Ларгсса нюжмардий Каспийскалий хъунмур библиотекалул 1-мур филиалданий хьунни «Взмывает в небо белый клин» цIанилусса литературалул байран. Му хас дурну дия октябрьданул 22-нний кIицI лагайсса «КIяла Кьурукьирттал кьинирду» байрандалун гьашину 30 шин там шаврин.
Бадрижамал Аьлиева
Му байрандалул тарихрая бавтIминнахь бувсунни ва филиалданул хъунмур Саида Хурияловал, бувсунни му байран цIакь дуршиву Дагъусттаннал халкьуннал шаэр Расул ХIамзатовлул, мунийн шеърилугърал байрангу куну. КIицI лавгунни му байрандалул кIилчинмур мяъна-мурадгу бушиву талатаврил майданнай, аьрщарайсса паракьатшиврухлу, дакьаврихлу жанну дуллуминнал аьпа абад баву.
Байрандалувух гьуртту хьунни шагьрулул школардал дуклаки оьрчIру. Кьурукьру ва байрандалул лишанну циван ва цукун хьуссарив бавтIминнахь бувсунни шагьрулул 1-мур школалул дуклаки душ Алена Чекалкинал (ва бур бачIи лакку душ ).
Дуклаки оьрчIал дурккунни Расул ХIамзатовлул назмурду.
