Ухссавнил Ккавкказуллал жагьилтурал «Машук-2016» форумрай яла бусравма ва чIаку хъамаличуну хьунни хIала-ккаласса лачIунбуккавурттал мукьийла дунияллул чемпион, самболул урчIийла Аьрасатнал чемпион хьусса, жагьилтурал дянив сийлийсса Федор Емельяненко.
Форум буллалисса лагерьданийх экскурсиягу бувну, Федор Емельяненко хьунаавкьунни жагьилтуращал ва жавабру дуллунни миннал буллусса суаллахьхьун. Мунахь жагьилтурал цалчин цIувххунни Бразилиянал цIанихсса боксер Фабио Мальдонадощал уттигъанну хьусса дандибуккаврия.
— Цума ухьурчангу боксернан яла захIматми рищавуртту хъанахъиссар хар-хавар бакъами. Мукун хавар бакъулий ттул пулухухгу заккана бивщуссар. Заннайн щукру, ва лачIун уккавривугу цимурца ххуйну къуртал хьунни. ЛачIун увккун махъ хьхьичIва-хьхьичI на ттула цIуллу-сагъшиврул хъирив ивзра. ХIакинталгу махIаттал хьуну бия ттул чурххан нигьачIаву дусса цичIав ашкара къавхьукун, — тIий буслай ия жагьилтурахь Федор Емельяненко.
Жагьилтурал Емельяненкохь цIувххунни гихуннайсса планнаягу.
— Цуксса ттунма захIматнугу, Заннал ка бакьаврищал, на цахъис хIаллай уттигу хIарачат бавияв нава кунасса, ттуярва лавайсса даражалул спортсментуращал лачIун уклансса. ЛачIун буккавурттал хIакъираву, ччай ура, ца пикрилийнгу увкIун, ттуна къулайшинна дусса спортсменнащал данди уккан. Цумур-дунугу ца идаралущал кьутIи чичирча, на мукIруну ура ца яла цIанихма спортсменнащал нава данди уккан уванссара тIий. Спорт цурдарив на тачIав кьакъадитантIиссар, му ттул оьрмулуву яла агьаммурди.
ЦIанасса чIумал на каялувшиву дуллай ура Аьрасатнал ММА-лий. Ва къуллугъ цуппагу хъинну жаваблувсса, захIматсса ва тамашасса бур. Мукунма на ура оьрчIру вардиш буллай, мастер-классру ккаккан буллай, спортсментурал ихтиярду дуручлай, — увкунни Емельяненкол.
Форумрал гьурттучитурал ванахь цIувххунни Олимпиадалийн къалагаврил сававгу.
— Ттул цIана хъинну чIярусса давуртту дур. На олимпиадалийн лавгссаниягу, цIанакул на шикку зучIа къаикIантIиссияв, – тIий, хъярчру буллай ия Федор Емельяненко.
Чемпионнал мукунма бувсунни жула спортсментурал допинграл хIакъиравусса къалмакъалдануясса цала пикри. Ванал пикрилийну, ва ххуллухсса иширавугу политикалул бияла бур. Вайннал ишла буллай бивкIсса «мельдоний» хIала бусса препарат ишла баврин тачIав цукунчIавсса къадагъа къадиркIун дур ва махъсса ппурттуву бур му къадагъалувун лавсун.
— Тренировкарду дуллалисса чIумал спортсментурал чурххайн хъунмасса гуж багьайссар, чIявуми минераллу ва витаминну чурххава буккайссар. Муниятур спортсментурал къюкIлийн гуж багьан къабитаву мурадрайсса цаппара препаратру хIачIайсса, — увкунни Емельяненкол.
Жагьилтурахь насихIат буллай, Емельяненкол кIицI лавгунни оьрчIру чIавану бунува Ватан ххирану тарбия буллан аьркиншиву.
— Спорт – Ватан ххирану оьрчIру тарбия бувансса ца ххишаласса чаранни. Жува барану хьуру Сочилий хьусса Олимпий тIуркIурдай ларсъсса ххувшавурттал цинявппа ххари буллай, Ватандалухсса ччаву гужлан хъанай диркIсса куццул. Цумацагу олимпий тIуркIурдаву гьуртту хъанахъисса спортсмен хьхьичIа-хьхьичI уссар цала Ватан хьхьичI ххуттай ккаккан дувансса ххувшавуртту ласун хIарачат буллай, — увкунни Федор Емельяненкол.
Лажин хIадур дурссар
И. Саидовал
