Октябрьданул 5-нний ДР-лул Физкультуралул ва спортрал министерствалул 80 шин шаврин хасну Дусшиврул къатраву хьунни «Дагестан спортивный» тIисса физкультуралул ва спорт­рал форум.

Форумрай гьуртту хьунни республикалул каялувчитал, Аьрасатнал Спортрал министерствалул, республикалул исполнительный властьрал органнал, СКФО-рал субъектирдал вакилтал, Олимпий тIуркIурдай хьхьичIунсса кIанттурду бувгьуми.
Спортсментурахь аьла-ссалам буллай, Дагъусттаннал БакIчинал бувсунни Дагъусттаннал спортсментурал дунияллул халкьуннал аренардай ларсъсса ххувшавурттая. Ганал бувсунни махъсса шиннардий спортрал бутIуву тамансса дахханашивуртту хьуну душиву. «Респуб­ликалул материально-техническая базалувун бухлай бур 3 370 объект, миннувату 849 спортзал, 12 стадион, 16 бассейн бур. ТIивтIусса спортрал сооруженияр­тту хIисавну Дагъусттаннал бугьлагьиссар хьхьичIунсса кIанттурдавасса ца Аьра­сатнал Федерациялий», — увкунни Рамазан АьбдуллатIиповлул.
Яла Республикалул хъунаманал наградартту дуллунни Рио-де-Жанейролий хьусса Олимпиадалий хьхьичIунми кIанттурду бувгьусса Дагъусттаннал 10 спортсменнан.
АьФ-лул спортрал министрнал хъиривчу Марина Томиловал барчаллагь увкунни Рамазан АьбдуллатIиповлухь Дагъусттаннай спортрал иширттан кумаг буллалаврихлу. Ганилгу паччахIлугърал наградартту дуллунни республикалул спортраву зузиминнан ва хьхьичIунсса спортсментуран.
Яла форум лахъи лавгунни 3 секциялул майданнив.

Октябрьданул 5-нний Къумукьнал театрдануву хьунни республикалул Физкультуралул ва спортрал министерствалун 80 шин шаврин хасъсса шадлугърал мероприятие. Шадлугърай гьуртту хьунни республикалул властьрал органнал вакилтал, спортращал дахIаву дусса инсантал, спортрал ветерантал, мукунма Рио-де-Жанейролий хьусса Олимпиадалий ххув хьуми ва призертал.
Республикалул каялувчинал цIанияту министерствалул зузалтрахь юбилей барча увкунни Дагъусттаннал ХIукуматрал Председательнал хъиривчу Анатолий Карибовлул. Ганал бувсунни Спортрал министерство сакин хьуния махъ ганил хъуннасса даву дурну душиву физкультура ва спорт хьхьичIуннай давриву.
«Физкультура ва спорт, дуккаврищал ва культуралущал архIал, хъанахъиссар жулла обществалул цIуллушиврул гьануну. Мунияту физкультура ва спорт хъанахъиссар жулла республикалул социал политикалул агьамми приоритетирттаваса ца», — увкунни Карибовлул.
Ганал увкусса куццуй, Дагъусттан хьуну бур лавайсса даражалул спортсментал хIадур байсса хьхьичIунсса центрну. Жула билаятрал цIа дунияллийх дуккан дурссар Дагъусттаннал спортсментурал, миннал Олимпий тIуркIурдаву ларсунни 70 медаль, Дагъусттаннал 24 спортсмен хьуссар Олимпиадалул чемпионтал, 161 дагъусттанлув хьуссар дунияллул чемпион ва 187 – Европанал чемпион. Микку хъунмасса кIану бугьлагьиссар республикалул Спортрал министерствалул.
Республикалул физкультуралул ва спортрал министр МахIаммад МахIам­мадовлул бувсунни Дагъусттаннал спортсментурал хьхьичIуннайшивурттая, миннал тренертурал дуллалисса давурттая. Яла министерствалул зузалтран ду­ллунни хIукуматрал ва ведомствалул наградартту. Муния махъ ккаккан дунни шадлугърал концерт.