Ларгсса нюжмардий ДР-лул строительствалул, архитектуралул ва ЖКХ-лул министр Ибрагьим Казибеков ивну ур Дарбантлив духсса къатрава халкь бизан бантIисса цIусса къатри дуллалисса кIанттурдайн.
З.АьбдурахIманова
Цала хъиривчунащал министрнал ххал бувунни №8 Пушкиннул, №29 Кобяковлул ва №2 Красногвардейскаллал кIичIирттаву дуллалисса къатри. Ибрагьим Казибековлул кIицI бувунни, цIуну дуллалисса къатри ккаккан дурсса чIумуйннин дузал къахъанахъишиву ва 2015-2016 шинайнсса къатри дуваврил график щаллу къахьунсса чIалай бушиву. Ва шинал ахирданийннин дурну, хIадур дан багьлай бивкIсса Красногвардейскаллал кIичIираву 8 зивулийсса къатри дувансса кIанай цIана дахьра ханнакьру дурккун, гьану бутIин хIадур хъанай бусса бур. Пушкиннул цIанийсса кIичIираву дуллалисса къатригу чIумуйннин дузал къахъанай бусса бур. Кобяковлул цIанийсса кIичIираву къатри дуллалисса давурттив дацIанна дурну дур. Ибрагьим Казибековлул хъуннасса аьй-бювкьу дурну дур Дарбантуллал каялувчитурай ва ишираву хьхьара дуллай тIий. Шаннагу объектрай ккаккан бувсса графикру щаллу къавхьуну бур. Министрнал маслихIат бувну бур Дарбантуллал каялувчитурахь цIусса къатравун бизан хIадур буллай бивкIсса халкь чIумуй яхъанансса къатрал хъирив буккан. Цанчирча, В.Путиннул 600 ХIукмулийн бувну ва шинал ахирданийннин хIукуматрал программа щаллу дан багьлай буну тIий.
ЦIана Дарбантлив 11 кIанай бусса бур цIусса къатри дуллай. И.Казибековлул вай циняр объектирдайнгу ивну, хъиривра цIусса амрурду ва бигарду бивхьусса батIаву дурну дур.
