Республикалий «Дагестанцы против терроризма – Родина дороже» тIисса цIанилу терроризмалийн ва экстремизмалийн къаршину баян бувсса зурул лагрулий октябрь зурул 19-нний Да­=гъусттаннал Халкьуннал Мажлисрал, Дагкомрелигиялул ва Муфтиятрал вакилтал МахIачкъалаллал № 42-мур школалий хьунабавкьунни 9-11-ми классирттаву дуклакисса оьрчIащал.

Хъамаллурал ва дуклаки оьрчIал, лавай бивзун, бавцIуну, дакIнийн увтунни щалвагу Аьра­сатнаву машгьур хьусса да­гъусттанчу, Аьрасатнал Виричу МахIаммад НурбахIандов. ХьхьичIва-хьхьичI махъ буллунни Дагкомрелигиялул вакил, махъ нанисса динчи Давуд-хIажи Тумалаевлухьхьун. «МахIаммад НурбахIандовлул цIа рирщуну лавай бизарчагу, жува мунащал архIал дакIнийн бутарду терроризмалул идеологиялул щатIахьхьун биривсса цинявппа дагъусттан агьлу: ихтиярду дуруччай органнал зузалт, имамтал, аьлимтал, хIукуматрал къуллугъчитал, политиктал, журналистътал ва цIакьсса граждан позиция бусса общественниктал. Миннал аьпалул хIурмат жучIава лахъну буссар», — увкунни Д. Тумалаевлул. Мунал цалва ихтилатраву кIицI лавгунни терроризмалул ва экстремизмалул диндалущал цукунчIавсса дахIаву дикIан къабюхъайшиву, ми диндалия хъинну архсса дурчIаларду душиву, исламрал лозунгругу цIакьлин дургьуну къаххуйсса пикрирду бусса инсантал цала мурадру бартбигьинмур буллай бушиву. «Вербовщиктурал къатIухьхьун къабирияншиврул, хъяврин къахьуншиврул, зун ххуйну кIулну бикIан аьркин­ссар исламрал гьанурду, цIакьсса кIулшивуртту дума хъяврин уван къахьунтIиссар, ислам так хъиншиврул ва хъинбалдарал ххуллийсса динни, хъинбалар­тту булланни оьвтIиссагу. Цамур тарап дургьуминнал бяйкьин къабуваншиврул, зун кIулну бикIан аьркинссар исламрал элму щия лахьланссарив. Да­гъусттаннай чансса бакъассар исламрал кIулшивуртту цIакьсса ва куртIсса аьлимтал, динийсса кIулшивуртту ласлан минначIан занан аьркинссару», — увкунни Давуд- хIажи Тумалаевлул.
МахIачкъалаллал Хъун мизитрал (Жумяъ) имам Идрис-хIажи Асадуллаевлулгу цалва ихтилатраву бувсунни исламрал дин щинчIав оьбала бува тIутIисса дин дакъашиву. «Зуща цавагу мисал буцин хьунссарив МухIаммад Идавсил ( с.аь.с) щинчIав оьбала бувсса, бусурманчунан ягу цамур диндалул инсаннан къаччан бикIан був­сса? КъахьунтIиссар мукунсса мисал лякъин. Къавхьуну тIий мукунсса иш Идавсил ( с.аь.с) оьрмулуву», — увкунни Идрис- хIажинал. Бувсунни Сириянаву ва Иракьнаву, «халифат» дихьлайссару тIий, гъургъазарду дуллалиминнал исламращал цичIав дахIаву дикIан къабюхъайшиву. Халкьуннал Мажлисрал депутат Нариман Темуркаевлул бувсунни жагьилтал хъяврин буллалисса нигь душиву интернетрайхчIин исламрал кIулшивуртту хIурами гьулусан буллалиминная, бувсунни цукунчIав мукунминнал тIутIимур бакIурдивун ласун къааьркиншиврия. Школалул директор Асад Оьмаровлул барчаллагь увкунни хайр- мюнпат­рансса ихтилатру бувминнахь.