Выставка тIитIлатIисса шадлугърай художник цувагу гьуртту хьунни. Тамашачитурал хьхьичIун дуккан дурну дур язи дургьусса ванал 150 сурат, цирдагу личIи-личIисса журалул.

Дия шикку, инсаннал суратирттая тIайла хьуну, пейзажрайн, сюжетрал композициялийн дирсса суратру. Дия мукунна уттизаманнул Аьрасатнаву художникнал цIа машгьур дурсса Dream Vision тIисса журалул суратругу. Выставкалийсса «Избранное» тIисса цIанилусса проектрал лагрулий тамашачитуран ккаккан лархъун дур Европанаву, Азиянаву, Украиннаву, Къазахъисттаннай ттинин хьусса выставкардайн дуккан дурну диркIсса суратру.
Выставка тIитIлатIисса шадлугърай Магьирлугърал музейрал хъунмур СалихIат ХIамзатовал кIицI лавгунни укун чIявусса халкьгу бувкIсса, дунияллул хъу­ни-хъунисса музейрдаву хьу­сса ва укун хъуннасса къулагъа­сралусса выставка цал музейраву ттинин къархьушиву.
– Жу хъинну ххариссару машгьурсса ва гьунар бусса художник Никас Сафроновлул сураттирттал выставка жучIара тIитIаврия ва хъиннува ххариссару ванал творчество кIулсса, дурчIусса вайксса тамашачитал хъамалу шиккун бучIаврия.
ДР-лул ХIукуматрал председательнал хъиривчу Анатолий Карибовлул кIицI лавгунни Да­гъусттаннай мудангу хъуннасса къулагъас диркIшиву культуралух, магьирлугърах ва укун хъунасса художникнал выставка республикалий дуваву жула культуралул оьрмулуву хьусса агьамсса иширан ккаллийшиву.
Цахра дурсса къулагъасрахлу барчаллагь тIий, Никас Сафроновлул кIицI бунни цила чIумал цал творчествалун лахъсса кьимат бивщуну бивкIшиву жула хъуна­сса шаэр Расул ХIамзатовлул.
– Расул ХIамзатов на лащан авияв уттизаманнул Пушкиннуха. Жул цаннал цаннащалсса дахIавугу жулла-жулла творчест­вардайхчин диркIссар. Ттуятусса ца документал фильмраву мунал ттун хасну бувккуссия цалва цаппара шеърирдугу. Миккугу ттуятувасса, ттул суратирттан бивщусса кьиматрал ихтилатру ттун хъамакъабитай. Жул кулпатраву ххирассар ккалан мунал шеърирду, кIулссар мунал творчество, – увкунни художникнал.
Мукунма Никас Сафроновлул бувсунни Республикалул БакIчи Рамазан АьбдуллатIиповлул цайн оьвкушиву ва выставкалий гьуртту хьун ва цува хъинну ххарину, рязину ушиву Дагъусттаннайн хьусса ва аьрххилия. Хъирив художникнал музейран цала чулухасса бахшишран Рамазан АьбдуллатIиповлул сурат пишкаш дурунни. Хъирив, цинявннал цачIу ятIул лиссугу кьуркьуну, выставка тIиртIушиву баян бувунни. Жулла республикалул чулухагу художникнан пишкаш дурунни УнцIукIуллал магьирсса усттартурал дурсса ваза ва «Дагестан глазами Лансере» тIисса ххуйсса, чIюлусса суратирттал альбом.
Шагьрулул Магьирлугърал музейраву ва выставка нантIиссар октябрьданул 30-ннийнин.

З. АьбдурахIманова