Госавтоинспекциялул баян буллай бур гъинтнил каникуллу къуртал хьуну, дуккаврил шин дайдихьлахьисса ппурттуву гьарза хъанай бушиву ххуллурдай машинартту сававну оьрчIан апатIру хьусса ишру.
И. Саидова
Август зурул 24-нния сентябрь зурул 14-ннийн бияннин республикалий байбивхьунни «Внимание – дети» тIисса операциялул кIилчинмур этап. Инспектортал чялиш бувккун занай бур школарттал лагма-ялттусса кучардайх, буллай бур оьрчIащал профилактикалул ихтилатру.
Ва акциялул агьаммур мурад хъанай бур ххуллурдай оьрчIан апатIру хьун къабитаву, ДТП-рду къашаву.
Гьашинусса шинал МахIачкъалалив хьуну дур оьрчIру хIаласса 26 ДТП, 1 оьрчI оьрмулуцIа хьуну ур. Ларгсса шинах бурувгун гьашинусса шинал оьрчIру хIалану хьусса апатIру чан хьуну бур. ОГИБДД-лул зузалт шофертурая ва ххуллурду лахълахъиминная тIалав буллай бур ххуллурдай низам дуруччаву ва ххишала бакъа личIлулну бикIаву.
ДР-лийсса УГИБДД УМВД-лул пропагандалул хъунама инспектор Мурад Жяъпаровлул бувсунни «Внимание – дети» операциялул лагрулуву цIудуккан дуршиву оьрчIру школарттайн нанисса кIанттурдайсса ххуллул лишанну. Му бакъассагу, шофертуращал ва нитти-буттащал буллай бур машинарттал ххуллурдай низам дуруччаву ва оьрчIру мюхчан баву тIалав буллалисса ихтилатру.
Ихтиярду дуруччай органну агьалиная тIалав буллай бур хаснува сентябрьданул 1-2-сса гьантрай машинарттал ххуллурдай личIлулну бикIаву. Нитти-буттангу, цалва оьрчIру ххуллурдайсса апатIирттая буруччаву мурадрай, аьркинссар оьрчIан машиналул ххуллурду лахъан лахьхьин буллан.
