Июльданул 26-нний ДР-лул Роспотребнадзорданул управлениялул каялувчи Элеонора Оьмариева ва ганил каялувшиврулусса организациярттал ва филиаллал бакIчитал гьуртту хьунни АьФ-лул ПаччахIлугърал хъунмур санитар хIакин Анна Поповал дуллалисса селекторданул совещаниялий. Ххал дигьлай бия Роспотребнадзорданул органнал ва учреждениярттал 2016 шинал 6 зуруй дурсса давурттал хIасиллу ва хъиривми зурдардий щаллу бансса масъалартту.

ХI. Аьдилов
Анна Поповал бувсмунийн бувну, къуллугърал зузалт­рал биттур бувну бур цалва хьхьичI­сса масъалартту, щаллу дурну дур аьркинсса даражалий­сса санитар-эпидемиологиялул тагьар. Цалий дарцIусса дур мукунна гьавалулгу, хIачIайсса щиналгу, дукиялул продуктирдалгу качествалул ккаккияртту.
Дагъусттаннай къашавай шавуртту чан хьуну дур 12,6 процентрал, миннувух острый гепатитралсса (А) – 45,9 процентрал, вирусрал гепатитралсса (В) – 49 процентрал, мусикъепралсса – 3 иширал, чахуткалулсса – 3,8 процентрал.
Дагъусттаннал Роспотребнадзорданул дачIишинал мутталий 1926 ххалбигьаву дурну дур. Диялдакъашивуртту ялун личин дурну, Роспотребнадзорданул дирхьуну дур 21 млн. ва 200 азарда къурушрансса аькIри. Республикалул судирттал Роспотребнадзорданул материаллайн чул бивщуну административ жаваблувшиврийн кIункIу баврил хIакъираву чивчуну бур 575 хIукму, миннувату 407 – 1 млн. ва 383 къурушран­сса аькIри дишаврил хIакъираву, 155 хIукму – давуртту дацIан даврил хIакъираву.
Совещаниялий дурну дур Роспотребнадзорданул ва ганил органнал ва организациярдал дачIишинал дурсса давурттал хIасиллу, кьимат бивщуну бур АьФ-лул субъектирдал Роспотребнадзордал управлениярттал давурттал мюнпатшиврун ва хIасиллан. Яла ккаккан дурну дур ливчIми 6 зуруй дуллан­сса давуртту.