КЬУБИЛ АРС КЬУБИЕВ РАМАЗАН
Сентябрьданул 10-нний мукьцIал лахълай бур оьрмулул сайки 90 шинаву жуятува личIи хьусса, хъунмур оьрму учительну гьан бувсса, Хъун дяъвилул ва захIматрал ветеран, хъунма­сса кулпатрал бакIчи — ппу, дакI хъинсса, хIалимсса инсан, шяравучу, щархъайгу дустал, гьалмахтал чIявусса ххаллилсса чув, Ккуллал шяраватусса Кьубиев Рамазан Кьубил арс ахиратравун лавгун.
Рамазан увссар 1926 шинал Ккуллал шяраву, Кьубил ва Жавгьардул кулпатраву. Бу­ттал шяраву 7 классгу бувккуну, дяъвилул шиннардий учительтал биял къахъанай, 9 зуруйсса курсругу бувккуну, учительну, хъунама пионер вожатыйну зий, ивкIссар. Хъиривгу цIунилгу дуклан увххун, 1948 шинал къуртал бувссар Гъумуксса педучилище.
Муния махъ, цал байбихьулул классирттал учительну, хъирив, хасъсса курсругу къуртал бувну, захIматрал дарсру дихьлай, зий уссия пенсиялийн укка­н­нин. Хъинну бусравну ­уссия Рамазан учительтурал, дуклаки оьрчIал ва миннал нитти-буттахъал дянив. Рамазан школалий ва мунил кьатIув дуллалисса давурттавухгу чялишну гьуртту шайссия. Каникуллал чIунгума оьрчIащал пионертурал лагерьданий, шяравусса колхозраву зий гьан дайссия.
ДакI марцIну захIмат баврихлу Рамазан лайкь хьуссар чIярусса бахшиширттан. Ванан дуллуссар республикалул «Отличник народного просвещения» тIисса бусравсса цIа, «ЗахIматрал ветеран» тIисса ва цаймигу лишанну ва медаллу.
Рамазан жуятува личIи шаврил кьурчIишиву кIидачIлай буру ванал арсурварахь, гъан-маччаминнахь, дустурахь. Махъминнал оьрмурдай барачат бишиннав, ванаяр чIивину цучIав ахиратрал къахьуннав, ванал дакIний-мазрай бивкIмур иширайну щаллу буллан цIуллушиву дулуннав.
Рамазаннулгу бунагьирттал аьпа баннав, рухI хъинний дишиннав.
Дустурал цIания
МахIаммад Кьурбанов,
Гьарун ХIасанов ва цаймигу

ИБРАГЬИМ-ХАЛИЛЛУЛ АРС КЬУРБАНАЬЛИЕВ МАХIАЧ
Кьурван-байрандалул гьант­рай, оьрмулул 82 шинаву, къашавайгу къавхьуну, хархавар бакъа дунияллия лавгунни хха­ллилсса лаккучу, цIанихсса бу­ттал Ибрагьимхалиллул арс МахIач Кьурбанаьлиев.

МахIач увну ур 1934 шинал 19-мур августрай ГьунчIукьатIрал шяраву къуллугъчинал кулпат­раву. МахIачлул 10 класс къуртал бувну бур Кисловодскалий. Увххун ур дуклан Армавир шагьрулийсса дяъвилул истребителлал летчиктал хIадур бувай­сса училищалувун. Мугу ххуйну къуртал бувну, лехлай ивкIун ур истребителлай. Цаппара шиннава комиссиялул яруннил чаннал диялдакъашиву ляркъуну, хъунама лейтенантнал чиндалува МахIач комиссоват увну ур граждан авиациялуву зун.
Волгоградрай строительный институтгу къуртал бувну, зий уссия стройкарттай. Чув зий ухьурчангу МахIачлул дакI ссавнийн кIункIу тIий дикIайва. Ва ия мяйжаннугусса зунттал барзу. Хасиятгу буттал кунна кьянкьасса, дустал ххирасса зунттал хасиятрал чув ия. МахIачлул оьр­мулуву кIилва кулпат бувну, цалчинмур ташулия арс ва душ бур, кIилчинмур ташулиягу арс хьуну ур. Ванал оьрчIру ххишала бакъа итххявхсса бур, хаснува хъунама арс Тимур.
МахIачлул цува зузисса къуллугъ буллалисса давурттай дур­сса хьхьичIуннайшивурттах мадарасса хIурматрал грамотартту, барчаллагьру лавсун бур.
МахIачлул бивкIулул кьурчIи­шиву кIидачIлай, жижара буллай буру ванал арсурваврахь Тимурдухь, Тамерланнухь, душнихь, ссийхь Асиятлухь, цинявппагу гъан-маччанахь. Цал бунагьир­ттал аьпа баннав, рухI хъинний дишиннав. Ванан бакъамур ванал оьрчIан, махънан булуннав.
ГьунчIукьатIрал ккурандалул чулуха Амин Аьбдуллаев