Октябрьданул 17-нний Каспийскалий ЦБС-лул 4-мур филиалданий хьунни ниттил мазрал ссят. Мунивух гьуртту хьунни шагьрулул 2-мур школалул дуклаки оьрчIру. Му хIадур дурну дия ва библиотекалул зузалтрал ва 2-мур школалул лакку мазрал учитель Анзират АхIмадхановал.

Бадрижамал Аьлиева
БатIаву дайдихьлай, ЦБС-лул методист Зугьра Давидовал бувсунни цуксса агьамшиву дуссарив инсаннан цала тарих, цалла культура, цалва маз, аьдатру кIулну душиврул.
— Мазраха, халкьуннаха кунма, къуллугъ буллан аьркинссар, талан мунихлу, — увкунни ванил.
Бувсунни миллатрал культура дуруччаву мурадрай, Республикалул БакIчи Рамазан АьбдуллатIиповлул 20-мур июльданий 2016 шинал бу­ккан бувшиву хIукму 21-мур октябрьданий республикалий кIицI лаглан цIусса байран – Дагъусттаннал Культуралул ва мазурдил кьини.
Ниттил маз лахьхьаврил агьам­шиврия бувсунни Анзират АхIмадхановалгу. Мунил бувцунни Паустовскийл махъру, цалгу увку­сса: «Гьарцагу инсаннал цала мазрахсса ургаврийн бувну бувчIин бюхъайссар мунал культура ци даражалий дуссаривгу, мунал гражданшиврул гужгу. Билаятрахсса хIакьсса ччаву миллатрал мазрахсса ччаву дакъа къадикIайссар».
Гихунмай Анзират АхIмад­хановал бувсунни миллатрал мазрал дарсирай хъуннасса къулагъас дуллай бушиву миллатрал тарихрах, шяраваллил тарихрах, оьрчIан цалва мархри лахьхьаврих.
— Лакрал халкьуннал тарих бувцIуну бур виричушиврул, ццах бакъашиврул. Хан Муртазааьлил, ПартIу ПатIимал, Сурхай ханнал, АхIмадхан Султаннул ва чIявусса цаймигу лакрал цIарду дурхссар тарихравун виричушиврул эбратну, мисаллуну. Жува Лакку билаятрал ххаллилсса арсурваврал аьпалун лайкьну къуццу тIун аьркинссару, жулва миллатрах, мазрах, культуралух хIурматрай буруглай, — увкунни Анзират АхIмадовнал.
Дуклаки оьрчIал дурккунни лакрал цIа дурксса шаэртурал назмурду.
Каспийскалийсса Аьрасатнал Халкьуннал аслийсса культуралул центрданул директор Башикар Вагьабовал ихтилат бия жува, лак, лап чанну жула ниттил мазрай гъалгъа тIий бушивруясса буруккинттарайсса, оьвчаву дуллалисса дуклаки оьрчIайн шайссаксса чIявуну ишла буллан цалва гъалгъалуву ниттил маз. «Мазраву рухI дусса муний ихтилат буллалисса чIумалли, муний гъалгъа къатIурчан, му бакъа шай­ссар, жува гьарцанналгу шаймур буван аьркинссар ниттил маз буру­ччин ва итххяххан буван», — увкунни ванил.
Ниттил мазрал ссят къуртал хьуну махъ дуклаки оьрчIру бувцунни экскурсиялий Аьрасатнал Халкьуннал аслийсса культуралул центрданийн, микку ми кIул хьунни личIи-личIисса миллатирттал культура, багьу-бизу чIалачIи буллали­сса экспонатирттащал.