Сентябрьданул 6-нний Къизлардай тIивтIунни «Республиканский казачий центр в Кизляре» ГБУ. Му даву хьунни аьрасатнал казачествалул чулухуннайсса 2020-ку шинайннинсса Аьрасатнал Федерациялул паччахIлугърал политика хьхьичIуннай даврил лагрулий.
Бадрижамал Аьлиева
Шадлугъравух гьуртту хьунни ДР-лул БакIчинал Ухссавнил территориал округрайсса полпред Владимир Деревянко, ДР-лул миллатрал политикалул министр Татьяна Гамалей, «город Кизляр» шагьрулул сакиншиндарал бакIчи Александр Шувалов, Къизлардал райондалул бакIчи Александр Погорелов, Тарумовскаллал райондалул бакIчи Александр Зимин, ДР-лул Миллатирттал политикалул Ухссавнил региондалул масъалартталсса байсса отделданул каялувчи Олег Артюхов, Къизлардал райондалул казактурал обществалул атаман Валентин Иванов ва чIявусса цаймигу.
Хъамал, цIакь хьусса аьдатрайн бувну, хьунабавкьунни ччатIуйну ва цIийну, Терский казачий хорданул щаллу буллалисса балайлухун.
Казактал, Къизлардал жямат ва хъамал барча буллай, Александр Шуваловлул кIицI лавгунни казачествалул Аьрасатнал паччахIлугърал ва Къизлар шагьрулул тарихраву бугьлагьишиву агьамсса кIану.
— 1990-ку шинал Аьрасатнаву, хасну Къизлардай, казачество цIулаган даву хьуссар политикалул ва культуралул агьамсса ишну. Аьрасатнал Президент Владимир Путиннул увкуна казачество хъанахъишиву аьрасатнал культуралул яргсса бутIану. Махъсса ппурттуву Дагъусттаннал БакIчи Рамазан АьбдуллатIиповлул ва ДР-лул ХIукуматрал казачествалущал дуллалисса даву тIайла дурну дур терский казачествалул авадансса тарих ва аьдатру дуруччаврийн, хьхьичIуннай дачин даврийн. ХIакьину тIитIлатIисса Республикалул казачий центргу хъанахъиссар мунил барашиннану, — увкунни ванал.
Шагьрулул бакIчинал ихтилатрайн бувну, казачествалул агьамми масъаларттуну хъанахъиссар казактурал щихачIав къалархьхьусса культура дуруччаву, махъа нанисса никираву казактурал авадансса ирсирачIансса ччаву тарбия даву, диннал ва миллатирттал дянивсса арарду цIакь даву, жагьилтал ватан ххирану тарбия баву.
Центр тIитIлатIисса ххарисса иширащал бавтIми барча буллалисса ихтилатру бунни Владимир Деревянкол, Татьяна Гамалейл, Валентин Ивановлул ва цайминнал.
ЯтIул лента кьувкьуну махъ, хъамаллуран дунни Центрданувухсса экскурсия.
Центрданул чIаравбацIаву дурну дур «Укрепление единства российской нации и этнокультурное развитие народов России» тIисса цIанилусса Федерал программалул лагрулий, мукунма «Государственная поддержка казачьих обществ в Республике Дагестан на 2015-2016 годы» тIисса Республикалул подпрограммалул лагрулий.
