МахIачкъалаллал администрациялуву хьунни Наркотикирттайн къаршисса шагьрулул комиссиялул ирглийсса заседание.

Заседание ларгунни жяматрал мюхчаншиврул ва коррупциялийн къарши бацIаврил шагьрулул управлениялул хъунама ШайхрахIим РахIимовлул каялувшиннаралу.
Шикку гьуртту хьунни шагьрулул администрациялул подразделениярттал зузалт, районнал администрациярдал вакилтал, МахIачкъалаллая арх да­къасса шяраваллал ва поселокирттал бакIчитал, аьрали комиссариатрал, ихтиярду дуруччай органнал вакилтал. Заседаниялул даву дайдихьлай, РахIимовлул кIицI лавгунни шагьрулий чялишну най душиву наркоманиялийн ва наркотикру ишакаш баврийн къаршисса давуртту, наркотикирттайн къарши­сса политика щаллу дансса агьам­сса шартIруну хъанахъишиву наркоманиялийн информациялийну къарши бацIаву ва профилактикалул мероприятияртту дачин даву. Хаснура хъуннасса нигьачIаву наркотикирттая оьрчIан, балугъравун къабивминнан ва жагьилтуран дуну тIий, администрациялул гуж дунни оьрчIал садикирттащалсса ва школардащалсса, студентътурал коллективирттащал­сса ва жагьилтурал организациярдащалсса даву. Мукунна чялиш дуккан дунни аптекардащалсса, кафердащалсса, рестораннащалсса ва цаймигу жагьилтал батIайсса кIанттурдащалсса даву. Вай давуртту хъунмурчIин дуллай бур шагьрулул администрациялул биялдаралусса идарартту хушрай­сса дружинниктурал кьюкьращал архIал.
Наркотикру ишакаш баврил хъирив бавцIусса шагьрулул отделданул даврия бувсунни подразделениялул хъунама Оьмархаям Оьма­ровлул. ДачIи шинал лажиндарай МахIачкъалаллал шагьрулул отделданул (МГО) материаллайн бувну, сукку дурну дур 55 уголовное дело. Миннул лагрулуву ялун личин дурну дур 70 тахсиркаршиву. Зерххуну дур 5 кг. ва 289 гр. наркотикирттал ва психотропный затирттал. Мура чIумул дянив наркотик­ру ябуллай ва ишла буллай тIий аькIри дирхьуну дур 17 инсаннай. «Мак-2016» операциялул лагрулуву МахIачкъалалив ва шагьрулул лагма-ялттусса кIанттурдай ххя­ххиялул наркотикру ппив буллалисса ва ишакаш буллалисса ишру ашкара баву мурадрай дурну дур рейдру. Лявкъуну бур наркотикру бусса ххяххия дургьусса цаппара кIанттурду. ДачIи шинал дянив МахIачкъалалив дурну дур ряхра профилактикалул мероприятие. Миннувасса ца яла агьаммурну хьунни, щалагу дунияллий наркотикирттащал талатисса кьинину баян бувсса, июль зурул 26-нний ларгсса мероприятие. Му тIайла дуккан кумаг бувсса Спортрал туризмалул ва жагьилтурал иширтталсса байсса комитетран баян бунни хъунмасса барчаллагь. Ххуй­сса кьимат бивщунни Оьмархаям Оьма­ровлул МГО-лул оператив зузалтрал даврин. Миннал увгьу­сса кIива наркокурьернаща зевххуну бур 800 гр. ливчусса героин. Увгьуну ур мукуна МахIачкъалалив наркотикру бахлай ивкIсса Азирбижаннавасса кIия. Лавкьуну бур ца наркопритон.
МахIачкъалаллал КIулши­вур­тту дулаврил управлениялул тарбиялул даврил отделданул хъунмур Чимназ Аьлиевал бувсунни, подразделениялул пишакартуращал, шагьрулул администрациялущал, Наркоконтрольданул управлениялул зузалтращал ва МахIачкъалаллал кIулшивуртту дулаврил идарарттащал цачIу щалагу дуккаврил шинай дуллай бивкIшиву профилактикалул давуртту. Миннувасса цаппара хъанай дур агитбригадарттал , цIуллу-цIакьсса оьрмулийн оьвтIутIисса социал рекламардал, плакатирттал ва суратирттал конкурсру, фестиваллу. Ми дакъассагу, дурну дур 7000 дуклаки оьрчI гьуртту хьусса анкетирование. Гьарица зуруй социал педагогтурал буллай бур жагьилтал наркоманиялия арх баву мурадрайсса ккуркки столлу, итабакьлай бур буклетру, брошюрарду, планшетру, ккалай бур лекциярду. Дурсса давурттал жям дурну, ми диян дуллай бур кварталданий цал ва дачIи шинай цал шагьрулул администрациялийн ва КIулшивуртту дулаврил министерствалийн.
ДР-лул Аьрали комиссариатрал шагьрулул отделданул призывниктурал дянив цукунсса профилактикалул давуртту дуллай бу­ссарив бусласисса ихтилат бунни шагьрулул военкоматрал медкомиссиялул хъунама хIакин ХIажи ХIусмановлул. Аьрали комиссариатрал вакилтурал буллай бур профилактикалул ихтилатру шагьрулул школардай, ссузирдаву, ВУЗ-ирдаву аьралуннавун буциннинсса ва буцайсса оьрмулувусса жагьилтуращал, ми ххал буллай бур хIакинтуралгу. Февраль-март зурдардий ххал увну ур оьрмулул 17 шинавусса 700 жагьил, инттусса ва гъинттулсса призыврал кампания дайдирхьусса ппурттуву ххал увну ур аьралуннавун буцайсса оьрмулувусса (18-27 шин) 520 жагьил.
Наркотикру ягу психотропный затру ишла дуллалисса кунма бизарча, призывниктал гьан бай­ссар ххал бан республикалул наркологический диспансерданийн. Миккугу му мяйжан хьурча, жагьилтал аьралуннавун къабуцай­ссар. Ларгсса призыврал кампаниялул чIумал медкомиссиялул хIукмулийну комиссоват увну ур 2 призывник. ХIажи ХIусмановлул бувсунни призыврал кампания нанисса чIумал республикалул наркодиспансердания учIан айшиву хIакин-нарколог. Хъиннува ххуйну хьунссия медкомиссия байсса хIакинтуравух наркологгу ухьурча, тIий ур хъунама хIакин. Му масъала МахIачкъалаллал призыврал комиссиялул председатель Сергей Цветковлул ххал­бигьинтIишиву бувсунни Шайх­рахIим РахIимовлул.
Заседаниялул хIасиллайн бувну наркотикирттайн къаршисса комиссиялул кIилчинмур дачIи шинай дуллансса давурттал план дунни.
ХIадур бувссар
А. Аьбдуллаевал