МахIачкъалалив Къумукьнал театрдануву уттигъанну хьусса «Музыка за мир» проектравух гьуртту хьун республикалийн Аьрасатнал личIи-личIисса регионнаясса музыкантътал бувкIунни. Миннал Дагъусттаннал Симфонический оркестрданущал цачIу дуллунни хъуннасса концерт.
Сентябрьданул 10-нний му проектрал гьурттучитал бивунни Мурад Къажлаевлул цIанийсса школалийн. Микку Мария Немцова (дунияллул даражалийсса личIи-личIисса конкурсирттал лауреат, Москавуллал паччахIлугърал консерваториялул выпускница, Лондоннай аспирантура къуртал бувсса ва мува шагьрулийсса консерваториялуву ларайсса цIанин лайкь хьусса), Виталий Ватуля (дунияллул халкьуннал конкурсирттал лауреат, Санкт-Петербургуллал Музыкалул къатлул солист, Аьрасатнал ца яла хьхьичIунсса, перспективныйсса саксофонист) ва Артем Шишков (дунияллул халкьуннал конкурсирттал лауреат, миннувух паччахIщарсса Елизаветал конкурсралгу (Брюсселлай хьусса), прессалуву ванайн чIявуну «Белоруссиянал жагьилсса скрипачтуравасса язима» тIий бикIай чIявуну) хьунабавкьунни дуклаки оьрчIащал ва педагогтуращал.
Гьунар бусса музыкантътурал дуклаки оьрчIащал ва педагогтуращал кIибавчIунни даврил опыт, бунни миннан цаппарасса маслихIатру, мастер-классру. ЧIава музыкантътурал дунияллийх цIа лаглагисса жагьилсса музыкантътурахьхьун булунсса суаллугу къачансса бия.
«Музыка за мир» проектраягу ца-кIива махъ. Ва проектрал музыкалийхчIинну цачIун буллай бур личIи-личIисса диннал ва политикалул инсантал, 2010 шиная шиннай ва проектрал лагрулий дуллуну дур 150-нния лирчусса концертру ва мастер-классру, дяъвирдал, терроризмалул ва тIабиаьтрал катаклизмалул зараллу биян бувсса дунияллул 17 билаятрай, 50 шагьрулий.
«Музыка за мир» фондрал сиптачитал бур Мария Немцова ва Виталий Ватуля. Укун караматсса кьяйдалийну – инсантуран музыка пишкаш буллай, талай бур вай щалла дунияллийсса дакьаврихлу.
