Гьарца шинал сентябрьданул 28-нний щала дунияллий дайссар жиндрал шаврил азарданун хасъсса кьини.

ХIасан Аьдилов
Му азардания кIулну бикIан­шиврул, инсан цукун къашавай шайссарив, цукун ппив шайссарив ва муния бурувччуну бикIаву мурадрай, Дагъус­ттаннал Роспотребнадзорданул дунни мунин хасъсса акция – МахIачкъалаллал зоомагазиннаву, ветеринариялул универмагирттаву, ветаптекарттаву ва клиникарттаву бачIлай бия га азардания чивчусса буклетру.
ДР-лул Роспотребнадзорданул управлениялий интернатуралуву дуклакисса хIакинтал ветеринариялул ттучаннавун, зоомагазиннавун бучIайсса муштаритурахь буслай бия жиндрал шаврил азарданиясса профилактикалун­сса ихтилатру буллай.
Жиндрал шаврил азар инсаннайн лахъайссар му азарданул къашавайсса хIайвандалул (ккаччи-ччитул) кьацI увкуну, ганил чIемпи инсаннал оьттувун дагьсса чIумал. Цаппара хIаллавату кьакьарттул ва ссихI ласай ххуллурдал бювчIун биширдал хьхьару батIлан бикIайссар, яла инсан парижрал угьайссар башттана, чIемпигу дачайссар кьацIливату. Ахирданийгу нервардал система лирну, инсан ивчIайссар. Инсаннайн азар лахъайссар шярал ккаччаяту, ччитраяту ва мукунма вахIшисса хIайвантраяту (цулкIраяту, бурцIурдаяту, енот­рал журалийсса ккаччаяту).
Гьашину Дагъусттаннал тамансса районнай (Бущихъиял, Дахадаевуллал, Дарбантуллал, Хайдакьуллал, Казбекуллал, Къарабудахккантуллал, Лаващиял, Сулайман-Стальскаллал, Хасавюртуллал, Дарбант ва МахIачкъала шагьрурдай лявкъуну бур жиндрал шаврил азарданул къашавайсса ичIаллил ва вахIшисса хIайвант. Тай кIан­ттурдай чIявусса инсантал бувкIун бур хъин байсса учреждениярттайн кумаграл хъирив (вакциналул ххалаххив бан). Гьашинусса 8 зуруй хIайвантрал кьацI увкуну зарал бивсса хьуну ур 3 азаллий 580 инсан, яни дукIумур шинах бурувгун 3% ххишаласса.
Республикалул 5 райондалий дянивну лавсъсса респуб­ликалул ккаккиялияргу сайки 2-2,5-лийла гьарза хьуну бур кумаграл хъирив бувкIсса Къумтуркъалаллал, Сергокъалаллал, Ккуллал, Дарбантуллал, Тарумовкаллал районнай ва 4 шагьрулий: Южно-Сухокумскалий, Къизлардай, Дагестанские огнилий ва Къизилюртлив.
Дагъусттаннал Роспотреб­надзорданул инсантуран масли­хIатну ккаклай бур укун­сса профилактикалул кьяйдарду буру­ччин:
— ХIайвант машан ласун так хасъсса организациярдай, минначIа ветеринариялул свидетельство духьурча.
— Чара бакъа буван жиндрал шаврил азардануйн къарши­сса вакцинациялул ххалаххив ичIаллил ва шяраваллил хозяйствалул хIайвантрайн.
— Заллу акъа шярайх багьсса хIайвантрая архну бацIан.
— ЛивтIусса ичIаллил ва цаймигу хIайвант къабихлан ветеринарнал ххал къабувну.
— Агарда зунма къакIулсса хIайвандалул кьацI учирча, ягу ганил чIемпи дагьарча зуйнна, гацIанава медучреждениялийн гьан аьркинссар жиндрал шаврил азарданийн къаршисса ххалаххив бан.