Уттигъанну МахIачкъалаллал Шоссе Аэропорта кIичIиравусса №13 къатраву яхъанахъисса халкьуннаясса, чIарах нанисса Тарнаирка (халкьуннаву учай Воняйка) неххал щинавасса оьккисса кьункьал, гивусса пух-пусурданул, мичIакирттал цив азурда буллай буру, тIисса мурадращалсса аьрзалул хъирив бувккунни республикалул Роспотребнадзорданул ва ЖКХ-лул пишакартурая сакин бувсса комиссия.
Комиссиялул вакилтал хьхьичIва-хьхьичI хьунабавкьунни ва къатлуву яхъанахъисса халкьуннащал ва вичIидирхьунни вайннал тIимуних. Ялув кIицI лавгсса къатраву яхъанахъисса халкьуннал бусаврийну, Воняйка хасъсса идаралул зузалтрал марцI дувайсса дур гивусса ччюрклицIа шинай цал, мигу зуманив дуккан дурну, дунира кьариртун. Неххал лагма-ялтту къатри, ттучанну, машинартту бакьин байсса мастерскойрду, мойкарду бувну, дуцири ишла дурсса чапалсса щинну гивун най дусса дур. Хаснува гъинттул чIумал гикку ацIан къашайсса оьккисса кьанкь дикIайсса дур. Комиссиялухь мукунма халкьуннал бувсунни, цал хIаятраву оьрчIру тIуркIу тIунсса кIану бакъашиву, неххал кьункьая, мичIакирттая къатрал чIавахьултту тIитIин къабюхъайшиву ва цаймигу рязибакъашивуртту.
Цiана пух-пусурданул дурцIуну, халкьуннан нигьачIисса тагьардунуву дунугу, бакIрайра, тай шинардий, Тарнаирка нех дурккун диркIссар шагьрулул зума-къирагърайсса аьрщирдайсса щинну датIин. Роспотребнадзорданул неххал тагьаргу ххал дурну, халкьуннаясса аьрзирдахгу вичIидирхьуну, МахIачкъалаллал Кировский райондалул судрайн искрал аьрза тIайла бувккун бур, мугьлат бакъа дуцири диялдакъашивуртту дукьан дансса тIалавшиннаращал. Мукунма ва иширая баян бувну бур ДР-лул Прокуратуралийнгу.
