Вай кIира нюжмардул дянив республикалий «Жулла партия – Дагъусттанни» тIисса цIанилусса агитдесантътурал кьюкьри къадирсса сайки район, шагьру къаливчIунни.
Сентябрьданул 11-нний Дарбантуллал, ЦIуссалакрал ва Ахъушиял районнайн аьрххилий бувксса агитдесантътурал кьюкьрайгу бия цинявн­нал ялув бивхьусса ца аьмсса мурад – ва зурул18-нний билаятрай хьунтIисса бувчIавурттавух чялишну гьуртту хьун жяматирттайн оьвчаву ва демократиялул кьануннайн бувну гьарцагу аьрасатлувнал цала чIу цала дакIнин кьамулсса партиялухлу, кандидатнахлу булун ихтияр душиврия бусансса.

З. АьбдурахIманова
Ва кьини Ахъушиял райондалий нанисса жул кьюкьлуву бия ДР-лул Минпечатьрал пишакартал, Да­гъусттаннал халкьуннал шаэр Аминат Аьбдулманапова, республикалул цаппара кказит-журналлал хъуними редактортал ва журналистътал. Агьаммур мурадрацIун, лакрал «Илчи» кказитрал чулуха­сса ттулмур мурадгу бия ва райондалий бусравну буттал буттахъая шинмай нахIу-хIалану, ца кулпат кунма яхъанахъисса Бархъаллал, Хъюллал, Уручуллал ва ЦIуликъяннал жяматирттал чулухасса вакилтуращал хьунабакьин, бувчIавурттал хIакъиравусса вайннал пикри-зикрирдах вичIидишин. Ахъушиял райондалул Культуралул центрданул хъунмур залданувун бавтIун бия жямат, бувчIавурттавух гьур­ттусса партиярттал кандидатътал, райондалул бусравсса хъунисриннал чулухасса вакилтал ва жагьи-жугьулт. БатIаву тIитIлай, райондалул бакIчи АхIмад МахIарамовлул цалчинма-цалчин кIицI лавгунни ялун нанисса бувчIавуртту райондалий хьун аьркиншиву тIайласса ва марцIсса, цукунчIавсса къача-къучшивуртту къархьуну, кьамул дурсса закондалул ххуллий. Бувсунни махъсса шиннардий райондалий дурсса хъуни-хъунисса давурттая, халкьуннан хьусса къулайшиннардия ва дахханашивурттая.
— ХIакьину жучIанма бувкIун бур «Наша партия – Дагестан» цIанилусса вакилтал – агитдесант. БувчIавурттал хьунийн­сса ва ххуйсса даврил сиптачигу ур Республикалул БакIчи Рамазан АьбдуллатIипов. Жула цинявнналагу ца аьмсса буржри ялун нани­сса бувчIавуртту лахъсса даражалий тIайла дуккаву. Регионнайсса партиярттал каялувчитуралгу, цала дянив икьралгу дурну, кьутIи цIакь дурссар бувчIавуртту Дагъусттаннай марцIну ва тIайлану дансса хIарачат банну тIисса.
Жу, районнал каялувчитал­гу, буржлувну бивкIру вай бувчIавурттавух гьурттусса гьарцагу кандидатнал чIу баянсса, халкьуннащал хьунабакьинсса шартIру хIасул дувавриву, — увкунни ванал.
Бувсунни ванал мукунма, бувчIавурттал кьини гьарца­гу участокрай шадсса тагьар дикIантIишиву ва нантIишиву халкьуннал дакIру тяхъа дуллансса чIири-хъунсса концертру.
Мукунма шикку махъру лавхъунни личIи-личIисса партияр­ттал чулуха ДР-лул Халкьуннал Мажлисравунсса депутатшиврийнсса кандидатътурал, райондалул цаппара школардал директортурал, рес­публикалул оьрус мазрайсса изданиярттал Ассоциациялул хъунама Садикь Кьасимовлул, Аминат Аьбдулманаповал ва цайминнал. Цалва-цалва ихтилатирттаву вайннал оьвчаву дурунни, бувчIавурттавух гьуртту хьуну, цала дакIнин кьамулсса кандидатътурахлу чIурду булун. Ихтилатирттая махъ Культуралул центрданул сахIналий хъамаллуран ва жяматран ккаккан дурунни ххуй­сса концерт ва ахирданий Ахъушиял райондалул гимн щаллу дуваврийну батIаву ларкьунни.
Райондалий хьун нанисса хъуннасса давриву цала жямат­ралгу чялишсса гьурттушинна дувантIишиврия бувсунни ва батIаврий гьуртту хьусса Хъюллал жяматийсса советрал хъунама Закаржа Закаржаевлул, советрал вакилтал МахIаммад МахIаммадовлул ва Басир Исрапиловлул.
— Умуд бур ялун нанисса був­чIавурттаву жул Хъюллал жямат­рал, гьурттугу хьуну, цана лайкьсса, цала вихшала дирхьусса депутат увчIинссар тIисса. Ттинин жула билаятрай, республикалий хъанай диркIсса бувчIавурттах бурувгун, гьашинуми бувчIавуртту тIайласса, марцIсса хьуншиврийн мукIруну ура. ЦIана халкь, общество чантI кусса кунма, щялумур ва хIакьмур цанния ца личIи буллали хьуну бур. Шиная шинайн халкьуннаву рес­публикалул, билаятрал хъуниминнайнсса вихшала цIакь хъанай дур. Чан-чанну дунугу, ххуй чулиннай­сса тагьар даххана хъанай дур, – кунни Закаржа Закаржаевлул.
Хьунабакьаврил ахирданий цинявннал цачIусса суратгу рирщуну, личIи-личIисса асардащал жу зана хьуру МахIачкъалалив.