Октябрьданул 11-нний республикалул СМИ-рдал журналистътурал ва блогертурал суаллахьхьун жавабру дуллунни МахIачкъалаллал бакIчи Муса Мусаевлул. Сайки кIира ссят­рай лахъи лавгсса батIаврий Муса Мусаевлул шагьрулул хозяйствалуву салкьи хьусса масъаларттая ва цукун, ци бущилий ми щаллу буллай буссарив бувсунни. БакIчинахьхьун журналистътурал ва блогертурал буллалисса суаллугу хъунмурчIин цинявннал зума-ккарччулусса, ччюрклил ва цаймигу хIаллихшиннардацIун бавхIусса бия.

Циванни шагьрулул каялувчитурал ва шикку цалла бизнес дусса ишбажаранчитурал дяниву хIала-гьурттушиву дакъа­сса ва ми чIявуми зуя къарязи­сса, тIисса суалданун Муса Мусаевлул бувсунни цIана миннан дурсса куннасса хIаллихшинну ттининсса ацIрахъул шиннардий къадиркIшиву. Бувсунни цал минная тIалав буллалишиву так ца зат – цала-цала идарарттал, ттучаннал, шадлугърал заллал лагма-ялтту низам дурну, мурхьру ва щюллишиву дугьаву. Масалдаран, ванал бувсунни уттигъанну шагьрулул хьхьирицIсса зума марцI дуллай, миччалу чIюлу буллалийни гивахсса идарарттал заллухъруннал цукунчIавсса гьурттушиву къадуршиву.
Журналистътурал мукунма гьаз бувунни Ленинский комсомолданул паркраву ва Эльтаврал вацIлуву къатри дуллалисса масъалартту.
ПаркрацIун бавхIусса суалданун жаваб дуллай, бакIчинал бувсунни гикку буллалишиву тарихрал парк ва «Россия. Моя история» тIисса интерактив музей. Паркраву хьхьичIва бивкIсса пиволул заводрал кIанай Республикалул БакIчи Р. АьбдуллатIиповлул сипталий «Белые журавли» тIисса къатрал комплекс бантIишиву. Ва комплексрал проект дантIиссар щалла дунияллий цIаларгсса архитектор Хельмунт Яннул.
Эльтаврал вацIлуву хъана­хъисса иширттал хIакъираву Муса Мусаевлул кIицI бувунни, гикку 50 участок душиву кадастр­данул номерду бусса ва цув къуллугърайн увкIун махъ цуя ца инсаннан аьрщи дулун ккаккан бувсса цуппа ца чагъар бакъашиву цал къулбас дусса. Ва администрациялучIасса Ихтиярдал управлениялул пишакартал зий бушиву халкьунначIасса чагъардал ялув, мукунма миннуву чIявуми къалпсса бушиву.
Шагьрулул кIичIирттаву, ххуллурдай машинарттал чIя­вушиврул «пробкарду» хъана­хъисса масъалалул хIакъи­раву бакIчинал бувсунни ХIам­затовлул, Ахъушинскийл цIа­нийсса кIичIирттаву хху­ллурду гьарта-гьарза бувшиву ва мукунссара давурттив дуршиву ХIамидовлул цIанийсса ва 1 Петрдул цIанийсса кIичIирттавугу. Бувсунни шагьрулул чIявусса кIичIиртту бакьин бувну, асфальт бувтIушиву ва чIярусса шиннардий лавкьуну, шлагбаумру дирхьуну диркIсса кIичIирттугу тIивтIушиву.
Муса Мусаевлул бусаврийну, чIал къавхьуну шагьрулувун буххайсса кIанттурдай буллай байбишин тIий бусса бур машинартту бакьин бувайсса, шюшайсса хъунисса сервисрал центрду. Мивун бизан бан тIий бусса бур шагьрулул хъуни кIичIирттавусса «мойкарду» ва техцентрду. Бувсунни бакIчинал мукунма администрациялул хасъсса ва ихтиярду дуруччай къуллугъирттал пишакартал гьар кьини дяхтта шагьрулул ххуллурдайх кIусса хъус ду­ххай машинар­тту занан къадагъа дишингу бу­ккайшиву.
Циванни ттинин шагьрулувусса базарду мунил кьатIув бу­ккан къабувсса тIисса суалданун бакIчинал бувсунни цумур-цагу базар цамур кIанайн бу­ккан баннин, гикку зузисса инсантал давурттацIа къабаншиврул, цIусса кIанай циняр хIаллихшиннардугу дусса базар тIитIин аьркиншиву. Мукун агьамсса ва хъуннасса даврингу хасъсса чIун ккаккан дан къабюхъайшиву.
Пресс-конференциялул ахирданий бакIчинал тавакъю бувунни журналистътурахь, шагьрулувусса диялдакъашивурттая, лази къалакьаврия чичайни, миннущал архIал ттинин дурсса ххуй-ххуйсса, хъин-хъинсса давурттаягу чичлан.