Жува мудангу тикрал бу­ллан бикIару, ай, зунтталчунал дакIниву мудангу цIакь хьуну бивкIссар цува увсса, хъуна хьу­сса буттал къатрацIа хьун ацIаву кьюкьаласса затну чIалачIисса пикри, тIий. Му мукунни. Буниялттунгу. Амма, мукунсса иш кьюкьалану чIаларчагу, кьамулну бур­хха жунма буттал къатри эяллай дацIаву.

Щалвагу Лакку билаятрай заллухъру акъами къатри чIярур заллухъру буминнаяр. Лекьрурду чIярур саламатсса къатраяр. Мяйжанссар, му так Лакку билаятрайх дурксса кьини дакъар. Ттигъанну интернетраву ккалай бивкIра ца Ахттиял райондалийгума 17 шяравалу агьалинал кьариртун душиву, так-тукну инсантал яхъана­хъисса 10 шяравалу душиву Кьурагьиял райондалийгу. Да­гъусттаннай дур «Кьариртсса шяраваллурду» тIисса проектгума, муниха зузими бур зунттавун бизан ччисса кулпатру лявкъуну, гьарца кулпатрахьхьун тIалав дуллалиссаксса аьрщигу дуллуну, техникалулгу кумаг бувну, чув ци дугьан аьркинссарив ла­хьхьин буллалисса агрономталгу ми кулпатирттацIун цIакь бувну, сантирай зурчанни зунттаву шяраваллурду цIу дуккантIисса тIий. Бур зун­ттал кIанттай ябув­­сса бюрчурдил, чIаваоьлил ди­кIул кило Москавлив, Санкт-Петербурграй дириян къаритай ттучаннай тIий. Лакрангу ва проектраха зун аьркинну бур. ХIисавравун ласун. Лагма лаган. Ва цамур масъалари.
ХIакьинусса жулва ихтилатгу цамунияр. Чансса бухьурчагу, бур буттал къатрацIа хьун бацIаву мяйжаннугу яхI-адаврал кьамул къабуллалисса. Июль зуруй 1-мур ЦIувкIуллал шяраву дия на тIутIимур исват буллалисса хъуннасса байран. Рамазаннул арс МахIаммад ЦIаххаев 80 шинал юбилей дуллай ия цIуну дурсса ххаллилсса шанзивулийсса къатраву. Юбилейгу, къатталагавугу (новоселье) – кIира байран ца кьини. Му так ЦIаххаевхъал къушлий­сса, так миннал кулпатрал байран дакъая. Шяраваллил жяматрал байран дия. Жямат цачIун бавтIун, циняв ккуркки лавгун цIусса къатрал хIаятраву дурна му байрангу. Буттал шяраву юбилей даврийну, гьай балики, цIусса, ххуйсса аьдатрал гьану бивзун бикIан МахIаммад ЦIаххаевлул!? Щин кIулссар!?
Колхозниктурал, Рамазаннул ва ПатIимал кулпатраву увсса ва хъуна хьусса МахIаммадлул шанна шинай дазурду ядуллалисса аьралуннаву къуллугъ бувну бур, Орджоникидзелий къуртал бувну бур совет машлул техникум, даххул пишалий зий айвхьуну ттучандалул хъунаманал къуллугъ бугьаннин, аьмну МахIачкъалаллал шагьрулул промторграй зий 40 шин дурну дур. Лахъисса шиннардий бувсса захIматран хIукуматралгу лайкьсса кьимат бивщуну бур: мунал дур «Отличник советской торговли» тIисса ХIурматрал лишан, тамансса бахшишру ва ХIурматрал грамотартту.
«ЦIанасса ппурттуву ЦIув­кIуллал шяраву халкь хъинну чан хьуну бур, зунттал кIанттайсса оьр­му халкьуннан хьхьичIва кунма нахIуну бакъар. Ттухьгу бия, зунттаву, жяматрал кьариртун нанисса шяраву къадурну къатри, арнил кIанттай циван къадувара тIий. Ттун ттула нину-ппу яхъанай бивкIсса къатри цIу дуккан дан ччай бия», — тIий ур МахIаммад ЦIаххаев.
МахIаммадлул кулпат Уммусалиматлущал мукьва оьрчI хъуни бувну, чивун буккан був­ссар, шамагу арсгу, душгу хъинну бюхъу-бажар бусса, хIарачат бусса инсантал бур. 56 шин цачIу дурну дур МахIаммадлул ва Уммусалиматлул. ХIайп, 3 шинал хьхьичI дунияллия лавгсса Уммусалимат къабивтунни ххаллил­сса къатрай гьантта-чIун гьан дуван. Ца ччай бияча мунин цIусса къатрай бу­ттал шяраву кулпат ца урцIух лагма лавгун! «Жул буттал ва бавал буниялттунгу цаннаха ца хIурматрай оьр­му бувтссар, – тIий бур душ Марина. – Баван хъинну ччай бия дурну къуртал дурсса къатрах ябитан. Къанясивну лявкъунни. Бутта 80 шинал оьр­мулуву унугу, дунияллий хъана­хъисса иширттал хъирив авцIуну, гьарзатрая хавар буну икIай. Жяматрал, гъан-маччанал оьр­мулуву хъанахъисса иширттавух чялишну хIала уххай. Бу­ттал хIурмат жул ужагърай хъунмассар. Жулва хъунисса арсру, душру бусса жу личIлулну буттал насихIатрах вичIи дишай­ссар, дуллалимунил хIакъираву мунащал маслихIат ккаккайссар. Нитти-бутта яхъа­най бивкIсса къатри цIу дуккан дуваврия ххарину ур ппу. Ванал нину-ппу найрдахагу зий бивкIун бур. Бутта найрдал­ссагу буллан дакIний ур. Бавал ва буттал дуллай бивкIмур дулланшиврул».
МахIаммад ЦIаххаевлул юбилей дуллали­сса гьантрай къатталагаврийн бавтIсса жямат бия, МахIаммад хьхьичIа-хьхьичI шярава лавгссия, хьхьичIа-хьхьичI шяравунай занагу хьунни тIий. Барачатсса хьуннав мунал буттал аьрщарайн цIуницIа лавсъсса ша. Шяраваллил архитектура, чIалачIин ххуй дуваннагу ссал къабагьар буттал шяраву кIукун ххаллилсса къатри душаву! Гьай-гьай, думи къатрирагу цIу ду­ккан дувансса каширагу дакъассагу бур, махъсса шиннардий шяраву шайсса куццуй къатри дакьин дуллалиссагу бур. Къатри дакьин дувансса ягу цIу дуккан дувансса цIакь буминналвагу хIарачат булларча, гьай, балики, тасса-тарив зур бусса шяравалуну диркIсса, щаллагу дунияллийх цIа ларгсса ЦIувкIуллал цIа-кьинигу цIуницIа дюхъан!
Барча вил юбилейгу, буттал шяравусса цIусса къатригу, ЦIаххайхъал МахIаммад! Лахъива-лахъисса оьрму бусса, цIакьминнувугу цIакьсса хьуннав вил цIусса къатри! Ххари улланнав наслулул! ЦIуллушиву дулуннав вихьхьун!