Республикалул Миллатирттал политикалул министерствалий хьунни Дагъусттаннал Чичултрал союзрал вакилтуращалсса хьунабакьаву. Му хас дурну дия Дагъусттаннал миллатирттал мазру машгьур баврин ва буруччаврин.

И. Саидова
Шикку гьуртту хьунни ДР-лул миллатирттал политикалул министр Татьяна Гамалей, Да­гъусттаннал халкьуннал шаэр, ДР-лул Чичултрал союзрал председательнал хъиривчу Марина АхIмадова, Дагъусттаннал халкьуннал чичу Бийке Кулунчакова, ДР-лул культуралул лайкь хьусса зузала, шаэр Аьйшат Малачиева ва миллатирттал мазурдил секциярдал вакилтал.
Дагъусттаннал миллатирттал мазру буруччаврин хас дур_сса батIаву дайдирхьунни Татьяна Гамалейл. Ванил кIицI лавгунни миллатирттал мазру ябаврил хIакъиравусса агьамсса масъалартту аякьалулун лавсун бушиву, Республикалул БакIчинал бакъассагу, Аьрасатнал Федерациялул Президентналгу.
Министрнал мукунма бувсунни 2015 шинал хьусса, Аьрасатнал миллатирттал мазурдин ва оьрус мазран хас дурсса заседаниялул советрай АьФ-лул Президент Владимир Путиннул тапшур бувну бивкIшиву Аьрасатнал Федерациялул миллатирттал мазурдийсса литература ­оьрус мазрайн таржума дансса ва ми мазурдийсса художествалул, учебно-методический литература ва учебникру итабакьаврил чIарав бацIансса ххишала­сса чаранну лякъинсса.
Марина АхIмадовал цила их­тилатраву кIицI лавгунни хIакьи­нусса кьини миллатирттал мазурдийсса литературалух хьхьичIва-хьхьичI мюхтажну бушиву кIулшивуртту дулаврил идарартту, амма вай луттирдугу арцу дакъашиврийн бувну итабакьин бюхълай бакъашиву.
— ХьхьичIра жу кьамул дайссия луттирду итабакьинсса чIярусса заказру, уттирив, арцу диялну итакъадакьлакьаврийн бувну, жуща чялишну луттирду итабакьлай зун бюхълай бакъар, — увкунни Марина АхIмадовал.
Марина Анатольевнал бус­ласимуницIун бавкьуну, Сувайнат Кюребековал кIицI лавгунни махъсса ппурттуву миллатирттал мазурдийсса луттирдал редакторшиву дуллансса пишакарталгу чансса ливчIун бушиву. Ва ма­съалалул хIакъираву бавтIминнал маслихIат ккавккунни Дагъусттаннал ВУЗ-ирдал студентътуран редакторшиврул даву лахьхьин даврил ялув бацIансса.
ДГУ-рал Дагъусттаннал мазурдил кафедралул заведующий Муса БахIаммадовлул бувсунни цува хIадурну ушиву студентътуран таржумалул ва редакторшиврул даву лахьхьин дуллан.
— Миллатирттал мазру хьхьи­чIунмай буван, ми буруччин ва ябуван бюхъантIиссар хасъсса министерстварттал, чичултрал секциярдал, элмийсса ккураннал цачIуну ва чялишну дуллалисса давурттайну, — увкунни Татьяна Гамалейл.
Министрнал мукунма бувсунни пикрилий бушиву 2016 шинал миллатирттал мазру лахьлахьисса центр тIитIин.
— Ва центрданий бюхъан­тIиссар миллатирттал мазурдий­сса хъамаритала хъанахъи­сса материаллу, аудио ва видео записру ратIлан ва ми итадакьлан. Умуд бур ва центр тIивтIуния шинмай миллатирттал мазурдийсса коллекция хъиннува авадан хьун­ссар тIисса, — увкунни Татьяна Гамалейл.