Динийсса иширтталсса буллалисса Дагъусттаннал комитетрал ва Муфтиятрал вакилтал чIун-чIумуй хьунабакьавантIиссар дуснакь бувминнащал.
П.Рамазанова
Сентябрь зурул 20-нний кIицI лавгсса комитетрал зузалт МахIачкъалаливсса Хъунмизитрал имамнал хъиривчу МухIаммад-хIажи Ссаламовлущал бивунни Ново-Тюбе поселокрайсса №7 колониялийн. Му идаралул хъунама Рабадан Аьлибулатовлущал ва мунала хъиривчу Залбек МахIаммадовлущал миннал дуснакь бувминнал тагьар ххал диргьунни. Дагкомрелигиялул вакил Давуд-хIажи Тумалаевлул дуснакь бувминнахь увкунни : «ПаччахIлугъран ва агьалинан ччиссар зу, шива буккайхту, паракьатну захIмат буллай, яхъанай. Жулва билаятрай дин дуван ччинан я къадагъа дакъассар, я дайшишрурду. Дуснакьирттаву зухун, дин дуван къабитлай, ахчилачисса акъассар. На тамансса аьрабнал билаятирттайнгу ивссара. Дагъусттаннай цайми билаятирттайнияр диндалул тархъаншиву дур». МухIаммад-хIажи Ссаламовлул бувсунни бусурманнал агьали тIайласса диндалул ххуллийх бачин аьркиншиву, дин даччин дуллан къабучIишиву. Цаппара хIадисирттал ва Кьурандалул луттирал аятирттал мяънарду дурчIин дунни. Укунсса хьунабакьавуртту зуруй цал дувавансса хIукму бунни, дуснакьирттавуминнан исламрал гьанурду тIайлану дурчIин дувансса ва миннаву патриот асарду чантI учин буллалисса, мюнпатсса даву хъанай дуну тIий. Дуснакьирттавуминнан цивппа хIукуматрангу, агьалинангу мяйжаннугу аьркинну бушиву асар хъанан аьркинссар укун хайрданунсса давурттайну.
