Дагъусттаннал ФСИН-лул управлениялий Аьрасатнавусса инсаннал ихтиярду дуруччаврил уполномоченныйнал аппаратрал вакилтал, Ростовуллал областьрал ва Дагъусттаннал ОНК-дал председательтал хьунабавкьунни управлениялул хъунаманащал.
Хьунабакьаврий гьуртту хьунни Ростовуллал областьрал ОНК-лул председатель Леонид Петрашис, Аьрасатнавусса инсаннал ихтиярду дуруччаврил уполномоченныйнал аппаратрал вакил Валентин Богдан, Дагъусттаннал ОНК-лул председатель ХIасан Айгунов ва Чачаннал ОНК-лул вакилтал.

Дагъусттаннал УФСИН-лул хъунама, виваллил службалул генерал-майор Муслим Даххаевлул кIицI лавгунни республикалул ОНК-лущал управлениялул ххуйсса хIала-гьурттушиву душиву ва уттиния тихунмайгу мукунма куннан ку бувчIлай зунсса умуд бушиву. Хъамаллурахь ванал бувсунни 2016 шинал республикалул УИС-рал идарарттайн бившиву Вольфганг Хайнцлул каялувшиннаралусса аьзаврдан къадагъа дуллалисса Европанал комитетрал вакилтал, Михаил Федотовлул каялувшиннаралусса, граждан общество хьхьичIуннай даврил ва инсаннал ихтиярду дуруччаврил Аьрасатнал ПрезидентначIасса Советрал вакилтал. Миннал ххуйсса кьимат бивщуну бур идарарттай­сса шартIирдан, щябивкIминнан буллалисса медициналул чулухасса кумагран, мукунма кIицI лавгун бур вай идарарттай щя­бивкIминнал ихтиярду къадурурччусса кIанттурду хьуна­къабавкьушиву.
ХIасан Айгуновлулгу цала ихтилатраву кIицI лавгунни Да­гъусттаннал ФСИН-лул управлениялул каялувчитал аьчухсса ихтилат бан ва гьаз хьусса масъалартту цачIу ххал бигьин мудангу хIадурну бикIайшиву.
Леонид Петрашислул ва Валентин Богданнул хъин чулий ккавккунни республикалул УФСИН-лул ОНК-лущалсса ва цаймигу ялув бацIаву дайсса жяматийсса организациярдащал­сса дахIаву.
Ахирданий Муслим Даххаевлул барчаллагь увкунни хъамаллурахь ва махъ буллунни, ччясса чIумул мутталий кIицI ларгсса диялдакъашивурттугу дукьан дурну, хъамаллурал бувсса мюнпатсса маслихIатру хIисавравун ласун уттиния тихуннайсса давриву.
Дагъусттаннал УФСИН-лул пресс-служба