АЛЮКОВ РУСЛАН АСКЕРХАННУЛ АРС
Акъассар учин дакI диллай дакъар. Жул пахру. Жул ххара. Жул тирхханну. Жул дакIру гъили дуллай бивкIсса баргъ. Яруххуй, бакIххуй. Чурх исвагьи. Бургъил чаннал ва гъилишиврул дурцIусса дакI. Хъярч-чи, махсарачи. Аькьлулул кьулла. Оьрмулул дязаннивсса, дакIний-мазрай къабивкIсса бивкIу, жул ялун бивсса кIул бакъа бала.
Дунияллул зуманив, нюжмар кьини, инава рузмандалийн лагайсса ивкIсса мизитраву азаллийсса чаклийн увкIсса бусурманчунал архIал дурсса дуаьралун ахиратравун тIайла бавцIусса вил ххуллу. Къухъна хьуну бур маз. Ина увния шихунай ттулама аьзизсса арснащал архIалну ххирассияв. Ттул арснал аьзав-аькьувалийсса бивкIулул чIумал, ина ганал цIуцIи шанучIату ша тинмай къалавсъссия. Ина дунияллий уссаксса, ттула арснал дакIнил бутIа виву буну чIалан бикIайссияв. Тти зу цачIун бивссару. Уссурвавраяргу гъансса ссурахъал. Жулми гъюжу дурксса дакIурдия гъалгъа тIун пайда бакъар. Ниттихъал кьурчIисса кьисмат. Гъав лавгсса дакIурдивун виппай бурувгсса яруннах утти дакIнийн бичланну зу жущалва бивкIсса ххарисса кьинирдал лахIзарду. КъюкIлилу хIасул хьуну, хханххираву цалчин тарг увкуния мукьах абадлий яру лакьиннинсса зу чIарав бивкIсса чIун.
Жан аьзиз! Инава гьар чулуха ххуйсса, кьанкь нахIусса, гьар шаттираву уздансса, баргъ куна чанна лавхъсса. Тти рухI хъинний дишиннав. Алжан нясив бувну лякъиннав. Аллагьнал мукунсса кьисмат чивчуну лявкъуния мукьах ттул ссийн, Абачарал душ Алюкова Шагьрагуллунгу, ванил лас Алюков Аскерханнунгу, зувиллихъайсса шиннардий инсантурал цIуцIавурттал хьхьичI цIакьсса баруну авцIуну хьхьу-кьини дакъа зузисса вил уздансса бутта. Аллагь рязиминнавух кьамул увну лякъиннав. Ссавур жугу данну.
Цинявппагу вил гъан-маччанал цIания ниттирссу Качар
АЬЛИЕВА ПАТIИМАТ АЬЛИЛ ДУШ
Оьрмулул 76 шинаву хархавар бакъасса бивкIулул жуятува личIи бунни яхI-къирият ххисса зунттал хъамитайпа, ряха арснал нину, Карашрал шяраватусса Бичал Аьлил душ Аьлиева ПатIимат.
ПатIимат бувну бур 1940 шинал Карашрал шяраву. Буттал шяраву 7 шинал школагу къуртал бувну, захIмат буллай бивкIун бур колхозрал давурттай. Ташулул хьуну махъ цила оьрмулул дус МахIаммадхIажинащал архIал хъуни бувну бур ряха арс. Шагьрулийн бивзун махъ чIярусса шиннардий зий бивкIун бур цIигьурну (поварну) личIи-личIисса идарарттай. МахIачкъалалив 25 шинал мутталий яхъанайгу бивкIун, ласнащал архIал Карашав кIура бавну, цIусса къатригу дурну, ххуйшиврий ва бусравну яхъанай бия буттал шяраву. Ванил бивкIу анавар буккан баврил хъунмур сававнугу хьухьунссар махъсса 3-4 шинал дянив ливтIусса 2 арснал ва арснал арсурваврал дард-хIасрат.
ПатIимат аьпалухьхьун лагаврил хъуннасса къумашиву кIидачIлай, жижара буллай буру ласнахь МахIаммадхIажинахь, арсурваврахь Загьирдухь, Рашидлухь, Идрислухь, Арсеннухь, уссихь Аьлихь ва махъсса циняв гъан-маччанахь.
Цил бунагьирттал аьпа баннав, рухI рахIатний дишиннав.
Карашрал жямат
