Якьублул арс Якьубов Загьир

Октябрь зурул 2-нний дунияллия лавгунни 2-мур ЦIувкIуллал шяраватусса Якьублул арс Якьубов Загьир. Загьир увссар 1934 шинал. Буттагу дяъвилия зана къавхьуну, ниттин Загьиратлун му цувалу хъуна уллан багьссар.

ЧIивинийва дуккаврил чулухунай итххявхсса Загьирдул 1950 шинал къуртал бувссар ЧIяйннал дянивмур даражалул школа мусил медальданий. Му дия Ккуллал райондалий цалчинсса мусил медаль. 1955 шинал Загьирдул ххювардай къуртал бувна Дагъусттаннал университетрал физикалул ва математикалул факультет. 1977 шинайнин му зий ия 2-мур ЦIувкIуллал школалий. Миннува15 шин дурна му школалул директорну. Ми шиннардий 2-мур ЦIувкIуллал школалул кIийлла ларсун дур «Лучшая средняя школа среди сельских школ республики» тIисса цIа.
1977 шинал элмурдал кандидат хьунсса диссертациягу дурурччуну СССР-данул элмурдал Академиялуву, зун ивкIун ур Москавлив пединститутрал преподавательну. Шиккугу цала захIмат-кIулшиврий ва ивтун ур Ухссавнил Ккавкказуллал дянивмур даражалул школардал директортурал даража гьаз бай­сса факультетрал деканну. 1990 шиная уттинин уссия зий цал доцентну, яла профессорну Да­гъусттаннал университетраву.
Загьир лайкь хьуссар цикссагу бахшиширттан ва барчаллагьирттан. Миннува агьамми дур «ДАССР-данул лайкь хьусса учитель», «АьФ-лул пишалул ларайсса кIулшивуртту ласаврил хIурматлувсса зузала» цIарду. Чув, ци даврий зий ухьурчагу, Загьирдул ккаккан байва лахъсса пагьму-гьунар, захIмат-кIулши. Ва ия дакI марцIсса, инсаншиву дусса адамина.
Загьир дунияллия лагаврил кьурчIишиву кIидачIлай, жижара буллай буру ванал кулпатрахь Гульбагьардухь, оьрчIахь, цинявппагу гъан-маччаминнахь.
РухI хъинний дишиннав, алжаннул ххари аннав.
2-мур ЦIувкIуллал
ва ЦIущуллал жямат, дустал