Кьакьан дирчусса янналул бувцIусса ххану бу­сса къатрачIан гъан шайхту, жува багьайкун мина-гьанулул хьусса къушлийн буххавай бурухха тIисса илгьан багьунни дакIнивун. Мува зат исват бан кунма, гихахва ккавккунни щюлли урттуйн къеп-шеп тIисса аьнакIивгу.

Хъягу-хъяй хьунийн увккунни 12-13 шинавусса оьрчI. Жуя ххари хьун ччан къабивкIунни анжагъ хъунисса кIяла ккаччан. Ккаччайн щютIа тIисса чIунил леххаврий дур­ккунни оьрчIал нинугу.
— Ина Новостройрай мина дирхьуминнаву жун кIулсса цалчинмур хъамитайпара, — тIий, хъярчирай яхши-хашгу буллай бувхру къатлувун. Мукьа инсаннансса къатрир вай тIий, буслай ур Арсен Каммаев. Къатри буниялттун гьарза-гьартасса дур. Шанма хъунива-хъунисса къатта бур. МатахI, кьай-кьуй, цимурца цилла низамрай, исвагьину лазиларкьуну дур. Къатлул заллу Адамова Сельгуят (лаккучунал хъаралусса лазгири хъамитайпа бур цуппагу) буслай бур:
— Шинни жул шикку яхъанай. Лас крандалий зий ур, арс ва душ Гъумучиял къутаннайсса школданийн лагайссар бахьтта. Яла хъунмур дардгу му дур – кIинттул хаснува школа архну бунавхьур, дакI шиши да­гьлайна тIайла бу­ккайссия школданийн. КIинттул чани буссия, утти кьувкьунни. Вай гьантрай булунтIиссар чани, чани булурчан, яла ссалчIав бала бакъая.
ХьхьичI ЦIуссачIурттащиял шяраву буссияв яхъанай. Тти­гъанну ттунна чан-кьансса гъаран, му-тагума дугьав. Дугьарча ци къаххяххави? Продукты шагьрулия ласару. Ттун шикку­сса къатрай дакI дакьай, гьарта­сса, илкинну къуццу тIун шайсса кьяйдалий дурсса дур.
Каримова Мехраба:
— Сайки 3 шинни яхъанай. Шанма оьрчI бур, оьрчI ва душ къутандалийсса школданийн лагайссар. Газгу, щингу духьурча, яла цир аьркинсса цIубутIуй? ЧIал къавхьуну, чIаххулгу бизанхьуви.
Репортаж хIадур дурссар ПатIимат Рамазановал
ва Тамара Шариповал
«Илчи», 1998 шин, май