Райондалул хъунмур библиотекалий каялувшиву дуллалисса ЧIятусса ХIажиаьлиева ПатIимат ХIусайннул душ ва муничIа зузисса душру ттун лащай МахIачкъалаливсса «Дараччи» ккурандалул каялувчи Мариян Илиясоваха ва миккусса душвараха, цан бакъача, буну тIий ПатIимат ХIажиаьлиева цила даврил усттар, цила дустуращал хайрсса давурттив дуллалисса.

Вана октябрьданул 12-нний ПатIимат ХIажиаьлиева, Аьишат Оьмариева ва минначIа зузисса культуралул зузалт бувкIун бия бугьараминнал кьини хIурмат бан Ваччав ялапар хъанахъисса Хъун дяъвилул гьурттучинал щащар Муслимова НурижатлучIан. Цуппа Муслимова Нурижат Кьадиаьлил душ къакIулсса райондалий цукIуй акъахьунссар. Нурижат бур Хъун дяъвилул гьурттучинал щащар. Бусалдаравунгу багьну бур цила дакIнил хъиншиврийну, кьини дуркнал чIарав бацIаврийну. Хъун дяъвилул щавурдал инжит уллай, къашавай шанийн агьну, 11 шинай ласнаха хIурматрай буссия Нурижат, зумув за дихьлай, зана-кьулу уллай, муния махъ ахиратравун лавгун тамансса шинну хьуну духьурчагу, цила ххирасса ласнал аьпа ябуллай, ужагърай цIу-цIанпир ябуллай бур Нурижат, мугу цила ва ласнал дянив кулпат бакъанагу. Барчаллагьрихха, цал ялагу барчаллагьри. Мукунма Нурижатлун дазу-зума дакъа ххирассар, цинявппагу цила ласнал ляхъин. Нурижат Кьадиаьлиевна бур цила буттал кIанттул – 1-ЦIувкIуллал шяраваллил патриотка, цанчирча му кьини цичIанма бугьараминнал кьини барча бан нанисса ккурандалул хьхьичIунгу му бувккун бия АхIмадхан Султаннул сурат ва чичру дусса гьухъуву.
Му кьини НурижатлучIан бувкIун бия райондалул библиотекалул зузалт: ХIажиаьлиева ПатIимат, Аьлилова Шавлухъ, Исакьова Аьишат, ХIусайннул Асият, Ваччиял бигьалагай къатлул директор Оьмариева Аьишат ва худрук Суллуев Муслин, Ваччавсса райондалул культуралул зузалт МахIаммадова Асият, музыкантътал ХIасайни ва Кьурбан, Ваччиял администрациялул каялувчинал кумагчи Мадаева Роза, Нурижатлул ласнащал зий бивкIми, Нурижатлул чIаххул ва гъан-мачча.
Цивппа шиккун бучIаврил мурад буслай, бавтIминнал хьхьичI Нурижат бугьараминнал кьинилущал барча буллали­сса ихтилат бувна ХIажиаьлиева ПатIиматлул, мунин пишкаш дурна цила чулуха бахшишру.
Нурижат Кьадиаьлиевнал оьрмулия, мунил захIматрал ххуллия ва дакIнил узданшиврия гьарта-гьарзасса ихтилат бувна Шавлухъ Аьлиловал.
Бугьараминнал кьинилущал барча буллалисса ихтилатру бувна мукунма Оьмариева Аьишатлул, Исакьова Аьишатлул, Мадаева Розал, ми циняв­ппагу чIа тIий бия Нурижатлун цIуллушиву ва ххаришиврул дурцIусса чIярусса шинну.
Шиккун бувкIминнал ххуй­сса концерт ккаккан дурна. БавтIминнан хIурмат бан цила Нурижатлулгу увкуна балайрду, хъамаллурангу цила зумувну хIадур дурну дия цIанихсса хъамалушин.
Шиккува бусан, гьар шинах Ххувшаврил байрандалийнгу Нурижат буккайссар цила ласнал суратгу ларсун «Бессмертный полк» хъун буллай, мунал авурну дакьин дурсса суратругу дуссар къатлуву чIирай.
Барчаллагь вин, Нурижат Кьадиаьлиевнай, личIаннав ина мукунма узданну, ххарину чIярусса шиннардий.
Арсен Аьбдуллаев