Франциянал Макона шагьрулий къуртал хьунни юниортурал лачIун буккаврил дунияллул первенство. Гьуртту хьуссар чIаважагьилтуралгу, душваралгу командартту. Аьрасатнал чIаважагьилтурал командалул ларсун дур 7 медаль: 2 мусил, 2 арцул ва 3 чарвитулсса.
ХIасан Аьдилов
Командарттавату Аьрасатнал цачIундур командалул бувгьуссар цалчинмур кIану. Хъиривмур ххуттай хьуну дур Азирбижаннал команда (1:1:3), шамилчинмур кIану бувгьуну бур Турциянал командалул.
Цалчинмур кьини мусил медаллу ларсун диркIссар Американал ва Ираннал лачIунбуккултрал, кIилчинмур кьини тIурча мукьвагу финалданул бяст-ччалливу гьуртту хьуну бур Аьрасатнал спортсментал. Ахирданийгу Аьрасатнал командалул ларсун дур 2 мусил медаль ва 2 арцулсса. КIирагу арцул медаллу ларсун дур дагъусттанлувтурал.
55 килорал кIушиврий Хасавюртлиясса ХIасанхIусайн Бадруттинов финалданий ух хьуну ур Афган Хашалов тIисса азирбижанличунаяр. Ганал ватанлув АхIмад ХIусманов 66 килорал кIушиврий мукуна ух хьуну ур финалданий Турциянал спортсмен Енес Услуяр 7:5 счетрайну.
МахIачкъалалиясса Арсенаьли Мусалаьлиев 84 килорай лачIун увккун ххув хьуну ур циняв муттаэтураяр, финалданий Мусалаьлиев ххув хьуну ур Турциянаватусса ХIусман Гоченнуяр. Цамургу мусил медаль ларсун дур Аьрасатнал командалуву АьсатIиннал лачIунукку Казбек Хабуловлул 120 килорай.
Аьрасатнал душварал командалул ларсун дур ца мусил, кIира арцул ва ца чарвитул медаль.
