Сентябрь зурул 6-нния 10-нийн бияннин Къарачай-Чаргаснал республикалий хьунтIиссар «Два крыла» тIисса цIанилусса фестиваль, муний 200-нния ливчусса фотографтал ва видеографтал гьур­тту хьунтIиссар. ЧIал къавхьуну хьунтIисса фестивальдания баян буван, «Дагестан» РИА-лул редакциялийн увкIунни ва проектрал директор Расул Боташев.

И. Саидова
Фестивальданул сакиншинначиталну хьунни «Rigo» фотостудия ва «Медовые водопады» тIисса туркомплекс. Цурда ва фестивальгу хьунтIиссар «Медовые водопады» тIисса туркомплексрал базалий.
Шикку дикIантIиссар выставкарду, цIанихсса фотографтуращалсса, бусравсса хъамаллуращалсса хьунабакьавуртту ва суратру рищаврил ва видеортту ласаврил кьюлтIшивуртту лахьхьин дуллалисса программартту.
«Два крыла» фестивальданий суратру ришлашиминнаща ва видеортту ласласиминнаща бюхъантIиссар куннацIа куннал даврил опыт лахьхьин, пишалул магьиршиву гьаз дан. Мукунма фестивальданий бикIантIиссар цIуну хъанахъисса фотографтуран зун лахьхьин буллалисса ва машгьур хьунсса чаранная бусласисса пишакартал. Миннавух бикIантIиссар цIанихсса суратрищулт Александр Медведев, Алексия Хрущева, щалагу билаятрай ва пишалий зий 15-хъул наградартту ларсъсса актер Федор Селькин ва чIявусса цаймигу.
ЧIявусса пишакартал бавтI­сса, укунсса даражалул шадлу­гъирттайри цIу-цIусса ва мюнпат бусса пикрирду хIасул шайсса, — увкунни Боташевлул.
Расул Боташевлул кIицI лавгунни цIанакулсса чIумал суратру ришлашими ва видеортту ласласими гьарзасса бушиву, амма цил багьайкунсса тIалавшиннардайн бувну зузи­сса нажагьсса бакъа бакъашиву. Мунияту фестивальданий ва пишалухун багьминнан ххишала­сса сант дуссар цала даву усттарну дуллан лахьхьинсса, — увкунни ванал.