МахIачкъалалив августрал 1-нний дуккаврил шинайн кIулшивуртту дулаврил идарартту цукун хIадур хьуну бурив ххал буллалисса хасъсса комиссиялул даву дайдирхьунни.

И. Саидова
Совещаниялул даврий гьуртту хьунни шагьрулул бакIчинал хъиривчу Запир Алхасов, КIул­шивуртту дулаврил управлениялул хъунама ТIагьир Мансуров, шагьрулул Кировский, Советский, Ленинский районнал администрациярттал вакилтал, виваллил иширттал органнал зузалт ва цаймигу.
Ва батIаврий гьурттушинна дурминнахь бувсунни августрал 1-нния 15-ннийн бияннин зунтIишиву шагьрулул администрациялул ва кIулшивуртту дулаврил управлениялул вакилтурая, ГИББД-лул ва шагьрулул МВД-лул отделданул, Роспотребнадзорданул, Ростехнадзорданул ва цаймигу ведомстварттал идарарттал зузалтрая сакин хьусса комиссия. Ва коми­ссиялул зузалтран ялув бацIан багьлай бур шагьрулул 57 школалул пожарный сигнализациялул, санитариялул ва цаймигу тIалавшиннарду биттур дурну дурив ххал дуллай. Комиссиялул ххал дигьинтIиссар ва кьимат бищунтIиссар ккаккан бувсса идарарттал тIалавшиннарду цукун щаллу дурну дуссарив. Яла хъунмур къулагъасгу дантIиссар мюхчаншиву дуруччаврил ма­съаларттах.
Гьарца идаралущал дувантIи­ссар дуккаврил шинайн цукун хIадур хьуну бурив исват буллалисса актру. КIулшивуртту дулаврил управлениялийн августрал 18-нин биян буван аьркинссар дуккаврил шинайн школарду хIадур хьуну бушиву баян буллалисса информациярду.
Школарду дуккаврил шинайн хIадур баврил ялув бав­цIусса комиссиялул даву ххал дигьинтIиссар шагьрулул властирдалгу.