Сентябрь зурул 3-нний щалагу Аьрасатнаву кIицI дувайссар «День солидарности в борьбе с терроризмом». Ва аьпалул кьини Аьрасатнаву цIакь дурссар 2005 шинал Ухссавнил АьсатIиннал Беслан агьрулий хьусса оьзрулия махъ. Тания шинмай, аьдатравун дагьсса куццуй, щала Аьрасатнаву цинявппагу дуккаврил идарарттаву шайссар терактирдаву ливтIуминнал аьпалун хас дур­сса мероприятияртту.

Гъумук

Хьунни мукунсса мероприятияртту Лакрал райондалул школарттайгу. Дирхьунни терроризмалиясса ва экстремизмалиясса нигьачIаврия бусласисса дарсру.
Райондалул администрациялул оьрчIащалсса ва жагьилтуращалсса даврил отделданул ва КIулшиву дулаврил управлениялул сакиншиндарайну, Аьра­сатнал МВД-лул «Лакский» МО-лул хIаятраву къуллугърал бурж биттур буллай оьрмулуцIа хьусса полицалул зузалтрал гьайкалданучIа хьунни аьпалул линейка. Муний гьуртту хьунни райондалул администрациялул терроризмалущал ва экстремизмалущал талатаврил отделданул каялувчи Щамххал Сайпуллаев, КIулшиву дулаврил управлениялул каялувчинал хъиривчу Соня Макаева, оьрчIащалсса ва жагьилтуращалсса даврил отделданул каялувчи МахIаммад Гадаев, полицалул зузалт ва дуклаки оьрчIру.
Соня Макаевал цила ихтилатраву дакIнийн бувтуна 12 шинал хьхьичI Беслан шагьрулий хьусса оьзру. «КIулшивурттал кьини кIицI ларгун хъирив­сса гьантрайва жува хьунадакьлай буру аьпалул кьини. Ва вахIшисса тIул дан террористурал язи дургьуну дия чаннасса байран – КIулшивурттал кьини.
2004 шинал сентябрьданул 1-мур кьини нитти-буттахъащал ххарину школалийн бувкIсса оьрчIру хаварвагу бакъанма боевиктурал ширишилун бувгьуну бивкIссар шанма гьантлий. 1128 инсаннава 350 ивкIуссар, миннавагу – 150-нния ливчусса оьрчIру», – увкуннп ванил.
«Обществалуву яла буру­къавччуми инсантал – оьрчIру, къартту-къужри ясир буллай, террористурал ккаккан буллай бур цала гуж, цивппа ссалчIав хьхьичI къабацIантIишиву. ПаччахIлугърайн къарши буклай, миннал мурад бур жямат гьулусан бансса. Чансса теракт­ру къархьунни жучIара Да­гъусттаннайгу – Къизлардай, Первомайскалий, Буйнакскалий, Каспийскалий. Мунийн бувну жунма цумацаннангу багьлай бур личIлулну бикIан. ХIакьину цалий къабавцIусса жагьилтурал аькьлу ясир буллалисса чIумал, хаснува террористурал ва экст­ремистурал чулуха, багьлай бур хъун хъанахъисса ник ватан ххирану тарбия даврих къулагъас хъунна дан», – ххи бунни Соня Макаевал.
Ихтилатру бувна Щамххал Сайпуллаевлул ва МахIаммад Гадаевлул. «Лакский» МО-лул зузала Диана Апразовал дакIнийн бивчуна экстремистурал канища ливтIусса низам дуруччай органнал зузалт.
Къуллугърал бурж биттур буллай оьрмурдацIа хьусса полицалул зузалтрал гьайкалданучIа дуклаки оьрчIал дирхьуна тIутIив.

Каспийскалий

2002 шинал май зурул 9-нний терактрал оьхIалсса ххутIахьхьун биривминнан­сса гьайкалданучIа хьунни Каспийск шагьрулул хъунимигу гьурттусса митинг. Шагьрулул краеведениялул музейраву оьрчIру хьунабавкьунни Аьра­сатнал Армиялул генерал-майор, Сибирнал аьрали округрал мотострелковая бригадалул командир Фарид Балалиевлущал.
ОьрчIал художествалул школалий мура темалун хас дурсса суратирттал выставка хьунни.
Шагьрулул библиотекарттайгу хьунни терроризмалул оьхIалшиву дащуй дихьлахьи­сса ихтилатру.

Ссихьрал театрдануву

Вара кьини Дагъусттаннал паччахIлугърал ссихьрал театрданул чIава тамашачитуран ккаккан бунни щак-щук бутлатисса затурдия мюхчанну бикIан лахьхьин буллали­сса спектакль «Азарийлчинмур варакъи». Спектакль ккаккан бунни театрданул хьхьичIсса майданнив. «Ва хIакьину жу ккаккан бувсса спектакльданул оьрчIан лахьхьин буллалиссар захIматшивурттая нигьакъабувсун, сивсуну яхъанан ва дусшиврул арарду цIакь дуллан», – увкунни кIицI лавгсса театрданул директор Аминат ЯхIияевал.

Дагъусттаннал музейрдаву

Вара кьини Терроризмалущалсса талатаврил кьинилун хас дурсса мероприятияртту хьунни Дагъусттаннал паччахIлугърал цачIунбув музейрал (ДГОМ) циняв филиаллай. Му кьинилун хасну музейрдал хIадур дурну дия цIусса экспозициярду, плакатру, буклетру-памяткарду, стендру ва видеороликру. Жагьилтуращал хьунабавкьунни антитеррористический комитетирттал, низам дуруччай структурардал сотрудниктал, Авгъаннал ва Чачаннал дяъвирдал ветерантал. МахIачкъалаллал аьрали славалул музейраву «Защитники Кавказа» тIисса выставка хьунни.

Дагъусттаннал университетраву

Дагъусттаннал паччахI­лугърал университетраву студентътуращал хьунабавкьунни ва кьини ректор Муртаза­аьли Рабаданов, МахIачкъалаллал мэрнал хъиривчу Сергей Цветков, МВД-лул сотрудник ВахIид Исрапилов, проректор Мадина МахIаммадова. Ректорнал цалва ихтилатраву бувсунни экстремизмалул идеологиялул щавщи цинявннайнгу биллай бушиврия, дурккусса, чантI кусса инсантал экстремизмалул иширттавух хIала къашайшиврия. Сергей Цветковлул бувсунни республикалий махъсса 7 зурул дянив хьусса иширттая, бувсунни низам дуруччай органнал зузалт оьрмурдацIа бансса кьасттирайсса 18 иш хьушиву 7 зурул лажиндарай. МВД-лул вакил ВахIид Исрапиловлул, тарихрал факультетрал декан Башир Булатовлул, Куратортурал советрал хъунмур Нина Гьаруновал ва цаймигу аьлим­турал ихтилатру бия жагьилтал экстремизмалул идеологиялия байщун буван аьркинни, хъяврин хьуну къаххуйсса иширттавух хIала хьуми бакIрай бацIан бувансса хху­ллурду, чаранну ккаклан аьркинни тIисса. Мукунсса иширттая архну бикIан маслихIат буллалисса ихтилатру ва кьини хьунни цаймигу учреждениярттаву.