Ларгсса нюжмардий МахIачкъалаллал цаппара школардай ва библиотекарттаву хьунни уттигъанну Республикалул БакIчи Р. АьбдуллатIиповлул хIукмулийн бувну хIасул дурсса Дагъусттаннал Культуралул ва мазурдил кьинилун хасъсса шадлугъру.

«Ина ттулла, ниттил маз, Ттул ккашира, ттул гужра, Шадний чайсса балайра,
Къуманий чайсса угьра» тIисса, «Ниттил маз» назмулувасса ХIажи Муркъелинскийл махъру бюхханну ва асар биянну чIалай бур хIакьину дакIурдиву жула буттахъал яхIгу, къириятгу дурурччусса, гьарцагу цува ла­ккучура тIисса инсаннан. Миннавух хьхьичIва-хьхьичI ниттил маз буруччавриву хъунна­сса даву дуллалисса, ялун нанисса ник лакку маз ххирану тарбия дуллалисса школардай, библиотекардаву, вузирдаву зузисса пишакартурангу.
«Ручей хрустального языка родного» тIисса цIанилусса шадлугъ хьунни вай гьантрай ЦБС-рал филиалданий, Николаевлул цIанийсса кIичIиравусса №2 библиотекалий. БатIаву цурдагу хьунни шикку щурущисса «Талант и Вдохновение» тIисса клубрал лагрулий. Ванивух гьуртту хьун библиотекалул зузалтрал хъамалу оьвкуну бия цачIатува арх бакъа­сса №37-сса школа-гимназиялул дуклаки оьрчIайнгу. Вайннащал архIал бувкIун бия ва школалий чIярусса шиннардий ла­кку мазрал дарсру дихьлахьи­сса Умамат Парамазова ва къумукь мазрал учительница Жамиля Абукова.
Ва библиотекалий зузисса Ф. Рамазановал, С. Мусаевал, А. ХIабибовал ва Р. ХIусмановал оьрчIащал бувунни ва цIусса байрандалун хасъсса ихтилатру, бувккунни ниттил мазурдин хасну жула шаэртурал чивчу­сса шеърирду ва дагъусттаннал миллатирттал фольклорданул хазнардавасса учаларду, лувля­къурду ва бусаларду.
Дурунни мукунна жула ла_кку оьрчIащал «Ци? Чув? Та?» тIисса хъинну хIазсса викторинагу.
Библиотекалул зузалтрал цала хIарачатрацIух тIиртIуну дия луттирдал «Язык моих предков не должен исчезнуть» тIисса выставкагу. Гьарта-гьарзану оьрчIахь вайннал бувсунни ши­ккусса луттирдаягу.
Шадлугърай гьуртту хьусса Испаният Хасаевал, Ислам Зявзановлул, Бадрижат Аьлиевал, Жават АьбдурахIимовлул, Ася Исмяиловал ва Нурият Жабраиловал дурккунни Дагъусттаннал миллатирттал мазурдий­сса назмурду ва ккаккан бунни жула машгьурсса чичултрал хавардавасса цаппара бутIри. Шадлугъ наниссаксса хIаллай оьрчIру цивппагу тяхъану, хъинну хIала-гьурттуну къуццу тIий бия. ЧIалай бия ниттил мазурдихсса вайннал къулагъасгу чансса дакъашиву, му лахьлансса гъирагу унгу-унгусса бушиву. Библиотекалул зузалтрал оьрчIансса чIа учавурттугу аьмну ниттил мазурдия ят мабуцари, хIарачат бувара му ябан тIисса дия.