ЦIуллу-сагъшиврул чан-кьанну палачат хьуну ушиву сававну, цуксса хIайпнугу, ттуща къабювхъунни лакрал миллатрал вирдакIнил дагьанинугу, маз ябаврил бакIщаращинугу, багьу-бизулул кьимат бищунугу, аькьил­сса маслихIатчинугу, инсантурал дакIурдивун чани буххан буллалимурнугу, вихшала дишин бюхъай­сса дус-гьалмахчунугу хъанахъисса «Илчи» кказит итабакьлай 25 шин шаврил юбилейрал шадлугъращал цила чIумал барча буван.

Къавхьунни, цуксса ччай бивкIнугу, му шадлугърал мажлисрай гьурттушин дангу. Умуд бур кказитрал зузалт­рал коллектив ва хIуччалул ялтту бучIанссар тIисса, ва коллективраву сайки 16 шинал мутталий навагу зий ивкIсса журналист ушиврийн бувну.
«Илчи» кказитрал ттул оьрмулул улттуй кьадиртссар хъама­къадитансса чаннасса аьш. «Илчи» кказитрал Ккуллал райондалий­сса корреспондентну зузисса шиннардий, на кIул хьуссара райондалул шяраваллал жяматирттащалгу, миннал багьу-бизулул, культуралул, аьдатирттал ххазнардал ххуйшивурттащалгу, жяматирттал дянивсса, чаннацIурттан ккалли бан лайкьсса, личIи-личIисса пишакартуращалгу, лакку кIанугу, лакку мазгу ххирасса, кказитрал даврин лавайсса кьимат бишлашисса къуллугъчитуращалгу, учительтуращалгу, культуралул минахуртуращалгу, захIматчитуращалгу, Хъун дяъвилул ва захIматрал ветерантуращалгу. Мукунсса «чаннацIурттая» на чIярусса макьаларттугу чирчуссар. Цумур шяравун нава гьарчангу, ттул хIурматгу, кьадру-кьиматгу лавайсса бикIайва инсантурал чулуха, «Илчилул» корреспондент уну тIий. Ва хIуччалийнугу чIалай бикIайва райондалул агьалинал дянив «Илчи» сийлий бушиву, бусравну бушиву, му чIявуссаннал буккайсса кказит бушиву.
Кказитрал корреспондент – райондалийсса мунил вакил хIисаврай ттун багьайва подпискалул масъалартталсса буллангу. Хаснувагу почталул отделениярттал хъуниминнащалгу, идарарттал ва организациярттал каялувчитуращалгу. Подпискалул хIакъиравусса ихтилатру чансса къашайсса укунмасса инсантуращалгу. ТIайланма учин, цуксса хIайпнугу, хьунабакьайва инсантал: «Илчи» щин аьркинссар», «Му щил буккайссар!?», «Гьарзатраяния телевизордавух буслай бур», «Лакку маз му чIал бакъа бивчIантIисса мазри», — тIий, цалла дакIурдил къумашиву – цIаншиву ялун личин дуллалиссагу. ЧIявуминнал зумату тIурча буккайва махъру «Илчи» кказит цанма ххирану, бусравну бушивриясса, «Илчилул» зузалтрал чулухунмай барчаллагьращал­сса, хIурмат бушивриясса, кказит цала къатравун ххуйсса ссайгъатращал учIайсса хъинхъамаличуну бушивриясса. Мукунсса пикрирду бакIурдиву буминнал аьдад лакрал миллатрал инсантурал дянив хъуннасса душиврил яргсса лишанни кказитрал 25 шинал юбилей.
На щукрулий икIара ттула оьр­мулуву «Илчилул» чани ккавккун тIий, «Илчи» дунияллийн буккан буллай захIмат бихьлахьисса ххаллилсса, пагьму-гьунарду ххисса журналистуращал, шаэртуращал кIул хьунсса каши-кьудрат Аллагьнал ттухьхьунна дуллуну тIий.
1991 шинал итабавкьусса «Илчилул» 1-мур номерданий дуссия ттул макьала «Булара ттухьхьун махъ» цIанилусса. Тания шихунай на «Илчилул» дусгура, буккугура, уртакьгура, кумагчигура, лагабаргъ куна зунттухун гьаннин.
Цалчинва цалчин, дакIнийхтуну барча буллай ура кказитрал зузалтрал коллектив, щала лакрал миллатрал жямат «Илчилул» 25 шинал юбилейращал, чIа тIий ура кказитран чIярусса хьхьичIуннайшивуртту, лахъисса оьрму, агьалинан муданма бусравнува личIаву.
«Илчилул» зузалтран чIа тIий ура хьхьичIуннайшивуртту хьун дуллансса цIуллушивугу, тIайлабацIугу.
КIилчингу, барча буллай ура «Илчилул» хъунмур редактор ХIусайнаева Качар Абачарал душ «За любовь к родной земле» тIисса Дагъусттаннал хIурматрал лишандалун лайкь шаврищал, чIа тIий ура, ванияргу ларайсса наградарттан лайкь хьуну, вания тихунмайгу «Илчилул» цIа бюхттул дуллай, захIмат бихьлансса цIакьсса цIуллушиву. 25 шинал мутталий кказитрал каялувчину зий бивхьусса захIматрахлу Качар Абачараевна лайкьссар агьалинал чулухасса барчаллагьрангу, паччахIлугърал чулухасса ларайсса наградалунгу.
Шамилчингу, дакIнийхтуну барча буллай ура ттула дустал-уртакьтал: Аьдилов ХIасан Аьбдуллул арс, Къардашов Руслан Аьвдулманаплул арс, Мисриханова Андриана Пяталил душ, Рамазанова ПатIимат ХIажирамазаннул душ, Тахакьаева Зулайхат Аьвдулкариннул душ, «Дагъусттан Республикалул культуралул лайкь хьусса зузала» тIисса хIурматрал цIардан лайкь шаврищал, чIа тIий ура цинявннан цIакьсса цIуллушивугу, давриву муданмасса тIайлабацIугу. На хъинну ххариссара Республикалул БакIчинал «Илчилул» зузалтрал даврин лавайсса кьимат бищаврия.
Шаэргу ушиврийн бувну, «Илчилуха» укунсса «саннагу» дуллай ура:

«Илчи» най бур чай бурттий,
Хьхьури цIакьну дургьуну,
Лахъисса ххуллул манзил
Юргълий битан кьаст дуну,
Кьуния ххюра шинай
Бущи хьхьара къабувну,
Чумартсса чувнал кунма
Кьяпа хъилий бивхьуну.

ЛяличIину яргсса бур
«Илчи» чирахърал чани,
Му чани бур миллатрал
Мяърипатрал дагьани,
«Илчилул» чаннал тIинтту
Дияй аьламравунгу,
Аьламатру мяш тIисса
Архсса билаятрайнгу.

Барча, «Илчий», юбилей,
Лакрал миллатрал балай,
Дунияллул мукьвагу
МурцIний лакран бусравсса,
Бюхъайссар вища бикIан
Абадлий пахру буллай,
Буну тIий лагма лавгми
Вил цIа бюхттул дуллайсса.

Буккултрал ккал хъун хьуннав,
Уртакьтал чан къахьуннав,
Юргъа бидавлул бущи
ТачIав хьхьара къахьуннав.
Ина лакрал миллатрал
Чирахънува личIаннав,
Вил бюхъулул ардарав
ХъункIултIутIив хъятIуннав.
Чанкура КьурбанмахIаммадов,
Аьрасатнал Журналистурал союзрал член, Дагъусттаннал культуралул лайкь хьусса зузала, шаэр