Сентябрьданул 23-нний машгьурсса аьлимчу, историялул элмурдал доктор, профессор, Аьрасатнал Элмурдал академиялул член-корреспондент МахIаммадлул арс Рауф Мунчаевлун бартлаглагиссар 88 шин
Рауф Мунчаев увссар Азирбижаннал Закатал шагьрулий 1928-ку шинал. Мунчахъул бивкIссар Гъази-Гъумучиял цIадурксса заргартурал кулпат. Къапкъазуллал дяъви къуртал хьуну, Дагъусттан цIакьну Аьрасатнавун бувххун махъ, Дагъусттаннал хьхьичI тIивтIуссар иш-бажаранчишиврийнсса ва щалагу Аьрасатнал базаллувунсса гьартасса ххуллу. Пагьму-гьунар бусса лакрал, хаснува гъази-гъумучиял, усттарталгу занан бивкIссар Аьрасатналгу, Кьиблалул Къапкъазналгу шагьрурдайн пишакаршиву дуллан. Рауфлул ппу Мунчахъал МахIаммад цал чагуртну, хъирив заргалну зий ивкIссар Ттуплислив. Тиккува хьуссар ванаяту усттаргу. Мунияр махъ ва ивзссар Закаталлайн.
Закатал та заманнай марцI азирбижаннал шагьругума къабивкIссар, тикку чIявусса дагъусттан, оьрус, жугьутIи, армани, азирбижан ва м.ц. ялапар хъанай бивкIссар, мунияту та бивкIссар интернационал аралуву шагьру. Рауф Мунчаевлул оьрчIшиву мукуннасса интернационал лагмаралугъраву ларгссар. Му тагьарданулли аьлимчу кьянкьасса, дакI дарцIусса интернационалист увссагу.
Закаталлайва 1945-ку шинал бувккуссар ванал дянивмур школагу. Гихуннайсса дуккаву чIаважагьилнан ласун ччан бивкIссар цала буттахъал ватандалий, Дагъусттаннай. 1945-1949-ку шиннардий дуклай ивкIссар МахIачкъала шагьрулий, Сулайман Стальскийл цIанийсса Дагъусттаннал паччахIлугърал педагогикалул институтрал (цIанасса Дагъусттаннал паччахIлугърал университет) историялул факультетрай. Вуз къуртал байхтува, 1949 шинал кьамул увссар Дагъусттаннал АССР-данул Министртурал Советрал Председательнал кумагчину ва Сулайман Стальскийл цIанийсса Дагъусттаннал паччахIлугърал педагогикалул институтрал Марксизм-ленинизмалул кабинет бачин буллалиману. Жагьилнал хьхьичI политикалувун тIивтIунмасса ххуллу буну чIалай бур. Амма къаавчуссар ва му бигьа ххуллийх. Ванал язи бувгьуссар, К. Маркслул махъру ишла бувну учин, ххялларисса, чарттарисса элмулул ххуллу. Ва увхссар СССР-данул Элмурдал академиялул (ЭА) Материалийсса культуралул историялул институтрал (ИИМК) аспирантуралувун. Микку дуклай ивкIссар 1949–1953 шиннардий. Миккур ванал археология язи дургьуссагу.
1950-ку шинал СССРданул ЭА-лул ИИМК-лул ва Дагъусттаннал билаят лахьхьаврил музейрал сакин бувсса К.Ф. Смирновлул каялувшиндаралусса Дагъусттаннал археологиялул экспедициялуву буминнаву ивкIссар Рауф Мунчаевгу, майданнивсса элмийсса хъиривлаявуртту дуллай, гьурттугу хьуссар Буйнакскаллал райондалийсса Агъачкъалаллал ччясса дянивми аьсрурдал гьаттазандалийсса (могилник) ва чарвитул ва ччясса муххал заманнул гьайкаллал Къарабудахккантуллал шяраваллил махIлалийсса элмийсса диххавуртту давриву. 1951-ку шинал Дянивмур Волгалийсса Куйбышевуллал ГЭС буллалисса зоналийсса археологий экспедициялуву (экспедициялул начальник А.П. Смирнов) гьуртту хьуссар Хрящевка шяравалличIасса кургандалийсса кьуркьу (срубная) культуралул Н.Я. Мерпертлул каялувшиннаралусса элмийсса диххавурттаву. 1952-ку шинал Е.И. Крупновлул каялувшиннаралусса Ухссав-Къапкъазуллал экспедициялуву (Ингушетия ва Ставропольлал край) элмийсса диххавуртту дуллай ивкIссар.
1953-ку шинал ванал дурурччуссар «Эпоха меди и бронзы в истории Дагестана (III–II тыс. до н.э.)» («Дагъусттаннал тарихраву дуссилул ва чарвитул замана (жула заманалуяр хьхьичIсса III–II азарку ш.)») тIисса диссертация ва мунихлу дуркссар историялул элмурдал кандидат тIисса элмулул цIа. Жагьилсса аьлимчу кьамул увссар СССР-данул Элмурдал академиялул Историялул, мазрал ва литературалул институтрал (ИИЯЛ) чIивима элмулул зузалану. Микку зий ивкIссар 1953–1955-ку шиннардий. Амма та чIумалсса институтрал каялувшинналуща къабювхъуссар, жагьилсса аьлимчунан дайшишру дарча дакъасса, ва урувччуну, ванал хьхьичI ххуллу тIитIин ва, гьалбатта, мунийну дагъусттаннал элму хьхьичIуннай дуллансса ххуллунгу ссуссукьушин хьуссар. Му дайшишру сававрай лавгссар Рауф Мунчаев Москавлив ва тикку муниннин цува аспирантуралуву дуклай ивкIсса СССР-данул ЭА-лул Материалийсса культуралул историялул институтрал ххарину кьамул увссар перспектива дусса аьлимчу даврийн (ца заралданун ганиярвагу хъунмасса хайр!). Микку ва зий айивхьуссар 1955–1968 шиннардий Чарвитул заманнул отделданул чIивима элмулул зузалану, 1968 ш. гьаз увссар хъунама элмулул зузалашиврийн. Цала хIарачатрайн ва гьунарданийн бувну, гара шинал ивтссар институтрал директорнал элмулул давуртталсса бай хъиривчуну. Му къуллугърай ивкIссар зий 1968–1991-ку шиннардий.
Гьаманки ми шиннардийри жула билаятрал археология дунияллул майданнийн дурксса, муниннин Аьрасатнал археология кьатIув къадурккун, цила билаятрайрар диркIсса. Аьрасатнал археология дунияллул элмулул даражалийн гьаз давриву хъунмасса кIану бувгьуссар Рауф МахIаммадович Мунчаевлул, цала аькьлиятралгу, элмулулгу, дипломатшиврулгу гьунарданийну. 1969–1980, 1985 шш. ва ивкIссар СССР-данул ЭА-лул Археологиялул институтрал Иракьнавусса экспедициялул начальникну. Иракьнал хъирив аьрххи багьссар Сириянавун. Укун 1969– 2000 шиннардий Рауф МахIаммадович ивкIссар Месопотамиянавунсса цалчинсса Аьрасатнал археологий экспедициялул каялувчину.
Укун жаваблувсса ва бигьа дакъасса даву дуллай унувагу, Р.М. Мунчаевлул 1971 г. Ттуплисуллал университетрал хьхьичI дирхьуссар «Кавказ в эпоху энеолита и ранней бронзы» («Къапкъаз энеолитрал ва ччясса чарвитул заманнай») тIисса диссертация ва хъинну ххаллилну му дурурччуссар. «ХIакьинусса кьинигу, «Кавказ на заре бронзового века» («Къапкъаз чарвитул заманалул байбихьулий») тIисса цамургу ахттаршиннаралгу щаллу дурсса му ахттаршин неолитрал – ччясса чарвитул заманнайсса археологиялул материаллу жям дуллалисса ца дакъа дакъасса давуну хъанай дур», – тIий ур, цамагу жула машгьурсса археолог Шагьмардан Амиров. Ялагу: «Ва цинявгу, жула ватандалулгу, кьатIаллилминналгу къапкъазкIултурал муданма столданийвасса лури», – тIар аьлимчунал.
1968-ку шинал СССР-данул Элмурдал академиялул президиумрал хIукму бувссар Месопотамиянаву (КIинеххаваллий) элмийсса диххавуртту дансса экспедиция гьан бан. Мунил бакIчишиву дан Р.М. Мунчаевлуйн тапшур бувссар. МукьцIалунния лирчусса шиннардий 1969-ку шиная 2010-ку шинайнин Месопотамиянавунсса экспедициялул бакIчину ивкIссар Р.М. Мунчаев. 1985-ку шиналнин му экспедиция зий буссия Иракьнаву, мунияр махъ 1988-ку шиная байбивхьуну – Сириянаву. Му экспедиция аьлимчунал цала оьрмулуву бакъа, жула билаятрал элмулувугу хъинну хьхьичIунсса ишну хьуссар, цанчирча му бивкIссар та инсаниятрал оьрчIал кIанттун ккаллисса махIлалийсса – Месопотамиянавусса – хьхьичIва-хьхьичI жула билаятрал дуллалисса элмийсса ахттаршинну.
Ци дикIан бюхъанссар ххал къадиргьусса та гьала ХIХ аьсрулийва аьлимтурал ххилтIу буллай байбивхьусса кIанттаву, учин бучIиссар вай ххару ккалаккиманал. Амма Месопотамиянаву 10 азарда шинай бякъаливчIсса инсаниятрал тарих кIулну бивкIун бур анжагъ парча-парчарину ва саргъунсса, щаллусса сурат хьуну диркIун дакъар. Яла къаххуйну кIулмур кIануну бивкIун бур Синжардал дара. Му авлахъгу, дарагу дур Тигр неххал урчIамур зуманицIух, Синжар зунттал ссиртираяту кьиблалул чулухуннай. Тикку ялапар хъанай буссар курднал язиднал ва туркманнал агьлу.
Ва Жазиралул субтропикирттал зоналий гьава бур континенталсса, яъни март ва апрельданул дайдихьулий тикку дикIайссар дяркъу, хьхьурайсса температуратура нульдануяр яларайсса. Апрельданий бикIайссар ураган кунмасса марч ва бичайссар микIиращалсса чявхъарду. Яламур чIумал ччуччин уллалисса кIиришиву, дяхтта ххютулу 50 градусраяр ларайсса температура. Ххишалдаран, муниннин тикку къабивкIсса аьрасатнал аьлимтуран даву дачин дансса вардиш ларсун бивкIунгу бакъашиву.
Амма ми къулай дакъашивуртту диркIун дунугу, элмулул чулуха язи бувгьусса кIану хъинну сан дусса лявкъуну бур, цанчирча тикку аьлтту хьуну бур Месопотамиянал тарихрал кIиазарда шинайн бивсса (жула заманалуяр хьхьичIсса VI азарукулияту V азарукулул ахирданийнинсса) мутта. Му мутталий тикку ирглий шанна культура сакин хьуну дур хассуннал, халафнал ва оьбейдуллал. Му бакъассагу, Р.М. Мунчаев бакIчисса экспедициялул тIиртIуну дур Месопотамиянал керамикалул ччясса мутталийн дагьайсса кIира хъинну агьамсса гьайкал – Телл-Сото ва Кул-Тепе (цIана мунийн учайссар протохассуннал замана – жула заманалуяр хьхьичIсса VII азарку шиннардил ахир).
ТIиртIуну дур Р.М. Мунчаев каялувчисса аьлимтурал миннуярдарагу хьхьичIарасса неолит революциялул чIумалссагу гьайкал – Телл Магъзалийа. Му дур керамика дукканниннасса гьайкал, мунил тарих букIлай бур жула заманалуяр хьхьичIсса VIII азарукулул ахирданийн – VII азарукулул дайдихьулийн).
Майданнайсса ахттаршиннардайну дурсса тIитIавурттал хIасиллу гьарца сезондалул ахирданий элмулул хахливун (научный оборот) ласайсса диркIссар жула билаятрай дакъа, дунияллийгу.
Р.М. Мунчаевлул каялувшиврулу Месопотамиянаву дурсса ахттаршиннардал дунияллул таварихрал элмулуву циннасса чIаму дургьуну дуссар. Тел Хазна I-муний дурсса элмийсса диххавурттайну лявкъуну бур хъунмасса административсса ва диндалул комплекс. Му хъанай бур Месопотаминавусса цалчинсса му журалул комплекс. Вай тIитIавуртту даннин элмулул тикку цивилизация (маданият) жула заманалуяр хьхьичIсса III азарукулул кIилчинмур дачIинний сакин хъанан диркIссар, тIиссия. Ми тIитIавуртту дурну махъ, шагьрулул зумунусса ялапаршиннардал кIанттурду, шагьрулул агьлу, паччахIлугърал хIакимлугърал институтру ва цаймигу маданиятрал лишанну чанна-чанну жула заманалуяр хьхьичIсса III азарукулул дайдихьулийра хIасул хьуссар, учин бюхълай бур.
Аьрасатнал археологтурал Иракьнал Ухссав-Баргълагаваллил чулух Синжардал даралуву дурсса элмийсса хъиривлаявурттан лавайсса кьимат бивщуссар кьатIаллил биялаятирттал аьлимтуралгу. Тай муркIу хъанай бур, Аьрасатнал аьлимтурал давурттал хIасиллу хIисавравун къаларсун, нукIузаманнул КIинеххаваллил таварих гихунмайгу кIул бан къабюхъайшиву. Масалдаран, нукIузаманнул Месопотамиялул архитектуралул ингилис касмучи Джоан Отс чичлай бур: «Британнал археологиялул хъунмасса хIал бувссар Ухссавнил Месопотамия ахттар бавриву бакIчишиву дуллай, амма утти му кIану бувгьунни совет экспедициялул ва мунил дурсса ахттаршиннардал Месопотамиянал неолитраятусса пикрирду чIаланну баххана хьун бувунни!, – куну.
1999-ку шинал Р.М. Мунчаевлун, Н.Я. Мерпертлун ва Н.О. Бадердун дуркссар Аьрасатнал Федерациялул ПаччахIлугърал премия Гъанмур Баргъбуккаваллил археологиялуву дурсса хъунисса хьхьичIуннайшивурттахлу.
ХХ аьсрулул 80-ку шиннардий Иракьнавусса политикалул тагьар хъинну къизгъин хьуссар, Ираннал ва Иракьнал дянив дяъви шаврийн бувну. Иракьнаву дурсса элмулул хьхьичIуннайшивурттугу кьадитан багьссар. Микку Р.М. Мунчаевлул хIукму бувссар ахттаршинну мунияр арх бакъасса Сириянаву, Ухссавнил Месопотамиянавусса Хабурдал авлахърай (та кIанттайнни аьрабнал Жазира учайсса) дачин дан.
1987-ку шинал интту СССР-данул ЭА-лул ва Сириянал Культуралул министерствалул икьрал дурну махъ, Р.М. Мунчаев, Н.Я. Мерперт ва Н.О. Бадер ми давуртту дан-хьун тIисса кIанайн лавгссар. Тикку Телл Аляуи тIисса кIанай (танийн элмулул литературалуву «Телл Хазна I» тIисса цIа ларчIун дуссар). Му теллданул (бакIул) бувгьуну бур 2 га майдандалул, лахъшиву 17 м. Совет археологтурал хъирив тивахунмай бувкIун бур ингилиснал ва италияннал экспедициярду.
Совет-Аьрасатнал экспедициялул Телл Хазна I-муний 22 шинал мутталий дурсса элмийсса ахттаршиннардал аьмсса майдан бур 5000 кв.м. Диххавурттал дязанаву бур овалданул формалийсса сакиншиннардал комплекс. Ганил хъунмур архь (ось) дур 80 м. Мунил лагмасса барулул лахъшиву диллай дур 8 м. Комплексравун бухлай бивкIун бур гивувасса чIюй куннасса конструкциягу. Хъирив лаявурттал ккаккан буллай бур му зиккурат (дуаьртту дайсса кIану) бушиву. (Зикр тIисса аьраб мазрай дакIнийн бутаву (яъни Аллагь дакIнийн утаву) тIиссар; зиккурат хъанай бур Зал дакIнийн утай кIану).
КIицI дурсса ахттаршиннал хIасиллу цачIун дурну дуссар Р.М. Мунчаевлул, Н.Я. Мерпертлул ва Ш.Н. Амировлул «Телл Хазна I. Культово-административный центр IV–III тыс.до н.э.» тIисса хъунмава-хъунмасса луттирай (2004-ку ш.).
Р.М. Мунчаев хъунасса ахттарчи ушиврущал архIал цIакьсса администраторгу ур. Уттинингу кIицI бувсса куццуй, ванал 20 шин (1968–1991) ххишалагу дурну дур РАН-далул Археологиялул институтрал директорнал элмулул хъиривчуну (бакIрай кьураксса шинай академик Б.А. РыбаковлучIа, яла сайки шанна шинай академик В.П. АлексеевлучIа). 1991-ку шинал Р.М. Мунчаев ивтун ур РАН-далул Археологиялул институтрал директорну. КIулсса куццуй гьаманки ми шиннардий парчари хьунни Совет билаят. Тай дия ххишала кьянатсса шинну. Ми шартIирдай Рауф МахIаммадовичлуща институтрал коллективгу тири-хъири хьун къабивтун, ябан бювхъуссар.
1998 ш. Р.М. Мунчаевлун дуркссар орден «Дружбы» чIярусса шиннардийсса элмулул ва сакиншинналул давурттахлу.
2000 ш. УвчIуссар Аьрасатнал элмурдал академиялул вакил-корреспондентну.
2003 ш. Аьрасатнал элмурдал академиялул маслихIатчи.
2004–2013 шш. Аьрасатнал Гьуманитар фондрал тарихрал, археологиялул ва этнографиялул чулухаллил Эксперт советрал председатель.
2006 ш. ЦIакь увссар РАН-далул И.Г. Забелиннул цIанийсса премия дулун хIукму баврил Эксперт комиссиялул председательну.
2007 ш. ЦIакь увссар ЮНЕСКО-лул Иракьнал культуралул ирсирал экспертну.
2008 ш. Дуркссар «Ингушетия Республикалул элмурдал бусравсса ишккакку» тIисса хIурматрал цIа.
Ва ур чIявусса элмулул журналлал редакциялул вакил.
Вай гьантрай Рауф Мунчаевлун бартлаглагиссар 88 шин. Му оьрмулувугу Рауф МахIаммадович хIарачатралгу, гужралгу виувцIуну ур. ЧIал къавхьуну букканссар ванал чивчусса азаруннияр чан дакъасса лажинну дусса элмулул лу.
Р. М. Мунчаевлул оьрмулувусса бусравсса тарих кIицI лаган Аьрасатнал элмурдал академиялул дачин дурсса «Биобиблиография ученых» тIисса сериялул итабавкьуну бур «Рауф Магомедович Мунчаев» тIисса лу. (Шиккува учин багьлагьиссар, укунсса сериялувун багьайссар анжагъ дунияллийх цIа дурксса аьлимтураясса луттирду. Му сериялун хасну дурсса чIирисса формат – 70 х 100 1/32 – ишла дай, дунияллул литературалул дунияллул тарихрая ликъаххайсса цIарду абадлий личIан даву мурадрай. Мунихара лархьхьусса серия дуссар «Cogito, ergo sum» («Пикри буллай унавхьур, угу-уссара») – формат 76х100 1/32. Мунил итабавкьусса «Россия в ХVIII веке», «Александр Македонский», «Наполеон» луттирду ттухьхьунма биривну тIий на ттула хъунмасса талихI хьушиврун ккалли бара.
Р.М.Мунчаевлуясса луттирал хьхьичIмахъ чивчуну бур ххаллилсса аьлимчу-археолог Ш.Н. Амировлул, лу сакин бувмигу бур Ш.Н. Амиров ва Л.А.Калашникова. Цуксса ялув авцIуну, Р.М.Мунчаевлул аькьлулул кьуркьумунил, дурну дирхьумунил, канила дуркмунил хъирив агьлагьисса унугу, жува тIисса лу буккирча, букку махIаттал къавхьуну къаличIанссар, мукун чIявусса караматсса гьунарду буллуну бур цIанихсса аьлимчунан. Ва макьала чичингу му луттирал хъунмасса кумаг бунни.
Шикку къаувкуну къабучIир, Рауф МахIаммадович ушиву хъинну хIалимсса, инсантуращал авкьусса, цайминнах личIлулну вичIи дишайсса, шархьсса жаваб дулайсса хасиятрал инсан. ГаначIан кабинетравун увххукун, аьжаивсса иминшиврул тагьар дикIай, ганачIату увккукун, цана цува цукуннив авадан хьуну, чIалангу икIай.
Рауф Мунчаевлул хIат-хIисав дакъасса дуаьчитурацIун хьуну,нарагу барча дуллай ура ва увсса кьини, чIа тIий ура цIуллушиву, цува ччимигу, цанма ччимигу цIуллу баву ва дакIнийсса мурадру бартлагаву.
Сулайман Мусаев,
тарихрал
элмурдал кандидат
