Гъазинал арс Аьлиханов АьвдурахIман
Уттигъанну оьрмулул 91 шинаву ахиратрал хьунни ххаллилсса зунтталчу, яхI-къириятрал увччусса гьалмахчу, хъунмасса кулпатрал ппу, дяъвилул ва захIматрал ветеран, Гъазинал арс Аьлиханов АьвдурахIман.
АьвдурахIман увссар 1926-ку шинал Хъурхърал шяраву.
Ванал бивтссар лахъисса оьрмулул ва захIматрал ххуллу. Колхозрал колхозникшивруя айивхьуну, зий ивкIссар сайки 60 шинал мутталий личIи-личIисса жаваб дулайсса давурттай: Хъурхърал шяраваллил советрал секретарьну, председательну, Ждановлул цIанийсса колхозрал председательну, РАЙПО-рал хъунаманал хъиривчуну, банкрай, райкомрал инструкторну. Лакрал райондалул «Заря» кказитрал зузалану ва тамансса цаймигу чIявучин мюнпатсса давурттай.
АьвдурахIман лайкь хьуссар цикссагу бахшишру, барчаллагьру ласун. АьвдурахIманнун дуллуссар «Китайнал ва Совет ХIукуматрал дусшиврул юбилейрал медальгу. Дур цаймигу медаллу ва лишанну. Ва ур Кореянавусса дяъвилул ветерангу.
Чялишну хIала уххайссия АьвдурахIмангу жяматрал ва политикалул иширттавух, ххирассия «Илчи» ва лакрал радиогу.
Гъазинал арс АьвдурахIман жуятува личIи шаврил кьурчIишиву кIидачIлай, жижара буллай буру ванал оьрчIахь, оьрчIал оьрчIахь, гъан-маччаминнахь. Ванаяр чIивину дунияллия гьансса къабукканнав, оьрмурдай барачат бишиннав.
АьвдурахIманнулгу бунагьирттал аьпа баннав, рухI хъинний дишиннав!
Хъурхърал жямат,
дустал, гьалмахтал
Сулайманнул душ Оьмаева Ххадижат
Уттигъанну оьрмулул 73 шинаву оьсса цIуцIаву ялун дирну, аьпалухьхьун лавгунни Бархъаллал шяравасса, чIявучин бусравсса, ххаллилсса педагог, дуклаки оьрчIачIагу, миннал нитти-буттачIагу хъунмасса хIурматрай бивкIсса цIа ларайсса учитель, РСФСР-данул Халкьуннал просвещениялул отличник, захIматрал ветеран, дакI-аьмал хъинсса хъамитайпа Оьмаева Ххадижат.
Бувну бур Ххадижат Бархъаллал шяраву. Школа бувккуну махъ, бувххун бур пединститутрал математикалул факультетрайн. Га къуртал байхту, цаппара шиннардий даргиял шяравугу зий бивкIун, махъунмай бувкIун, Бархъалав зий бивкIссар математикалул дарсру дихьлай 49 шинай. Грамотнайсса педагог бушаврицIун, бархъаллал хъаннил цалава пиша — тIахIунттив давугу, хъиннура кIула. Школданий мюрщи оьрчIан тIахIунтту-игрушкарду дайсса кружокгу Ххадижатлул дачин дурну бикIайва. Ванилгу, оьрчIалгу дурсса тIахIунттул эмаратру Москавлив дияннин ларгссар, лайкь хьуссар ВДНХ-лул чарвитул (бронзалул) медальданунгу.
Ххадижат бия ххаллилсса нинугу, кулпатгу, гъан-маччанал чул бищай кIанугу, цинявннал кумагчигу. ХIайп, лавгунни жул ххаллилсса Ххадижат!
Ва бивкIулул хъуннасса кьурчIишивугу кIидачIлай, жижара буллай буру ласнахь, арсваврахь, душнихь, гъан-маччанахь, агьлу-авладрахь, цинявннахьвагу.
Цил гьав нурданул дуцIиннав, Алжаннул ххари баннав. Махънал оьрмурдай барачат бишиннав. Амин.
Бархъаллал жямат
СалихIлул арс Сулайманов ЖахIпар
Кьурбан-байрандалул гьантрай оьрмулул 89 шинаву, цIуцIи шанийгу лахъи къалавгун, аьпалухьхьун лавгунни Ваччиял шяравасса СалихIлул ва Написатлул арс Сулайманов ЖахIпар.
Увну ур ЖахIпар 1927 шинал Ваччиял шяраву.
Дурагу кIира шинаву ЖахIпар хьуну ур ниттицIа. Хъуна увну ур гъан-маччаминнал, цал — Ваччав, яла — Бакуй. АцIния цара шин хьусса чIумал, тарбия ан уллуну ивкIун ур В.Ф. Кузмина тIисса нянахьхьун. 1943 шинал, Бакуй 10 классгу къуртал бувну, увкIун ур буттал шяравун, кIикку зий ивкIун ур нагь-нис дайсса кIанттай технологну. 1948 шинал цIунилгу зана хьуну ур Бакуйн. Увххун ур Бакуйннал университетрал юридический факультетрайн. Амма, ичIаллил тагьар сававну, дуккавугу къуртал къадурнура, гьан багьну бур 4-мур курсирая.
Ахиргу ивзун ур МахIачкъалалив. Зий ивкIун ур шикку личIи-личIисса машлул идарарттай, каялувшиврул давурттай – Дагъпотребсоюзрал ва Машлул министерствалул.
ЖахIпардул хIалал дурссар «Совет потребкооперациялул отличник» ва «ДР-лул машлул лайкь хьусса зузала» тIисса бусравсса цIарду.
ЖахIпар мудангу чялишну гьуртту шайссия цалла шяраваллил жяматрайн багьайсса цинявппагу иширттавух. Мунал сиптталийн бувну Ваччав дацIан дурссар лакрал хъунасса арс Гьарун Саэдовлун цIа кусса гьайкал, чирчуссар Гьаруннуясса макьалартту. Хъунмасса хIаллай ЖахIпар зий уссия Ваччиял жяматрал ккурандалул председательнугу.
ЖахIпардул бивкIулул хъуннасса кьурчIишивугу кIидачIлай, жижара буллай буру душваврахь, уссихь, кIивагу ссихь, гъан-маччанахь ва махъсса щалагу агьлу-авладрахь,
Махъминнал оьрмулий барачат бишиннав, ванаяр чIивину цучIав ахиратрал къахьуннав.
ЖахIпардул дакIний-мазрай бивкIмур иширайну бартбигьинсса цIуллушиву дулуннав.
Цал бунагьирттал аьпа баннав, рухI хъинний дишиннав.
Ваччиял жямат
Исял душ МахIаммадова БатIи
Ссут дайдихьулул гьантрай аьпалувух бивхьунни, шяраваллил жяматран бакъассагу, чил миллатирттал инсантурангу бусравсса, хIурмат лавайсса, яхI-къириятрал бувцIусса хъамитайпа Исял душ МахIаммадова БатIи.
БатIи бувссар Бархъаллал шяраву 1937 шинал. Школагу къуртал бувну цила язи увгьусса, учительну зузисса, Абакардущал архIал, га чун тIайла увкрив, гиккун лагайсса бивкIссар. Мукун БатIи кIулну бивкIссар яруссаннал, даргиял шяраваллал агьулданунгу ххишала бакъа хIал бавкьусса инсанну.
1972 шиная шихунмай, Бархъалав зана хьуну махъ, зий бивкIссар Бархъаллал школданул оьрчIан дукра дувайсса буфетрай. ОьрчIангу кIул хьуну, хIурматрайгу бивкIссар, дакIнийгу буссар цила дакI хъиншиврийну, хъунаначIан, чIивиначIансса хIурматрайну.
БатIи аьпалувух бивхьусса хъуннасса кьурчIишивугу кIидачIлай, жижара буллай буру душварахь Гулисттаннухь, Жаннахь, Ххажихь, Ххадижатлухь ва вайнная бивзсса наслулухь, щалвагу агьлу-авладрахь.
БатIил рухI чаннаний, чурх кIукIлуний хьуннав, Алжаннул ххари баннав. Махънал оьрмурдай барачат бишиннав. Амин!
Бархъаллал жяматрал
цIания Заза
ХIабибуллагьлул арс Мусаев Рамазан
Вай гьантрай жагьилсса оьрмулуву дунияллия лавгунни Гъумучиял шяравасса ХIабибуллагьлул арс Мусаев Рамазан.
Увну ур Рамазан 1949 шинал, апрель зурул 14-нний Гъумучиял шяраву. Рамазан уссия дакI хъинсса, аьмал-хIал бавкьусса инсан.
Ванан дазу-зума дакъа ххирая цала кулпат, оьрчIру. ТачIавгу лахъсса чIуний ихтилат къабайссия я кулпатравуминнащал, я кьатIувминнащал.
Рамазан оьрмулия щалихханнин къаивтун аьпалул шаврил кьурчIишиву кIидачIлай, жижара буллай буру ванал кулпатрахь, оьрчIахь, уссурваврахь ва махъсса гъан-маччанахь.
Имандалий лавгун лякъиннав, рухI алжаннул ххари даннав. Ванан къабуллусса оьрму ванал оьрчIан булуннав.
Дустал, гъан-маччами
