ЦIуцIаву ялун дирукун, цIул­­лушиву зана дан захIмат­ссар, ца-ца чIумал дурагу зана дан къашайссар. Мунияту инсан цува цIуцIавурттая урувччуну личIаншиврул хъунмасса ургъил бан аьркинссар цIуцIаву къадиян­сса профилактикалул давурттах.

Т. ХIажиева
Ххал барча, цичIав дан къашай­сса, захIматсса зат дакъар микку.
— Дайдишияра кIюрх щинал стакандалия. Цинявннан кIулну бур кIюрххил дачIра ххюттуйн стакан щара лархъсса дюхлулсса щинал хIачIан аьркиншиву, амма уттигу хьунабакьай муния къарязиссагу. Укунсса щинал хъун ххютту ххуйну зузи дайссар, кьавс къахьунтIиссар, лякьа къалахълантIиссар.
-ХIачIлачIияра уттубишин хьхьичI тартнакIлил (кефирданул) стакангу.
Ккаши ххиен бантIиссар, чурх исвагьи хьунтIиссар, яла-яла ххю­ттука хIадурну дикIантIиссар гьун­ттийсса дукра кьамул дан, такIуй кьавс къахьунтIиссару.
— Вилаглагияра кьацI зайтундалул (оливковый) аьгъушиврий. Ва чIирисса процедуралул цимивагу масъала щаллу буллалиссар: дукра лялиян дан кумаг хьунтIиссар, кьакьари кIукIлу хьунтIиссар, хьхьувайния кIюрххилнин цачIун хьу­сса мик­робру литIайссар, ккарччал синтту ххуй дайссар. Так кьацI вилаган аьркинссар ккарччив шюшайхту. Ца дукралул къуса зайтундалул аьгъу­шиврул гьассар гужну кьацI вилаган, вилаглагияра (15 мин) аьгъушиву щинайн дукканцIа. ДакIний битияра, цукунчIав вай нагь дюкьан къабучIиссар, экьи дутIингу аьркинссар хIажатханттувун.
Агарда зу кьавс хьуну, цукунчIав кьатIув буккан хъанай бакъахьурча, хIачIияра касторовое масло. Гьай-гьай, гьарца кьини вай ишла дуллан къабучIиссар, нюжмардий 1-2 бучIиссар ва муния цукунчIавсса заралгу бакъассар. 2 хъунна къуса цал архIал хIачIан бучIиссар, амма гайннул тIин зун ххуй бизантIишиву къакIулли.
— ХIачIлачIияра зулла организм цIакь дайсса сок. Чичин ччай бур, хъинну бигьану дайсса, амма хайр хъунмасса, мякьгу лиххан бай­сса, иммунная системагу цIакь дай­сса сокрал рецепт. Байбишияра хIакьинува, ссут дайдишиннин.
Блендердануву мюрш дувара ца къур, ца касак имбирьданул (кIяла жавж) мархлул, ца дянивсса гьивч. ХIачIияра сок ахттайннин, кIира нюжмардий.
— Канакияра ччя-ччяни гьивч, нисварти, сельдерей. БучIиссар вай продукты канан личIи-личIину, бучIиссар, карчI къадурну, блендерданувух дуккан дангу. Укун­сса ахъул­ссаннул ва ахънилссаннул «масса» хъанахъиссар онкология (рак) къхьунсса яла гужмур халкьуннал дарувну. Ванил оьттуву холестерин цила кьяйдалий битай­ссар, бакIравунсса къювурду лагь дайссар.
— Канакияра клюква. Клюквалувури витаминнал мяъданвагу бусса. Ванил давление, къюкI цила нирхираву дитайссар , оьккимур холестерин буккан байссар, ракрал клеткарду гьарза хьун къабитайссар.