МахIачкъала шагьрулул кIулшивуртту дулаврил идарарттай гъинтнил каникуллал чIумалгу бацIаву дакъа най дуссия ремонтрал давуртту. Му бакъассагу, педагогтал буссия методикалул материаллал база цIу буккан буллалисса давуртту дуллай.
И. Саидова
Республикалул КIулшиву дулаврил ва элмулул министерство ва муниципал идарартту буссия республикалул школарттансса учебникру тIалав бавриха зий. ХIакьинусса кьини дурну дур учебникру машан ласунсса кьутIирду, итадаркьуну дур миннунсса арцу ва хIалли-хIаллих тIий байбивхьуну бур учебникру машан ласлай.
КIулшиву дулаврил управлениялул хъунама ТIагьир Мансуровлул бувсунни школарттансса учебникру тIалав бавриха зий бушиву ДР-лул КIулшиву дулаврил министерство ва хIакьинусса кьини вайннал машан лавсун, хIадур бувну бур 1-6-ми классирттансса учебникру. Цинявппа учебникру букIлай буссар 5-мур лицейрал ва 46-мур школалул базардайн. Вай базардая учебникру бачIинтIиссар республикалул кIулшиву дулаврил идарарттайх. Гьашинусса шинал республикалул библиотекарттайн бучIантIиссар Федерал паччахIлугърал стандартирттал тIалашиннардайн бувсса 300 лу.
ТIагьир Мансуровлул мукунма бувсунни 2000 шиная шиннай 7-11-ми классирттансса учебный литература цIу дуккан дурну къадиркIшиву. Школалул библиотекарттая цалчинсса сияхIрай луттирду булунтIиссар ахIвал-хIал кIюласса кулпатирттавасса ва нину-ппу бакъасса оьрчIан. Учебникру буллантIиссар уква.
Гьашинусса шинал школарттайн дуклан бучIан най бур 75 азара оьрчI, миннува 11 азара – цалчинмур классравун.
Шиккува дакIнийн бутанну республикалул школарттай ххал дуллай бивкIшиву дуккаврил шинал дайдихьулийнсса хIадуршинна. Школартту ххал буллалисса комиссиялувун бухлай буссия МЧС-рал, МВД-лул, Минздраврал, Роспотребнадзорданул, КIулшиву дулаврил управлениялул ва цаймигу идарарттал вакилтал. ОьрчIал мюхчаншиву дуруччаву мурадрай ва комиссиялул гьарца чулуха ххал бивгьуссар республикалул школартту.
