«Гъази-Гъумучи» тIисса жяматийсса фондрал сипталийну, ЦIуссалакрал райондалул кабакьаврийну дачIи шинал хьхьичI хьуссия футболданул турнир «Лакку кIанттул Кубок».

Турнирданул агьаммур мурадну мунил сакиншинначитал ккак­лай бия лакрал шаннагу райондалул ва цайми миллатирттал дянив яхъанахъисса лакрал щархъал жагьилтал цачIунмай баву.Муний гьуртту хьуссия 40-нния лирчусса командартту. Ххув хьуссия Читтурдал команда.
Муния махъ «Кубок Лакии» хьуссия Москавлив, билаятрал хъуншагьрулий ялапар хъанахъи­сса лакрал жагьилтал цачIунмай баву мурадрай, 10 команда гьуртту хьу­сса турнирданий ххув хьу­ссия Хъусращиял команда.
Август зурул 20-нний дайдирхьунни турнир «Лига Лакии». Муния шинмай гьарца ххуллун кьини ЦIуссачIурттащиял школалул футболданул майданнив хьунабакьай­ссар 30 командалия сакин хьусса лакрал жагьилтал: Гъумучиял, Буршиял, Шахьуйннал, ЦIуссалакрал, Вихьуллал, ЦIуссаккуллал, Кьукуннал, Къяннал, Ххутрал, Хъусращиял, Дюкъуллал, Ялув ЧIатI­лухъиял, Ххюлуссуннал, КIу­лушацIрал, ДучIиннал, ЧIяй­ннал, Гьуйннал, КIундиннал, Бар­хъаллал, ЦIувкIуллал, Кку­л­лал, ТIулизуннал, Читтурдал, ЧIарттал, Уручуллал, Чу­кIуннал, ЦIуссачIурттащиял, ЧIур­ттащиял, Чапаевкаллал, Гьа­миящиял. Сайки 400-ннийн бивсса жагьилтал гьуртту хъанай бур бяст-ччалливу. Му бакъассагу, миннахлу бацIан букIлакIимигу хIисав барча, сайки 1000-ннийн бивсса лакрал жагьилтал цачIунмай буллай бур ва проектрал.
Проектрал каялувчи ур ТIули­зуннал шяравасса Аьлиев Исмяил. Ва цува ур хIакин. Дагъусттаннал медакадемия къуртал бувну зий ивкIун ур Москавлив. Тиха увкIун дачIи шин дурну дур Лакрал райондалул больницалий хирургну зий. ЦIанакул МахIачкъалалив ивзун, цала пишалийгу зий, Дагъусттаннал паччахIлугърал медицинский колледжравугу дарсру дихьлай ур. Жаваблувшиву хъуннасса даврий зий ухьурчагу, Исмяил гьурттуну ур жяматийсса иширттахагу.
«Жува лак укунмагу чан­сса буру. ЧIявуми дунияллийх кIама бивщуну, ватандалия ябувцун бур. Цайми районнай, цайми миллатирттал дянив ялапар хъанахъимигу лакрая ябувцун бур. Му бакъассагу, махъсса шиннардий, жунма чIалачIисса куццуй, жула жагьилтал хъяврин бансса, ххуттава буккан бан­сса сававртту чIяру хъанай дия. Лякъин багьлай бия ми сававрттан ххуллу кьукьинсса чаранну. Спортрал тIурча жагьилтал цачIунмайгу буллалиссар, миннаву дусшивугу цIакь дуллали­ссар, цIуллу-сагъшиврунгу мюнпатссар. Гьарца ххуллун кьини 9.00 ссятрая 18.00 ссят хьуннин 30 шяраваллил командалувусса жагьилтал, миннал тIуркIулух бурган букIлакIисса миннал гъан-маччами, дустал, гьалмахтал букIлай бур цала оьрчIащал. Хъун хъанахъимигу кувн­нащал кув кIул хъанахъиссар. Му ба­къасса, ва бяст-ччаллийн хIадур хьуншиврул, нюжмардий кIилва бухьурчагу, цивппагу хьунабакьлай бур шагьрулий. ЧIяруми командар­тту цачIун дурссар «Кубок Лакии» проект сакин байхту. Муниннин так цаппарасса шяраваллал дакъа командартту дакъая.
Уттинин хьунни 7 тур. Ва цалчинмур этапри. Хъинну бавкьуну, гьавас буну, бунияла хIадур хьуну буклай бур. Шанма тIуркIулува 10 хьхьичIунсса команда личIи дурну, буклантIиссар кIилчинмур этап­рай. Миннува шанна яла гужми дуккантIиссар финалданийн. ТIуркIурду лахъи лаганссар ноябрь зуруйннин», — буслай ур Исмяил Аьлиев.
Арулла турданул хIасиллайн бувну, хьхьичIунсса кIанттай дур Хъусращиял, Къяннал, ЦIуссаккуллал ва Шахьуйннал командартту – А группалуву; Бархъаллал, КIундиннал, Ххюлуссуннал командартту – В группалуву; ЦIуссачIурттащиял, ЧIарттал, Читтурдал, Уручуллал командартту – С группалуву.