Октябрьданул 1-нний Сочилий дунияллул халкьуннал инвестортурал форумрай Дагъусттаннал БакIчи Рамазан АьбдуллатIипов хьунаавкьунни Китайнавасса инвестортуращал.
«Жу ххуйну зий буру Китайнал уртакьтуращал, цIанагу хIадур дуллай буру цаппара хъунисса проектру. Жу ххарину вичIи дишивияв зул предложениярттах», — увкунни Рамазан АьбдуллатIиповлул.
Китайнал пенокерамика дуккан дайсса фирмалул вакил Хинглонг Вейл бувсунни цалла ният душиву Дагъусттаннайн пенокерамика дайсса инновациялул материал ва оборудование дучIан дуллан. «Га гъилишиву ядайсса теплоизолятор хъанахъиссар, къатрал чIирттайх, поллайх дакьайссар. Га бетон кунна кьянкьассар, ишла дайссар облицовкалун, атилшиву къаласайссар, ччукъаччайссар. Га дайссар синааьрщарая ва гьагълия», — бувчIин бунни бизнесчинал.
Рамазан АьбдуллатIиповлул бувсунни хIадурну бушиву мукунсса завод баврицIун кабакьин.
