Дарбантуллал шагьрулул 2-мур музыкалул школалийн ва ОьрчIал ва чIаважагьилтурал творчествалул дворецравун заназисса Айгюн Абасова Дагъусттаннал чулуха гьуртту хьун най бур билаятрал балай учаврил яла машгьурмур «Голос. Дети» конкурсрай.

Бадрижамал Аьлиева
Айгюн бувккун бур музыкалул бяст-ччаллал кIилчинмур этапрайн. Хъиривмур этапну хьун най дур «слепые прослушивания».
Айгюн Абасова ялапар хъанай бур Дарбант шагьрулий. Уттинин цимилгу гьуртту хьуну бур шагьрулул ва республикалул лагрурдайсса конкурсирттай, цимилгу ххув хьунугу бур. Уттигъанну хьусса респуб­ликалул лагрулийсса «Юные звезды Махачкалы» ва «Соловушка» конкурсирттай ванил бувгьуну бур цалчинсса кIанттурду.
ЦIанарив ва чялишну хIадур хъанай бур цила уттининсса оьр­мулувусса агьаммур конкурсрайн.
– На хIарачат буванна ххув хьунсса, амма тIайлабацIу къахьурча, на хъювусул къабуккантIиссара, гихунмайгу ттулва ялув нава зий, ялагу-ялагу хIарачат бувантIиссар ххув хьунсса, – тIий бур ва.
Ванихлу бур нину-ппу, гъанчу ва педагогтал.
– Айгюн жучIа цинявннан кIулссар гьунар бусса, хьхьи­чIунсса душну, му дуклайгу ххуйну бур, школалул сайки гьарцагу концертрайгу хьхьичIунсса гьурттушинна дувайссар. Му бакъассагу, сентябрьданул 9-нний Айгюн гьур­тту хьунтIиссар опералул балайчи Юлия Погосова-ЭмирхIамзаевал «Нарин-Къа­лалий» ккаккан ду­ван­тIисса концертрай.
Жу Айгюннуя пахрулий бусса­ру. ЧIа тIий буру мунин тIай­лабацIу, ва умур бур му Цалчинмур каналданий ккаккан­ссар тIисса, — тIий бур Дарбантуллал шагьрулул 2-мур музыкалул школалул директор Изумруд Теймурова.