Аьвдулкьадир НякIучиев,
ш. ЧукIун
Буттал чагъар
ГьантлучIа гьантта бихьлай,
Гьан дурна шинну ниттил.
ЩинчIав ккаккан къабувна
Буттал дяъвилул чагъар…
ДутIинмур макь руртIуссар,
ДухIанмур дард дурхIуссар,
Букки, ттул арс, баянну,
Аьрая буттал чагъар:
«КIирисса ссалам хьуннав,
Ттул аьзизсса кулпатрайн.
КIилчинмур кIири ссалам
Щала щарнил жяматрайн.
Бюхъай ва ттул оьрмулул,
Махъра-махъсса ссят дикIан,
ХIалли-хIаллих чан хъанай,
ХIал личIлай бакъар чурххай.
Махъва-махъсса гужирай,
Чичлай ура вай ххару
Биял хьунхьуви мутта
Учин ччимур чичинсса.
Арс, ттул вихь байсса миннат:
Ниттил кьадру буручча.
Ттаттал дакIнийн щун мабав,
Щарнин иялчуну хьу.
Барчаллагь, ттул аьзизмур,
Бакъар тти хIал ттул чурххай,
ШанмурцIу чагъар ккалай,
АьтIи ба тIутIул яру.
Буллан бивкIунни кувку,
Базу-базу бявкъуну,
Пардав дакьлан диркIунни
Ччаврил къабувччу иттах.
Утти оьрмулущал на
Навалу ливчIсса чIумал.
Ттул итталух занай бур
Жула жагьилсса оьрму…».
Муния тинмай махъру
Бия бавкку-шавккусса,
ХIарпру куннийн кув лахълай,
Лях личIлай бия махъру.
Кьалан кьувтIуну бия,
Чагъардай ттангъа дурну,
Хъиривмур ххуттал бакIрай
Цалуннасса аьш дия.
Дяъвилул ар хханссия
Чагъарданийсса чичру.
КьатIхьу тIутIив хханссия
Махъва-махъсса махъругу…
Жул ЧукIуннал пайханмар
ЧукIуннал пайханмар, да Жамалуттин,
Буллу Дагъусттаннал къавтIаврал паччахI,
Алвагьсса асардал аслан кайп увну,
КъавтIину зунттал рухI къавтIутIи дайма.
Чиллу-чухърал вивсса исвагьисса чурх,
Мусил щин дурк мухIлу, лялу ххаржантру
Зяр-зяр тIутIи дуллай лагмава къавтIий,
Ца-цаних палцI дуллай щяв дацIан дуллай.
КьуртIунни мяйлчинмур – халкь хIайран бунни,
АцIния кIилчинмур – гайннулла ялун.
Зизлазигу бувну цIарал пиягьру,
Лагма гьава бунни, лелуххул кунма.
Ва къиссу, ва тIащи, вагу вин чаргу,
Ва — цIикури найни дувай къавтIаву.
Гьарцагу къавтIаву – буттал аьрщарал,
Халкьуннал сипатрай абадлий лархъсса.
Явара, къавтIала – му инсан акъар,
Тирх кусса халкьуннал рухIри къавтIаву,
Халкьуннал ччаврил ва чувшиврул щатIир,
Щалиххан къашайсса, тамашалийсса.
Арулва пуркIу
АрулцIалва къушлия
Тти арулва ливчIун бур,
Элму дуккай ханалий
Арула оьрчI акъари.
МахIларду бухлавгун бур,
КIичIиртту чан хьуну бур,
Къужрал буцIайсса ккурчIа
Щала бачIва хьуну бур.
Шиннал хъирив шинну най,
Чан-чанну пуркIу лешлай,
Лакку ужагъирттая
Къабалланссар лакку чIу.
Цури микку тахсирлув,
Щийнни леххаву чайсса?
Лакку КIанттун чивчумур
Цанни муксса пашмансса?
Хъуннех чIири хьуссарив
ОьрчIний ттун дакIний бур
Ламу неххал ласай чIун:
Ламуривкьай лахъ бувсса,
Хъуннехрив чIири хьусса.
Ягу ттуннив чIивиний
Хъунну нех чIалай диркIсса,
Наварав хъунав хьусса,
Хъуннехрив чIири хьусса?
Ттул жегъир ххуллу
Най бури жегъир ххуллу
Ттул буттал шяравунмай,
УрчIах кьабивтун Кьуби,
Куях кьабивтун Ккурккул.
Сислай акъара ачин,
Ккуччу дан уртту-тIутIив,
Лахъну ссихI дуккан къашай –
Ущу-щулгъи къалихъан.
Най бури жегъир ххуллу,
Лабитлай дуламанттал.
БакIуя кьанив буклай,
Кьания бакIуйн лахълай.
Кьубиял дазуйн бивни,
КIибачIай жегъир ххуллу:
ЧIалан бикIай ЧIютI-БакIу,
РахIат буккай базурду.
БакI-хъачIавух, рахIавух
Гъирарай найгу бивкIун,
Буххай ттул жегъир ххуллу
Ххира буттал шяравун.
Сулайманова Аьйша,
ш. Урими
Арснал оьрчIаха
Къатлул чIирай мусил ссят,
Магъулу кIяла лампай,
КIяла ларзулу ххуй оьрчI –
Ва Муслиннул МаратикI.
Идавсил Аьлил хьурдай,
Вил урчIа чул ацIан ан,
Заннал Малаик хьурдай,
Вил шаттирай ша бизлан.
КIира щарнил виричуй,
Ххаллил нитти-буттал арс,
Увурдал ва Кьубиял
Аькьлулул кьулла хьунма.
Ттиркьюкьал ламу банну,
Жанграл тавхана банну,
Жул Маратлун буцай душ,
Мусих машан ласунну.
Мурадиран увсса арс,
Вин дуниял тIитIивуй,
Дунъяллия ларгукун,
Нагу дакIнийн дулути.
22. 08. 2016 шин
Арснал душ щар буллайни
Урттуву чурх бюхттулмур,
ТIутIаву ранг ххаллилмур,
Агь, ттул Марияннул-макь,
Караматирал тIутIий.
Насу, дадал, ххуллухъин,
Вил ххуллу тIутIал хьуннав,
Лавгний мина дакьиннав,
Тирххандарайн бияннав!
Аманат чанна зуруйн –
Мудан чаннайва битан.
Аманат ххяххабургъийн –
Бякъин тачIав къабитан.
ЧIивитIухьсса насихIат
Нитти-буттал дяниву
Ина хъунма хъананнав,
ЧIунархIал душвавраву
ДахIалай тIунсса хьуннав.
Уссил бакIрайсса кьяпа
Бюхттул бува хъиннува,
Аьзиз буттал дакIнивун
КIушиву мадутара.
ЧIивитIуй, ттул аманат,
Агьлулул гьайчали хьу,
Уссурссуннал дяниву
Хъар лахъай хъачIну бацIу.
Хамис Ссупиянова,
ш. Бархъал
Бакъа хьусса заманай
Щюлли гъигу ларгунни,
Ссутнил силгу диртунни,
Ттул пасихIсса ихтилат
Къухъна хъанан бивкIунни.
Уртту-тIутIи кьатI хьунни,
Мархри кьакьлан бивкIунни,
Магьилул ттул базурду
ХIура буклан бивкIунни.
Агь, заманай, заманай,
Ядигарсса заманай,
Ттул дакIгу аьтIи дурну,
Вайлул лавгсса заманай.
Лахъазаннугу лахъав
Лахъазаннугу лахъав,
Лахъи ххуллугу битав,
Луглай лявкъу талихIгу
БачIиххуллий кьабитав.
Щукру бургъил ва зурул
Ххуллу ссавруннайх бусса.
Зурул микIлачIун дурмур
Бургъил гъили дувайсса.
Щукру инагу, нагу
Ца аьрщарай лявхъусса,
Щукру цума-цаннангу
Ца гьав нясив дантIисса.
Щиндахху
Щиндахху ур щин дахлай,
Шанна къуруш хьун дуллай.
Амма щинал исттикан
Ххуйри щиндаххунияр.
Шанна къуруш – му цири,
Цуксса хIаллай дияйссар,
Щин, ина дакъахьурча,
Щища яхьун бюхъайссар.
Щиндаххул хIакъираву
Щил ци тIий ухьурчагу,
Щинал багьа арцуйну
Щищар бищун бюхъайсса.
Ххирар щиндаххун арцу,
Ххарину оьвтIун икIай.
Амма щинал исттикан
Ххуйри щиндаххунияр.
МакIрасса дуаь
Алжаннул къапулул
Лагма-ялттусса
ХIурулъэнтуращал
МакIра гъалгъа тIий,
Замзамирал щинал
Къукъу бувцIуну,
Заннаха дуаьлий
Чак буллай бияв…
«Илчилуха»
Лакку маз лахьхьин ччарча,
Уртакь хьу «Илчилущал»,
Мунил дакъасса, вил дакI
РахIат къадантIиссарча.
ЦIусса-бухсса хаварду
БусантIиссар «Илчилул»,
Чилгу, вилгу буруккин
Вихь кIи-шан бачIинтIиссар.
Архма гъан увантIиссар,
Гъанма мачча антIиссар,
Ччаланна тIий нанима
Ччаврил ассан антIиссар.
Гьарцагу нюжмар кьини,
Ца гъансса чувнах кунма,
Ялугьлай жу буссару
Ялун «Илчи» бучIаннин.
