РСФСР-данул лайкь хьусса артистка, ЗахIматрал ЯтIул Ттугълил ордендалул кавалер Ибрагьимова Шагьун Жяъппардул душнин 95 шин шаврин хасну.

Ванил университетну бия оьр­му цила дуцирив плюсирттащалсса ва минусирттащалсса. Ва бия театрданул я дянивсса, я лавайсса ду­ккаврил идарарттаву кIулшиву ласлай къабивкIсса Дагъусттаннал театрал искусствалул хьхьичIунсса усттартурал плеядалувасса ца. Амма ванил махIаттал ва хIайран байва укунмасса тамашачиталгу, сценалул искусствалул минахуртал, знатоктал – дурккумигу художествалул образрал гужирайнугу, аьщуйн щаврийнугу.
Жяъппардул душ Шагьун Ибрагьимовал Лакрал театрданул бухкIуллий ша бивзун бур архсса 1947 шинал, чIавасса душну бакъача, биялсса жагьил душну, цинявппагу «за» ва «против» мяълумну чIалачIисса, цимурца бувчIлачIисса. [pullquote]Роль цуксса захIматсса дурив, муксса ххарину ва чIувну мунихух лагайсса бивкIун бур ва муксса куртIну давривун бу­ххайсса бивкIун бурхха, му ппурттуву ваничIан гъан хьунгума къабучIину бивкIун бур. Мукун, куннил хъирив ку Лакрал театрданул сахIналийн буклан бивкIун бур Шагьун Ибрагьимовал хъинну хъирив лавну, цила тIабиаьтраявасса гьунарданийну ва куртIсса аькьлулийну уттабуккан бувсса личIи-личIисса чIуннардил ва никирттал хъами.[/pullquote]Гьай-гьайкьай, мунийн найбуна вихшала къабувссар тамашачинайн дандину, лажин лажиндарайн сахIналийн буккаву. Хар-хавар бакъасса иширал кумаг бувссар мунин, Лакрал театр гастроллайсса чIумал къашавай хьусса артисткан кIанай роль дургьуну сахIналийн був­ккун. Цинма цуппавагу дакIний бакъа, макIра кунна дургьу­ссар Шагьуннул му роль. Ччаннугу зурзу тIий, цилва чIугу чилмур кунма баллай, хIатта сахIналийсса цила уртакьтуралми чIурдугума чарив архну, ттуруллава кунма баллай бивкIссар. Амма му ццах бакъа лавсъсса шаттирал тIивтIуссар ванин хъуннасса искусствалувунсса, миллатрал театрданул мусил фондравун дурхсса бунияла­сса ва яргсса сипатирттачIансса, образирттачIансса ххуллу.
ЧIун наниссаксса ванил оьрму театрданулмунивух муксса хIала бувхссархха, махIаттал хъанай, бувчIин къахъанай бивкIссар муниннин роллу дакъа, тамашачитал бакъа, сахIналийн бу­кканнинсса къюкIлил ват-ват ва, бувккун, спектакльллая махъсса ххаришиву дакъа цуппа цукун оьрму бутлай биявав тIий. Гьарцагу рольданул ялувсса даву мунин диркIссар образрал щала тарих ва хьхьичIтарих лахьхьаврил рухI дусса процессну, театрданувунгу му байрандалийн кунма бачайсса бивкIссар.
Роль цуксса захIматсса дурив, муксса ххарину ва чIувну мунихух лагайсса бивкIун бур ва муксса куртIну давривун бу­ххайсса бивкIун бурхха, му ппурттуву ваничIан гъан хьунгума къабучIину бивкIун бур. Мукун, куннил хъирив ку Лакрал театрданул сахIналийн буклан бивкIун бур Шагьун Ибрагьимовал хъинну хъирив лавну, цила тIабиаьтраявасса гьунарданийну ва куртIсса аькьлулийну утта­буккан бувсса личIи-личIисса чIуннардил ва никирттал хъами. Ми сипатирттал ялун цичIар я ххи дуван, я миннуя чан дуван къадиркIун дур.
Ванил героиняхъул – итталун багьансса, гужсса, кьуват бусса хъами бур. Миннувасса цанния, М. Аьлиевлул «Буттал шяраву» тIисса декадалул спектакльданувасса колхозрал преседатель Сакинатлуя ванияр чIярусса шиннардил хьхьичI бур учин­сса театрал кказитирттай ва журналлай хъинну чIявусса хъин-хъинсса, ххуй-ххуйсса махъру чивчуну бивкIссар. «Скромная, немногословная горская женщина таит в себе большую силу, нераскрытые возможности, душевную чуткость. Ш. Ибрагимова и показывает этот разворот сил, способностей, красоту характера… Это хорошая актерская работа», — тIий чичлай ивкIун ур «Театр» тIисса журналданий театрал критик Ю. Рыбаков.
Лакрал театрданул га никирал муданмасса тамашачитал ку­ннахь ку байкъалитIавай буслай бивкIссар цуксса дакI дацIансса, вих хьунсса бивкIссарив Шагьун личIи-личIисса образирттаву: Севиль (Д. Джабарлыл «Севиль»), Тизбэ (В. Гюгол «Анджело»), Сакинат (М. Аьлиевлул «Буттал шяраву»), Тамари (ХI. ЦIадассал «Сапожник»), Ольга (Н. Думбадзел «Я, бабушка, Илико и Илларион»), Кади (Р. Хубецовал «Материнская слава»), Танкабике (М. Каримлул «В ночь лунного затмения»), СалихIат (М. Аьлиевлул «ПартIу-ПатIима»), Жумайсат (Г. Рустамовлул «Если сердце захочет») ва чIярусса цаймигу.
ЧIярусса шиннардил му­тталий Шагьун Жяъппаровнал сахIналий щаллу дурсса ни­ттихъал сипатрурив дур кунниха кув къалархьхьусса, ссалчIав чIарав дирхьуну, цамур затраха лащан дуван къабюхъайсса. Мяйжаннугу, цуксса кунниха ку къалавхьхьусса бур кIивагу хъамитайпа-нину К. Мазаевлул «Мусил чIимучIали» спектакльданувасса ва Б. Рамазановлул «Гьарун Саэдов» спектакльданувасса. К. Мазаевлулмур спектакльдануву ва бур куклу-кутIасса арснал нину Бахттуншал роль дургьуну. Цила арсначIа диркIсса щар­ссанил къатлуву ва бур ичIаллил гъилишиврухсса мякьлил къумашиву пишлил махъ ларитан хIарачат буллай. Кулпатрал къача-къучшивурттая анаварну лирхъсса арснал щарнил ва мунил цIуну хьусса ласнал хьхьичIа най бур ва цила шаппай, цачIавату ливхъсса талихI махъунмай зана битансса кьастгу къатIайлабацIусса хьуну.
Б. Рамазановлулмур спектакльдануву ва бур цIа дурксса революционер Гьарун Саэ­довлул ниттил роль дургьуну. Ванил ниттихъал къумашиву дур вев-гьарай къатIисса, ххаришивурив – лакъачIлачIисса, ссикъадуцIлацIисса. Ванин кIула цила роль дургьусса хъами лавай буван, бюхттул буван, миннаву агьамшиву, хасият, дугъришиву дишин.
Шагьун Ибрагьимовал сахI­налийсса къуццулул, бущилул циннара хасъсса лишанну дур жанрданул кIюласса асар, аьркинсса тонну, рангру язи дугьан бюхъаву, ттяйшиву, пIяй-пIяй бакъашиву. Шагьун Ибрагьимова мяшри мимикалул, жестырдал чулуха, амма актрисал сахIналий дуллалисса цимурца хъанай дур мунил роль дургьусса хъаннил дакIурдил, миннал рухIирдал тагьарданул дагьанину.
Аькьилсса, махъ чIяву ба­къасса Шагьун бур судиягу, адвокатгу, дусгу, насихIатчигу, хъиншиврул ва гъилишиврул жазиралул заллугу. ВаничIан кIункIу тIий бур къужригу, мюрщи оьрчIругу.
Укунмасса оьрмулувугу Шагьун бур кьянкьасса хасиятрал инсан. Цийнува цуппа хIукмурду кьамул буллай ­аьдат хьусса Шагьуннуща бюхъай, мукъуйну бакъассагу, анжагъ ца я битаврийнугу инсаннай бигар бишин, гьужум буван. Театрдануву ванияту мадара кка­ккайссия танмалтуран, даврийн букIлай-къабукIлай, цалла даву дакIнийхтуну къадуллалиминнан.
ХIакьинурив 95 шинаву­сса Шагьун Ибрагьимовая мадара­сса ккаклай бур ванил оьрчIал оьрчIан ва оьрчIал оьрчIал оьр­чIан. Миннаятугу ванил тIалав дуллай бур жаваблувшинна, низам, яла-яларив, рувхIанийсса зунттал этикетрал кьараллу хъамакъаритаву. Гьай-гьай, Шагьун-бавал махъгу миннан законни. ОьрчIнийва нину дакъа ливчIсса ми ччаннай бацIан бувсса ваниллихха, кIулшивугу, тарбиягу дуллуну, ми кулпатралгу буван кумаг бувсса. Ми ванин уттигу мюрщи оьрчIрунува личIлай бур, ттигу, шилагу минналсса буллай, миннал ялув буруккинттарай бур ва.
Гулизар Султанова
Таржума
Бадрижамал Аьлиевал