Дагъусттаннал Культуралул ва мазурдил байрандалул хьхьичI кьини ДГУ-рал филологиялул факультетрай 14 миллатрал мазурдийсса «Тотальный диктант» дурунни ДР-лул Миннацрал сакиншиннаралу. Ва кьини факультетрал аудиториярттаву цала-цала ниттил мазурдийсса диктантру чичин бувкIун бия, гиккусса студентътал бакъасса, личIи-личIисса пишардай зузисса, оьрмулул жагьилсса ва бугьарасса халкьгу.

Аьмну диктант чичин увкIун ия 300-ксса инсан. Диктант чичлай бия оьруснал, яруссаннал, даргиял, лакрал, къумукьнал, лазгиял, цIахъюрнал, чачаннал, ну­гъайнал, татнал, табасараннал ва цаймигу мазурдий. Ва чичаврил мурадгу, Миннацрал бакIчи Татьяна Гамалейл бусаврийну, да­гъусттаннал халкьуннаву миллатирттал мазурдихсса, культуралухсса, тарихрахсса, аьдатирттахсса къулагъас ххи даву бия. ХIакьину ми хъамадитулул хьун къариртун, ми дуруччавриха зун аьркиншиву бусласисса бия.
— Дунияллий кIицI лагайсса Щалла дунияллул Миллатир­ттал мазурдил кьинилуцIун, Да­гъусттаннал Миллатирттал мазурдил кьини кIицI лагавугу ттун ххину чIалай дакъар. Цанчирча, Дагъусттан ва шикку яхъана­хъисса миллатру бур надирсса, цалла ляличIисса дуниял дусса кIану. Жула чIявумиллатру бусса Дагъус­ттан лайкьссар ца цинналусса байрандалунгу, — увкунни ванил.
Татьяна Гамалейл кIицI бувунни укунсса журалул даву дуван цал чIарав бавцIушиву ДГУ-рал филологиялул факультет ва хъунмасса умуд бушиву ва диктант вания гихуннайгу дуллансса аьдат шикку кьамул хьунтIишиврийн.
Филологиялул факультетрал декан Шабан Мазанаевлулгу ххи бувунни ва мероприятие, ца факультетран дакъа, щалла респуб­ликалунгу мюнпатсса хъанахъишиву.
— Жул факультетрал тарихраву ва диктант чичлачисса даву цалчин хъанай дур. Аудиторияр­тту бувцIуну бур диктант чичин бувкIсса халкьуннал. Хъинну ххариру, жуйнна хъуннасса вихшалагу дурну, жул университет язи бувгьуну тIий. ХIадурссару жула Дагъус­ттаннах ччаву рутансса, жулла Ватандалия пахру буллансса давур­ттавух гьуртту хъанан.
Диктант чичин бувкIминнавух бия республикалул миллатир­ттал театрдал пишакартал, журналистътал, кказит-журналлал хъуними редактортал, цайми вузирдава­сса преподавательтал, жяматийсса ишккаккулт.
Лакку мазрайсса диктант жухь ккалай бия, ца филологиялул факультетрай бакъа, жула миллатравугу чIявучин бусравсса, ттухь ттухьрагу ва факультетрай дарс дирхьусса, филологиялул элмурдал кандидат Роза Эльдарова. Ва даврил сакиншинначитурал ванийн вихшалагу дурну дия жухь буккинсса лакку мазрал текст ванил цила язи бугьан. Лакрал литературалул произведениярттан цила багьайкунсса кьимат кIулсса Роза ХIажиевналгу жун бувчIуну бия Абачара ХIусайнаевлул «Арантурал ярагъ канил бувгьуна» тIисса произведениялувасса «Гъумучиял базаллуву» тIисса текст. Хъунма­сса хIалъя ттул, университет къуртал бувния шинмай, диктант къачирчуну. Роза ХIажиевналгу, ганийва кунма, хъинну ххуйну ва бувчIинну бувккуна текст. Диктант дувайни дувайсса гьарца аьдат дузал дурну махъ, ахирданий Роза ХIажиевнал баян бувна даврил хIасиллу кIул хьун ччинан октябрьданул ахирданий баян бантIишиву.
Укунсса журалул диктант факультетрай, Дагъусттаннай дуваврия цуксса хайр буссар жула маз буруччавриву, му лахьлан гъира бутавриву тIисса суалданун Роза Эльда­ровал кIицI бувунни ва мероприятие «галочкалунсса» къархьуну, аьркинссаксса харж-хуржгу буккан бувну, мяйжаннугу вания гихуннайгу щурущи дуварча, хIасиллу оьккисса къахьуншиву.
— Гьаксса ччива укунсса мероприятиярттах жула халкьунналгу хъуннасса къулагъас дуну. Хаснува лакку маз лахьхьин буллали­сса кружокру, курсру тIивтIуми бикIан аьркинни ваних гъира буну. Ва хьхьичIра-хьхьичI дуллалисса даву духьувкун, чIявуминнан къабавсса, къакIулсса ххай бура. Ччива ялунчIин, тулунчIин диктант чичин гъира буми гьарза хьуну. Умудгу бишин ччай бур, дайдихьу ххуйсса хьуну, жува дуллалимуний барачат бишинхьуви тIисса, — увкунни Роза Эльдаровал.
Миллатирттал мазурдийсса диктант дакъасса, хъиривмур кьинигу филологиялул факультет хIадур хъанай бия ва байрандалун хасъсса цаймигу шадлугъру дуван. Ца мукъуйну, ва факультетрал байран дуссаксса иш бия. Мукун бушаву тIагу-тIайлар.