Август зурул 1-нний МахIачкъалаллал администрациялул бакIчинал каялувшиннаралу хьунни шагьрулул санитариялул тагьарданун хас дурсса совещание. Шикку гьурттушинна дунни цалчинма вице-премьер Аьбдулмуъмин Ибрагьимовлул, шагьрулул бакIчинал хъиривчутал Запир Алхасовлул ва Камил Изиевлул, ихтиярду дуруччай органнал вакилтурал, шагьрулул районнал администрациярттал бакIчитурал, ччюрк дукьлакьисса компаниялул менеджертурал.

И. Саидова
Совещаниялул даву дайдихьлай, МахIачкъалаллал бакIчи Муса Мусаевлул бувсунни шагь­ру ччюрклицIа марцI бан бакIрайн лавсминнан му цуксса жаваблувшиву дусса масъала буссарив къабувчIлачIаву.
— Шагьру марцI буллалисса давурттив дуллалисса компаниялул зузалт бур, ччитари ччюрк дукьлай ягу дурагу къадуркьун кьаритлай, цанма къулайсса куццуй зий. ХIакьину шикку ихтиярду дуруччай органнал зузалтрал хьхьичI баян буллай ура, гихунмай шагьру ччюрклицIа марцI буллалисса давурттив дацIан дулларчан, миннан танмихIру кьукьлантIишиву, — увкунни Муса Мусаевлул.
Шагьрулул мэрнал мукунма бувсунни цала бакIрайн лавсъ­сса буржру биттур къабулларчан, ва компаниялул даву дацIан дувантIишиву. Санитариялул тагьарданул хIакъиравугу Муса Мусаевлул кIицI лавгунни ччюрк дуккан давриха зузисса компаниялул биттур дуллан аьркиншиву шагьрулул администрациялул чулухасса цинярда тIалавшиннарду. Мигу хъанахъиссар гьарза даву ччюрк ххилаххисса техника ва ми дичайсса бакру.
Мукунма мэрнал тIалав бунни коммерциялул идарарттал, банкетру байсса заллал цалла ччюрк администрациялул чулухасса тIалавшиннардайн бувну дукьлакьи баву ва санитариялул дисциплина дуручлачи баву.
М. Мусаевлул бувсунни цува занай, ххал дуллай ивкIшиву шагьрулул санитариялул тагьар. Шикку ванал кIицI лавгунии ччюрк дукьавриха зузисса компаниярттал, районнал муниципалитетирттал администрациярттал даврил диялда­къашивуртту.
Ленинский райондалул администрациялул хъунама Дарбишев ХIажиявлуйн тапшур бунни шагьрулул хъуними кIичIирттава чIалачIисса кIанттурдая ччюрк дичайсса бакру букьан.
Вай масъаларттал хIакъираву Муса Мусаевлул маслихIат ккавккунни ччюрк анаварну салкьи хъанахъийсса кIанттурдая кьинилун кIилла дукьлакьи буван. Ччюрк дукьавриха зузисса компаниялул менеджертураягу тIалав бунни, строительствалул компаниярттащал кьутIивгу дурну, строительствалул ччюрк дукьаврил масъалалул ялув ба­цIаву.
Совещаниялий сукку бунни хасъсса техникалущал шагьрулул кIичIиртту шюшлансса масъала. Мэрнал тIалав бунни кIюрххил ссят 7 хьуннин, дайшишрурду чанну дусса чIумал, шагьрулул кIичIиртту шюшлашисса давурттив дурну къуртал дуллан.