заллухъруннан ччай бакъар миксса арцугу дуллуну, цаймигу страховкалул арцурдугу дуллуну занан. ГИБДД-лун ччай бакъар, мукунсса тIалавшингу дур, газрай занансса ихтияр дакъана маршруткарду битлан шагьрулувух занан. Мунивур бусса щалва иш.
Масъала чулийн бувккун бакъар уттигу, буруганну ссайн дуккайрив ва тагьар.