«Дагъусттан» РИА-лий «Открытая власть» проектрал лагрулий хьунни ДР-лул миллатрал политикалул министр Татьяна Гамалейл пресс-конференция.
Бадрижамал Аьлиева
Цила ихтилатраву Татьяна Владимировнал кIицI лавгунни махъсса шиннардий ДР-лул Миллатрал политикалул министерствалул даву чялиш дуркшиву.
— Жулва билаятрай бувчIлан бивкIунни паччахIлугъ цIакь давриву миллатирттал масъалартту щаллу баврил цуксса хъуннасса агьамшиву дуссарив. 2012 шиная шинмай зун бивкIунни доктринал документру, цалгу ва ххуллийсса даву чIалачIи дурсса. Мугу, хьхьичIва-хьхьичI, Аьрасатнал Федерациялул паччахIлугърал миллатрал 2025 шинайнсса политикалул Стратегияр, му Стратегия щаллу баврил планни, миннуяр хьхьичI бувксса АьФ-лул Президент Владимир Путиннул программалул статьярдур. ХIадур дурну дуссар федерал целевой программа «Укрепление единства российской нации и этнокультурное развитие народов России (2014 – 2020 г.г.)», АьФ-лул ПрезидентначIа сакин бувссар Миллатирттал дянивсса арардал совет, ва, ахиргу, сакин бувссар Миллатирттал иширтталсса байсса Федерал агентство, — бувсунни министрнал.
— Аьрасатнал миллат – му, хьхьичIва-хьхьичI, цинявппагу цачIун шавур, амма щала Аьрасатнал цашиву цIакь дуллалаврищал жува зун аьркинссару Аьрасатнал Федерациялул гьарцагу миллатраща цила маз ва культура, цила щихачIав къалащаву ядуван бюхъавриха, — увкунни Т. Гамалейл.
Бувсунни Миллатирттал политикалул министерствалул щаллу дуллалисса проектирдая: «Куначество», «Как живешь, сосед?», «Дагестанцы в судьбе России», «Колыбельные народов Дагестана» ва цаймигу.
Гихунмай министрнал бувсунни дазул кьатIувсса дагъусттанлувтуращалсса дахIаву цIакь даву мурадрай ДР-лул Миллатирттал политикалул министерствалул дуллалисса давурттаягу. Му ишираву хъунмасса кумаг буллай бур ватанлувтуращалсса дахIавуртталсса буллалисса Дагъусттаннал «Ватан» ассоциациялул.
Регионнал дянивсса уртакьшиврийсса зузаврил дахIавуртту цIакь даврия тIий, Татьяна Гамалейл бувсунни республикалул вакилханарду зий бушиву Аьрасатнал 3 региондалий: Краснодардал ва Ставрополлал крайрдай, Санкт-Петербурграй. Бувсунни мукунма 40 региондалий Дагъусттаннал вакилханарду зий бушиву жяматийсса даву хIисаврай.
Дагъусттанлувтал цала тарихийсса ватандалия хьхьичIва-хьхьичI даврил хъирив нанишиву кIицI лаглай, министрнал увкунни:
— Ми най бур зузи кару диял къахъанахъисса регионнайн, бувсса захIматрахлу цанма лайкьсса, кулпатру бакI буккан буван бюхъансса харжру бикIантIисса кIанттурдайн. Мунищала архIал, дагъусттанлувтуран ччай бакъар цала мархращалсса, аьдатирттащалсса, багьу-бизулущалсса дахIаву дурцун. Мунияту регионнай сакин буллалиссар культуралул центрду, миннувух – кIантту-кIанттурдайсса къуллугъирттал, каялувшиндарал кумаграйнугу. Жул масъалагу – Дагъусттаннал ва Аьрасатнал регионнал дянивсса дахIавуртту цIакь давур…
Гихунмай ванил бувцунни мукунсса уртакьшиврийсса зузаврил мисаллу.
Яла министрнал бувсунни цила каялувшиву дуллалисса ведомствалул граждан обществалул институтирттащал цачIусса зузаврия.
Жяматийсса организациярттал ца журану хъанай дур миллатирттал культуралул автономияртту. Бувсунни министерство хьхьичIунну зий бушиву Сириянал, Гуржиял, Азирбижаннал, УзбакIнал, Армяннал ва цаймигу диаспорардал вакилтуращал.
— Жул министерствалул масъала – Дагъусттаннай ялапар хъанахъисса цинявппагу миллатирттал инсантурал оьрмулул рахIатшивур, — увкунни ванил.
Ахирданий Татьяна Владимировнал журналистурал суаллахьхьун балжисса жавабру дуллунни.
